​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋាភិបាល​អាម៉េរិក​កំពុង​ពិនិត្យមើល​របាយការណ៍​ស្តី​ពី​យាន UFO​ចំនួន ៥១០ ដែល​លើស​ពី​ឯកសារ​ឆ្នាំ ២០២១ ជាង​បី​ដង​ហើយ​ខណៈ​របាយការណ៍​ភាគច្រើន​​ត្រូវ​បាន​បង្កឡើង​ដោយ​ដ្រូ​ន​ឬ​បា​ឡុង របាយការណ៍​រាប់រយ​ទៀត​នៅតែ​មិន​ទាន់​អាច​ពន្យល់បាន នេះ​បើ​យោងតាម​របាយការណ៍​ថ្មី​មួយ​ដែល​បាន​ចេញផ្សាយ​កាលពី​ថ្ងៃ​ព្រហស្បតិ៍​ទី​១២​មករា​។​

​របាយការណ៍​ឆ្នាំ ២០២២ របស់​នាយក​ទីភ្នាក់ងារ​ស៊ើបការណ៍​សម្ងាត់​ជាតិ (DNI)​បាន​និយាយថា របាយការណ៍​អំពី “​បាតុភូត​មិនធម្មតា​ដែល​មិន​ស្គាល់​អត្តសញ្ញាណ​” ឬ UAP ចំនួន ២៤៧​ត្រូវបាន​ដាក់​​ជូន​មក​ទីភ្នាក់ងារ​នេះ​ចាប់តាំងពី​ខែ​មិថុនា ឆ្នាំ ២០២១ នៅពេល​ដែល​ទីភ្នាក់ងារ​នេះ​បាន​លាតត្រដាង​ថា​ខ្លួន​មាន​កំណត់ត្រា​អំពី​ការ​ពើបប្រទះ​វត្ថុ​ពីលើ​អាកាស​គួរឱ្យ​សង្ស័យ​ចំនួន ១៤៤ ដង​។​

​លើសពីនេះ របាយការណ៍​របស់ DNI បាន​និយាយថា របាយការណ៍​ចំនួន ១១៩ ផ្សេង​ទៀត​ដែល​បាន​កប់​នៅក្នុង​កំណត់ត្រា​ចាស់​កាលពី ១៧ ឆ្នាំមុន ត្រូវបាន​រកឃើញ​ដោយ​ធ្វើឱ្យ​របាយការណ៍​សរុប​​មាន​ចំនួន ៥១០​។​

​របាយការណ៍​ថ្មី​ភាគច្រើន​គឺ​បានមក​ពី​កងទ័ពជើងទឹក​និង​ជើង​អាកាស​អាម៉េរិក​។​

​ក្នុងចំណោម​នោះ ជិត​២០០ របាយការណ៍​មាន​ការពន្យល់ “​សឹង​មិន​គួរ​ឱ្យ​ជឿ​” ៖ ពួក​វា​គឺជា​បា​ឡុង ដ្រូ​ន ឬ អង់​តែ​ន​លើ​អាកាស ដែល​តាមដាន​ពពួកសត្វ​ស្លាប ព្រឹត្តិការណ៍​អាកាសធាតុ និង​ថង់ប្លាស្ទិក​​នៅលើ​អាកាស​។​ប៉ុន្តែ​របាយការណ៍​ផ្សេងទៀត​មិន​ត្រូវ​បាន​ពន្យល់​នោះទេ នេះ​បើ​យោង​តាម​ឯកសារ DNI ដែល​ជា​ឯកសារ​មិន​សម្ងាត់​ដែល​បាន​បញ្ជូន​ទៅ​សភា​។​

​របាយការណ៍​ទាំងអស់នេះ​គឺជា​ការផ្តោត​សំខាន់​នៃ​ការត្រួតពិនិត្យ​ដោយ​មន្ទីរ​បញ្ច​កោណ ទីភ្នាក់ងារ​ស៊ើបការណ៍​សម្ងាត់​អាម៉េរិក និង​អង្គការ​ណា​សា​ជុំវិញ​ការព្រួយបារម្ភ​មិនមែន​ដោយសារ​តែ​ពួក​វា​ជា​​យាន​ក្រៅ​ភព​ប៉ុណ្ណោះ​ទេ ប៉ុន្តែ​ថែមទាំង​សមត្ថភាព​ចារកម្ម​មិន​ស្គាល់​របស់​ប្រទេស​គូប្រជែង​ផងដែរ​។​

​របាយការណ៍​ខាងលើ​និយាយថា “UAP បន្ត​តំណាងឱ្យ​គ្រោះថ្នាក់​ដល់​សុវត្ថិភាព​ហោះហើរ និង​ជា​លទ្ធភាព​គំរាមកំហែង​ពី​គូប្រជែង​”៕

រូបភាព​ខ្លះ​ថត​បាន​ដោយ​កងទ័ពជើងទឹក​អាម៉េរិក ត្រូវបាន​ចាត់ទុក​ថា​ជា​យាន UFO