​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្វីៗ​ទាំងអស់​សឹងតែ​ដំណើរ​ទៅមុខ​យ៉ាង​រលូន​សម្រាប់​ប្រធានាធិបតី ចូ បៃ​ដិន នៅ​ពេល​គាត់​បើក​ទំព័រ​ឆ្នាំ​ថ្មី​។​អត្រា​គាំទ្រ​របស់​គាត់​បាន​កំពុង​កើនឡើង​។ អតិ​ផរ​​ណា​បាន​ធ្លាក់ចុះ​។ ហើយ​ខណៈ​ដែល​គណបក្ស​ប្រជាធិបតេយ្យ​បាន​រួបរួម​គ្នា​នៅ​ពី​ក្រោយ​យុទ្ធនាការ​បោះឆ្នោត​ឡើង​វិញ​របស់​គាត់ គណបក្ស​សាធារណរដ្ឋ​កំពុងមាន​សង្គ្រាម​ជាមួយ​គ្នា​ឯង​បន្ទាប់​ពី​រដូវ​​កាល​បោះឆ្នោត​ពាក់កណ្តាល​អាណត្តិ​ដ៏​ខកចិត្ត​។​

​ប៉ុន្តែ​កាលពី​ថ្ងៃ​ព្រហស្បតិ៍​ទី​១២​មករា ទស្សនវិស័យ​នយោបាយ​របស់​លោកបៃ​ដិនបាន​ធ្លាក់​ចូល​ក្នុង​ស្ថានភាព​មិន​ច្បាស់លាស់​បន្ថែម​ទៀត បន្ទាប់​ពី​អគ្គ​រដ្ឋអាជ្ញា​លោក មឺ​រីក ហ្គាលែ​ន (Merrick Garland) បាន​តែងតាំង​ទីប្រឹក្សា​ពិសេស​មួយ​រូប​ដើម្បី​ស៊ើបអង្កេត​ការដោះស្រាយ​ឯកសារ​សម្ងាត់​របស់​ប្រធានាធិបតី​មកពី​បក្ស​ប្រជាធិបតេយ្យ​រូបនេះ​។​

​សមាជិក​គណបក្ស​ប្រជាធិបតេយ្យ​ជាច្រើន​រូប​បាន​ទទួលស្គាល់​ជា​សាធារណៈ​និង​ជា​លក្ខណៈ​ឯកជន​ថា ការវិវឌ្ឍ​ដ៏​គួរឱ្យ​ភ្ញាក់ផ្អើល​នេះ​គឺជា​ការរំខាន​នៅ​គ្រា​ដ៏​មិន​សមគួរ​បំផុត ក្នុងពេល​ដែល​លោក ដូ​ណា​ល់ ត្រាំ កំពុង​ច្របូកច្របល់​ជាមួយ​ក្តីក្តាំ​ជាច្រើន​។ អតីត​ប្រធានាធិបតី​នៃ​គណបក្ស​សាធារណរដ្ឋ​រូបនេះ​ក៏​កំពុង​ប្រឈម​មុខ​នឹង​ទីប្រឹក្សា​ពិសេស​ដែរ​ហើយ​បាន​ស្ថិតក្រោម​ការស៊ើបអង្កេត​ព្រហ្មទណ្ឌ​សហព័ន្ធ​​សម្រាប់​ការដោះស្រាយ​ឯកសារ​សម្ងាត់​និង​លទ្ធភាព​ការបំពាន​ផ្សេង​ទៀត​ជាច្រើន​។​

​មាន​ភាពខុសគ្នា​យ៉ាង​សំខាន់​រវាង​ករណី​ទាំងពីរ​។ អ្វី​ដែល​គួរឱ្យ​កត់សម្គាល់​បំផុត​នោះ​គឺថា មិន​មាន​ការលើកឡើង​ណាមួយ​ថា​លោកបៃ​ដិន​ព្យាយាម​រារាំង​កុំឱ្យ​គេ​ប្រមូល​យក​ឯកសារ​នៅ​ផ្ទះ​ឬ​ការិយាល័យ​​របស់គាត់ ឬ​ការលើកឡើង​ថា​គាត់​បានដឹង​អំពី​វត្តមាន​ឯកសារ​ទាំងនោះ​ទេ​។ លោក​ត្រាំ ដែល​កំពុង​ត្រូវបាន​ស៊ើបអង្កេត​សម្រាប់​ការរារាំង​អ្នក​ស៊ើបអង្កេត​នោះ ក៏​មា​ឯកសារ​សម្ងាត់​ជាច្រើន​នៅក្នុង​​ដៃ​របស់​គាត់​ដែរ​។​

​ប៉ុន្តែ​ការតែងតាំង​ទីប្រឹក្សា​ពិសេស​កាលពី​ថ្ងៃ​ព្រហស្បតិ៍​នៅតែ​ជំរុញ​ឱ្យ​មាន​ភាពមិនប្រាកដ​ប្រជា​ផ្នែក​ច្បាប់​លើ​ប្រធានាធិបតី​កំពុង​កាន់​តំណែង ហើយ​អាច​ធ្វើឱ្យ​មាន​ការជជែក​ដេញដោល​ឡើងវិញ​ក្នុង​ចំណោម​សមាជិក​បក្ស​ប្រជាធិបតេយ្យ​អំពី​បំណង​របស់​គាត់​ក្នុង​ការស្វែងរក​អាណត្តិ​ទី​ពីរ​។​

