​ប្រែ​សម្រួលៈ​បំណង​(​ដេល្លី​ម៉េល​)៖​ចិន​បាន​ថ្កោលទោស​ការវាយប្រហារ​នៅ​ទីក្រុង​កា​ប៊ុល​និង​សង្ឃឹម​ថា​រដ្ឋាភិបាល​អា​ហ្វ​ហ្គានី​ស្ថាន​អាចការពារ​ពលរ​ដ្ឋ​មក​ពី​គ្រប់​ប្រទេស រួម​ទាំង​ជនជាតិ​ចិន​ផង នេះ​បើ​តាម​​ការប្រកាស​របស់​ក្រសួងការបរទេស​ចិន​នៅ​ថ្ងៃ​ព្រហស្បតិ៍​ទី​១២​មករា​។​

​យោងតាម​ទីភ្នាក់ងារ​សារព័ត៌មាន​រ៉​យ​ទ័រ ជន​វាយប្រហារ​ដោយ​គ្រាប់បែក​អត្តឃាត​ម្នាក់​បាន​សម្លាប់​មនុស្ស​យ៉ាង​តិច​ប្រាំ​នាក់​នៅ​ក្រៅ​ក្រសួងការបរទេស​អា​ហ្វ​ហ្គានី​ស្ថាន​កាលពី​ថ្ងៃ​ពុធ​និង​មន្ទីរពេទ្យ​​មួយ​ក្បែរ​នោះ​បាន​និយាយថា មនុស្ស​ជាង​៤០​នាក់​បាន​រងរបួស​ពី​ការវាយប្រហារ​។​

​នៅពេល​ត្រូវ​បាន​សួរ​ថា​ការផ្ទុះ​នេះ​សំដៅលើ​គណៈប្រតិភូ​ចិន​មួយឬ អ្នកនាំពាក្យ​ក្រសួង​លោក​វ៉ាង វិន​ពីន​(Wang Wenbin)​បាន​និយាយថា​« តាម​យើង​ដឹង​មាន​មនុស្ស​ជាច្រើន​ស្លាប់​និង​របួស​ក្នុ​ការ​​វាយប្រហារ​ភេរវកម្ម​នេះ​»​។​

​កាលពី​ថ្ងៃ​ពុធ ក្រុម​រដ្ឋ​អ៊ីស្លាម​អា​ហ្វហ្គានី​ស្ថាន​បាន​អះអាង​ទទួលខុសត្រូវ​ចំពោះ​ការ​បំផ្ទុះ​គ្រាប់បែក​អត្តឃាត​នៅក្រៅ​ក្រសួងការបរទេស​ក្នុង​ទីក្រុង​កា​ប៊ុល​។​ទីភ្នាក់ងារ​សារព័ត៌មាន​Amaq​របស់​ក្រុម​នេះ​​បាន​និយាយថា​« សមាជិក​ក្រុម​រដ្ឋ​អ៊ីស្លាម​ម្នាក់​បាន​ជ្រៀតចូលរ​បាំង​សន្តិសុខ​មុន​បំផ្ទុះ​ខ្សែក្រវាត់​គ្រាប់បែក​នៅ​កណ្តាល​ហ្វូង​និយោជិត​និង​ឆ្មាំសន្តិសុខ​»​។​

​អ្នកនាំពាក្យ​ប៉ូលីស​ក្រុង​កា​ប៊ុល​បាន​និយាយថា ជន​ស៊ីវិល​ប្រាំ​នាក់​បាន​ស្លាប់​និង​ជាច្រើន​នាក់​ទៀត​រងរបួស​ក្នុង​ការផ្ទុះ​។​

​ក្រុម​រដ្ឋ​អ៊ីស្លាម​មូលដ្ឋាន​ឈ្មោះថា ក្រុម​រដ្ឋ​អ៊ីស្លាម​-​ខូ​រ៉ាសាន់​(ISK)​បាន​អះអាង​ថា មនុស្ស​ដល់​ទៅ​២០​នាក់​ត្រូវបាន​សម្លាប់ រួម​មាន​និយោជិត​ការទូត​ជាច្រើន​នាក់​ផង​។​ក្រុម​នេះ​បាន​អះអាង​ទទួលខុសត្រូវ​​ចំពោះ​ការវាយប្រហារ​បន្តបន្ទាប់​លើ​ផលប្រយោជន៍​បរទេស​នៅ​ប៉ុន្មាន​ខែ​កន្លងមកនេះ ចំ​ពេល​ក្រុម​តា​លី​បង់​ព្យាយាម​ទាក់ទាញ​ការវិនិយោគ​មកពី​បណ្តា​ប្រទេស​ក្បែរ​ខាង​។​

​កាលពី​ខែ​មុន ជនជាតិ​ចិន​យ៉ាងតិច​ប្រាំ​នាក់​បាន​រងរបួស​នៅពេល​ខ្មាន់កាំភ្លើង​សំរុកចូល​និង​បាញ់ប្រហារ​នៅក្នុង​សណ្ឋាគារ​ពេញនិយម​សំរាប់​ជនជាតិ​ចិន​មួយ​នៅក្នុង​ក្រុង​កា​ប៊ុល​។​

​រដ្ឋាភិបាល​ទីក្រុង​ប៉េកាំង​មិន​ទទួលស្គាល់​រដ្ឋាភិបាល​តា​លី​បង់ទេ តែ​កំពុង​សម្លឹង​ធ្វើ​ការវិនិយោគ​លើ​ធនធាន​រ៉ែ​របស់​អា​ហ្វ​ហ្គានី​ស្ថាន ដែល​មិន​ត្រូវបាន​ធ្វើ​អាជីវកម្ម​ក្នុងអំឡុង​សង្គ្រាម​២០​ឆ្នាំ​ក្រោ​ការបញ្ចប់​​របប​តា​លី​បង់​មុន​នៅ​ឆ្នាំ​២០០១៕

កងសន្តិសុខតាលីបង់បិទខ្ទប់តំបន់រងការវាយប្រហារដោយគ្រាប់បែកអត្តឃាតកាលពីថ្ងៃពុធ