​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ នាយករដ្ឋមន្ត្រី​ប៉ា​គី​ស្ថាន​បាន​និយាយ​កាលពី​ថ្ងៃ​ព្រហស្បតិ៍​ទី​១២​មករា​ថា​អារ៉ាប់​រួម​អេ​មី​រ៉ា​ត​បាន​យល់ព្រម​ពង្រីក​ប្រាក់កម្ចី​ចំនួន​២​ពាន់​លាន​ដុល្លារ​ដល់​ប្រទេស​​របស់លោក និង​ផ្តល់​កម្ចី​ឥត​សំណង​បន្ថែម ១ ពាន់​លាន​ដុល្លារ ខណៈ​ប្រទេស​របស់​លោក​កំពុង​តស៊ូ​ស្តារ​ពី​គ្រោះទឹកជំនន់​ដ៏​បំផ្លិចបំផ្លាញ​នៅ​រដូវក្តៅ​និង​វិបត្តិ​សេដ្ឋកិច្ចដ៏​ធ្ងន់ធ្ងរ​។​

​ការិយាល័យ​របស់​នាយ​ក​រដ្ឋមន្ត្រី សា​បាស សារីហ្វ (Shahbaz Sharif) បាន​ធ្វើ​សេចក្តីប្រកាស​បែបនេះ បន្ទាប់ពី​លោក​បាន​ចូលគាល់​ជាមួយ​មេដឹកនាំ​អារ៉ាប់​រួម​អេ​មី​រ៉ា​ត​គឺ​អ្នកគ្រប់គ្រង​ទីក្រុង​​អា​ប៊ូ​ដា​ប៊ី (Abu Dhabi)​ទ្រង់ សេក ម៉ូ​ហា​ម៉េត ប៊ីន ហ្សា​យ៉េត អាល់ ណា​យ៉ាន (Sheikh Mohammed bin Zayed Al Nahyan)​។ ការិយាល័យ​បាន​ឱ្យដឹងទៀតថា ទ្រង់​សេក​ម៉ូ​ហា​ម៉េត​​បាន​យល់ព្រម​លើ​ការពង្រីក​ប្រាក់កម្ចី​ចាស់​និង​ប្រាក់​កម្ចី​ថ្មី​ដែល​ត្រូវការ​ចាំបាច់​យ៉ាងខ្លាំង ខណៈ​ទុនបម្រុង​រូបិយប័ណ្ណ​បរទេស​នៅក្នុង​ប្រទេស​បាន​ធ្លាក់ចុះ​មក​នៅត្រឹម ៥,៥ ពាន់​លាន​ដុល្លារ​ដែល​គ្រប់​​គ្រាន់​សម្រាប់​ការនាំ​ចូល​ក្រោម​មួយ​ខែ​ប៉ុណ្ណោះ​។​

​ការិយាល័យ​របស់​លោក​សារីហ្វ​បាន​និយាយថា “​ភាគី​ទាំងពីរ​បាន​ព្រមព្រៀង​គ្នា​ក្នុង​ការធ្វើឱ្យ​ស៊ីជម្រៅ​នូវ​កិច្ចសហប្រតិបត្តិការ​វិនិយោគ ជំរុញ​ភាពជា​ដៃគូ​និង​បើក​ឱកាស​ធ្វើ​សមាហរណកម្ម​ការវិនិយោគ​​រវាង​ប្រទេស​ទាំង​ពីរ​”​។​

​អារ៉ាប់​រួម​អេ​មី​រ៉ា​ត​មិន​បាន​ទទួលស្គាល់​ភ្លាមៗ​អំពី​ការពង្រីក​ប្រាក់កម្ចី​និង​ការផ្តល់​កម្ចី​ឥត​សំណង​១​ពាន់​លាន​បន្ថែម​នោះទេ​។ ប្រទេស​នេះ​បាន​និយាយថា កិច្ចប្រជុំ​នៅ​វិមាន Al Shati នៃ​ទីក្រុង​អា​ប៊ូ​ដា​ប៊ី បានឃើញ​មេដឹកនាំ​ទាំង​ពីរ​ពិភាក្សា​អំពី “​ទំនាក់ទំនង​ជា​ប្រវត្តិសាស្ត្រ​រវាង​អារ៉ាប់​រួម​អេ​មី​រ៉ា​ត​និង​ប៉ា​គី​ស្ថាន និង​វិធី​ដើម្បី​បង្កើន​កិច្ចសហប្រតិបត្តិការ​រួម​គ្នា​និង​ពង្រីក​ទំនាក់ទំនង​របស់​ខ្លួន​តាម​វិធី​មួយ​ដែល​បម្រើ​ផលប្រយោជន៍​ទៅវិញទៅមក​នៃ​ប្រទេស​ទាំង​ពីរ​”៕

​នាយករដ្ឋមន្ត្រី​ប៉ា​គី​ស្ថាន លោក សា​បាស សារីហ្វ (​ឆ្វេង​) និង​ទ្រង់​សេក ម៉ូ​ហា​ម៉េត ជួប​ពិភាក្សា​គ្នា​នៅ​ទីក្រុង​អា​ប៊ូ​ដា​ប៊ី​កាលពី​ថ្ងៃ​ព្រហស្បតិ៍​