​លោក ជែម​ស៍ ខា​វី​ល (James Carville) អ្នក​យុទ្ធសាស្ត្រ​ជើងចាស់​របស់​បក្ស​ប្រជាធិបតេយ្យ បាន​និយាយថា “​គ្មាន​នរណា​ម្នាក់​នឹង​និយាយថា​នេះ​ជា​រឿង​ផ្តល់​ប្រយោជន៍​ទេ​។​វា​ពិត​ណាស់​មិន​​មែន​ជា​រឿង​ល្អ​ទេ​”​។​

​ខណៈ​អ្នកប្រជាធិបតេយ្យ​បាន​ផ្លាស់ប្តូរ​ទៅ​ជា​ទម្រង់​ការពារ​ខ្លួន សមាជិក​គណបក្ស​សាធារណរដ្ឋ​របស់​ត្រាំ​ដែល​ជា​គូប្រជែង​ក្នុង​ឆ្នាំ ២០២៤ បាន​ទទួល​ស្គាល់​ថា​ស្ថានភាព​នៃ​ការប្រកួតប្រជែង​នាពេល​ខាង​​មុខ​បាន​ផ្លាស់ប្តូ​រហើយ​។​

​លោក ច​ន បូល​តុ​ន (John Bolton) ដែល​បាន​បម្រើការ​ជា​ទីប្រឹក្សា​សន្តិសុខ​ជាតិ​ក្រោម​ការដឹកនាំ​របស់​លោក​ត្រាំ​និង​កំពុង​ពិចារណា​ប្រជែង​តំណែង​នៅ​សេត​វិមាន​របស់​គណបក្ស​សាធារណរដ្ឋ បាន​និយាយថា ត្រាំ “​គឺជា​បុរស​ដែល​មាន​សំណាង​បំផុត​នៅក្នុង​នយោបាយ​អាម៉េរិក​។ រឿង​នេះ​គួរតែ​អាច​ដកសិទ្ធិ​ប្រជែង​តំណែង​ប្រធានាធិបតី​សម្រាប់​អ្នក​ទាំង​ពីរ​បាន​”​។​

​ដូច្នេះ​ការចាប់ផ្តើម​រដូវ​កាល​បោះឆ្នោត​នឹង​មាន​ភាព​រញ៉េរញ៉ៃ ដែល​ក្នុងនោះ​ប្រធានាធិបតី​អាម៉េរិក​បច្ចុប្បន្ន​និង​អតីត​ប្រធានាធិបតី​ទាំង​ពីរ​រូប​កំពុង​ស្ថិត​ក្រោម​ការស៊ើបអង្កេត​ដោយ​ទីប្រឹក្សា​ពិសេស​​ដូចគ្នា ខណៈ​ពួកគេ​ត្រៀម​ប្រជែង​តំណែង​ប្រធានាធិបតី​ក្នុង​ឆ្នាំ ២០២៤​។ អ្នកបោះឆ្នោត​ជា​ច្រើន​នៅក្នុង​គណបក្ស​ទាំងពីរ​បាន​អំពាវនាវ​រួចហើយ​ឱ្យ​ថ្នាក់ដឹកនាំ​ជំនាន់​ថ្មី​ចេញមុខ​ប្រជែង​តំណែង​ប្រធានាធិបតី​។ ការអំពាវនាវ​បែបនេះ​ឥឡូវ​កំពុង​មាន​សំឡេង​ឮ​ខ្លាំង​ឡើង​។​

​លោក ន័​រមែន សូ​ឡូ​ម៉ុន (Norman Solomon) ជា​អ្នកប្រជាធិបតេយ្យ​ជឿនលឿន​មួយ​រូប ដែល​កំពុង​ដឹកនាំ​យុទ្ធនាការ Don’t Run Joe ដែល​កំពុង​ដំណើរការ​ការផ្សាយ​ពាណិជ្ជកម្ម​តាម​ទូរទស្សន៍​ដើម្បី​ប្រឆាំងនឹង​លោកបៃ​ដិន​នៅក្នុងរ​ដ្ឋ​សំខាន់ៗ បាន​និយាយថា “​នៅ​សមរភូមិ​នយោបាយ យុទ្ធនាការ​ឆ្នាំ ២០២៤ របស់​លោកបៃ​ដិន​គឺ​ងាយ​រងគ្រោះ​ណាស់​។ អ្នក​ប្រជាធិបតេយ្យ​និង​ប្រទេស​ទាំងមូល​នឹង​កាន់តែ​ប្រសើរ​ឡើង​នៅ​ឆ្នាំ​នេះ​និង​ឆ្នាំក្រោយ ប្រសិនបើ​គាត់​មិន​ឈរឈ្មោះ​ប្រជែង​តំណែង​ប្រធានាធិបតី​”៕

​លោកបៃ​ដិន​កំពុង​ស្ថិត​ក្រោម​ការស៊ើ​បអង្កេត​ក្រោយ​ការរកឃើញ​ឯកសារ​សម្ងាត់​កាលពី​លោក​នៅ​ជា​អនុ​ប្រធានាធិបតី​នៅក្នុង​ទីកន្លែង​ឯកជន​របស់​លោក​។​ច្បាប់​អាម៉េរិក​ចែងថា ប្រធានាធិបតី​ឬ​អនុ​​ប្រធានាធិបតី​ត្រូវ​តែ​ប្រគល់​ឯកសារ​ផ្ទាល់​ខ្លួន​ទៅ​កាន់​ប័ណ្ណ​សារជាតិ​ក្រោយ​ឈប់​កាន់តំណែង​

​ទាំងត្រាំ និងបៃដិន ឥឡូវប្រឈមការបាត់បង់ឳកាសឈរឈ្មោះសំរាប់តំណែងប្រធានាធិបតីជាថ្មី