ដោយៈ ទេ​ពក​ង្រី ​/ កំពង់ឆ្នាំងៈ នៅ​ព្រឹក​ថ្ងៃទី​១៤ ខែមករា ឆ្នាំ​២០២៣ សម្ដេចចៅហ្វា​វាំង វរវៀងជ័យ អធិបតី​ស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួង​ព្រះបរមរាជវាំង ជា​ព្រះរាជតំណាង​ដ៏​ខ្ពង់ខ្ពស់ ព្រះ​អ​ម្ចាស់ជីវិតលើត្បូង ព្រះមហាក្សត្រ នៃ​ព្រះរាជាណាចក្រ​កម្ពុជា និង​សម្តេច​ព្រះមហា​ក្យ​ត្រី ព្រះវររាជ​មាតា​ជាតិខ្មែរ ជាទីគោរព​សក្ការៈ អមដំណើរ​ដោយ​លោក គុយ សុផល ទេសរដ្ឋមន្ត្រី រដ្ឋមន្ត្រី​ទទួល​កិច្ចការ​ទូទៅ អម​ក្រសួងព្រះបរមរាជវាំង លោកស្រី កែ ច័ន្ទ​មុនី តំណាងរាស្ត្រ​មណ្ឌល​កំពង់ឆ្នាំង និង​លោក ស៊ុន សុ​វណ្ណា​រិ​ទ្ធិ អភិបាល​នៃ គណៈ​អភិបាលខេត្ត សមាជិក​ក្រុមប្រឹក្សា​ខេត្ត អភិបាលរង​ខេត្ត នាយក​រដ្ឋបាលខេត្ត គណៈ​អភិបាលស្រុក និង​ប្រតិភូ​អមដំណើរ បាន​នាំយក​ព្រះរាជ​អំណោយ​ដែលជា ព្រះរាជទាន​ដ៏​ថ្លៃថ្លា ទៅ​ចែកជូន​ប្រជារាស្ត្រ ដែល​ទទួលរង​គ្រោះ​ដោយ​ជំនន់ ទឹកភ្លៀង​រដូវប្រាំង ស្ថិតនៅ​ឃុំ​៥ នៃ​ស្រុក​សាមគ្គី​មានជ័យ ខេត្តកំពង់ឆ្នាំង ចំនួន ២១២ គ្រួសារ ។​

​បើតាម​ការ​ឱ្យដឹងពី​លោក ឈួន ចាន់ណា អភិបាល​នៃ​គណៈ​អភិបាលស្រុក​សាមគ្គី មានជ័យ​ថាៈ ប្រជាពលរដ្ឋ​រងគ្រោះ​ធម្មជាតិ ដោយ​ជំនន់​ទឹកភ្លៀង មកពី​ឃុំ​ត្បែងខ្ពស់ ចំនួន ១១២ គ្រួសារ​, ឃុំ​ឈានឡើង ចំនួន ៦២ គ្រួសារ​, ឃុំ​ស្វាយ​ជុក ចំនួន ២៣ គ្រួសារ​, ឃុំ​សេដ្ឋី ចំនួន ១១ គ្រួសារ​, ឃុំ​ក្រាំង​ល្វា ចំនួន ៤ គ្រួសារ​។​

​សម្ដេចចៅហ្វា​រវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួង​ព្រះបរមរាជវាំង បាន​ពាំនាំ​បណ្ដាំ​សាកសួរ​សុខទុក្ខ ពី​ព្រះអង្គ​ម្ចាស់ជីវិត​តម្កល់​លើ​ត្បូង ព្រះមហាក្សត្រ នៃ​ព្រះរាជាណាចក្រ​កម្ពុជា និង​សម្ដេចព្រះ​មហាក្សត្រី ព្រះ​រាជមាតា​ជាតិខ្មែរ ជាទី​សក្ការៈ បាន​ចូលរួម​សោកស្តាយ​ដល់​កូនចៅ ចៅទួត​ទាំងអស់ ដែល​កំពុង​ជួប នូវ​គ្រោះធម្មជាតិ ជំនន់​ទឹកភ្លៀង សូមឱ្យ​បងប្អូន​កូនចៅ​ទាំងអស់ ថែរក្សា​នៅ​សុខភាព ការរស់នៅ មាន​អនាម័យ​ស្អាត គ្រា​ដែល​ទឹកជំនន់​ទឹកភ្លៀង កំពុង​រាតត្បាត​នៅ​តំបន់ របស់ខ្លួន​។​

​អភិបាលស្រុក​សាមគ្គី​មានជ័យ បាន​ឲ្យ​ដឹងថាៈ ព្រះរាជ​អំណោយ​ដែល​បាន នាំយកមក​ចែក ជូន​ប្រជារាស្ត្រ ក្នុង​មួយ​គ្រួសារ ទទួលបាន​អង្ករ ចំនួន ៥០ គីឡូក្រាម​, តង់​ចំនួន​១, ឃី​ត​ចំនួន​១ (​មី​ជាតិ ២​កេស​, អាវយឺត​១ , មុង​១, សារុង​១, ភួយ​១, ក្រមា​១ , ម៉ាស់​១​ប្រអប់​) និង​ថវិកា​ចំនួន ៤០០.០០០ រៀល ។​

​ដោយឡែក គ្រួសារ​ដែល​បាន​បាត់បង់​ជីវិត ដោយសារ​គ្រោះទឹកជំនន់ ចំនួន​មួយ នាក់ ទទួលបាន​អង្ករ ចំនួន ៥០ គីឡូក្រាម តង់​ចំនួន​១. ឃី​ត​ចំនួន​១ កញ្ចប់ (​មាន​មី​ជាតិ ២ កេស , អាវយឺត​១ , មុង​១, សារុង​១ , ភួយ​១, ក្រមា​១ , ម៉ាស់​១​ប្រអប់​) និង​ថវិកា​ចំនួន ៨០០.០០០ រៀល​៕/V​