​ប្រែ​សម្រួលៈ​បំណង​(​ដេល្លី​ម៉េល​)៖ អ៊ីរ៉ង់​នៅ​ថ្ងៃ​សៅរ៍​នេះ​បាន​និយាយថា ខ្លួន​បាន​ប្រហារជីវិត​ជនជាតិ​អង់គ្លេស​ដើមកំណើត​អ៊ីរ៉ង់​ម្នាក់ ដែល​ធ្លាប់ធ្វើ​ជា​មន្ត្រី​ជាន់ខ្ពស់​នៅ​ក្រសួង​ការពារជាតិ​អ៊ីរ៉ង់ ទោះជា​អន្តរ​​ជាតិ​បាន​ព្រមាន​អោយ​បញ្ឈប់​ទោស​ប្រហារជីវិត​នេះ​ក្តី​។

​ចំណាត់ការ​នេះ​មុខ​ជា​ធ្វើអោយ​មាន​ភាព​តានតឹង​ខ្លាំង​ឡើង​ជាមួយ​លោក​ខាងលិច ចំ​ពេល​មាន​ការតវ៉ា​ទាមទារ​សិទ្ធិ​ស្ត្រី​នៅ​ទូទាំង​ប្រទេស​អ៊ីរ៉ង់​​ក្រោយ​ការស្លាប់​ស្ត្រី​ម្នាក់​នៅ​កន្លែង​ឃុំឃាំង​របស់​ប៉ូលីស​អ៊ីរ៉ង់​។​

​អង់គ្លេស​ដែល​ហៅ​ករណី​ប្រឆាំង​លោក​អា​លី​រ៉េ​ហ្សា អាក​បារី​(Alireza Akbari)ថាក្រោមហេតុផល​នយោបាយ និងបាន​ថ្កោលទោស​ការប្រហារជីវិត​នេះ​។

​នាយករដ្ឋមន្ត្រី​អង់គ្លេស​លោក រី​ស៊ី ស៊ូ​ណាក់ បាន​ហៅ​វា​ថា​ជា​«​អំពើ​កំសាក​និង​គ្មាន​មេត្តា ធ្វើឡើង​ដោយរ​ប​បព្រៃផ្សៃ​មួយ​ដែល​មិន​គោរព​សិទ្ធិមនុស្ស​របស់​ប្រជាជន​ផ្ទាល់​របស់​ខ្លួន​»​។​

​ទីភ្នាក់ងារ​សារព័ត៌មាន​Mizan របស់​អ៊ីរ៉ង់​បាន​រាយការណ៍​អំពី​ការប្រហារជីវិត​នេះ​កាលពីដើម​ថ្ងៃ​សៅរ៍ តែ​មិន​បាន​បញ្ជាក់ថា​ការប្រហារជីវិត​នេះ​ត្រូវបាន​ធ្វើឡើង​នៅពេល​ណា​ទេ​។​

​ការប្រហារជីវិត​នេះ​នឹង​កាន់តែ​បន្ថែម​សម្ពាធ​លើ​ទំនាក់ទំនង​មិន​ល្អ​របស់​រដ្ឋាភិបាល​ក្រុងតេអេ​រ៉ង់​និង​លោក​ខាងលិច ដែល​បាន​ធ្លាក់ចុះ​ដុនដាប​ខ្លាំង​ចាប់តាំងពី​កិច្ច​ពិភាក្សា​ដើម្បី​ស្តារ​កិច្ចព្រមព្រៀង​​នុយក្លេអ៊ែរ​ឆ្នាំ​២០១៥​បាន​ជាប់គាំង និង​អាជ្ញាធរ​អ៊ីរ៉ង់​បាន​ធ្វើ​ការបង្ក្រាប​លើ​ការតវ៉ា​ប្រឆាំង​ចាប់តាំងពី​ឆ្នាំ​មុន​មក​។​

​ទីភ្នាក់ងារ​សារព័ត៌មាន​Mizan​បាន​និយាយថា​«​អា​លី​រ៉េ​ហ្សា អាក​បារី ត្រូវបាន​ប្រហារជីវិត​ចំពោះ​អំពើ​ពុករលួយ​និង​អំពើ​ប្រឆាំង​សន្តិសុខ​ក្នុង​និង​ក្រៅប្រទេស តាមរយៈ​លបលួច​យក​ការណ៍​អោយ​សេវា​​ស៊ើបការណ៍​របស់​រដ្ឋាភិបាល​អង់គ្លេស​»​។​

​អាក​បារី ត្រូវបាន​ចាប់ខ្លួន​នៅ​ឆ្នាំ​២០១៩ ចំពោះ​ការទទួល​ប្រាក់​ជាង​២​លាន​ដុល្លារ​សំរាប់​ការងារ​ចារ​កម្ម​។​

​សារព័ត៌មាន​អ៊ីរ៉ង់​ក៏​បាន​និយាយថា អាក​បារី បាន​ដើរ​តួនាទី​មួយ​នៅក្នុង​ការធ្វើឃាត​អ្នកវិទ្យាសាស្ត្រ​នុយក្លេអ៊ែរ​ជាន់ខ្ពស់​អ៊ីរ៉ង់​លោក​ហ្វា​ករី​ហ្សា​ដេះ​(Fakhrizadeh)​នៅ​ឆ្នាំ​២០២០​។​ទោះជាយ៉ាងណា ក្នុង​ការសួរចម្លើយ ​លោក​មិន​បាន​សារភាព​ថា​ជាប់​ពាក់ព័ន្ធ​ក្នុង​ឃាតកម្ម​នេះ​ទេ តែ​ថា​ភ្នាក់ងារ​អង់គ្លេស​ម្នាក់​បាន​សុំ​ព័ត៌មាន​អំពី​លោក​ហ្វាក​រី​ហ្សា​ដេះ​។​

​លោក​អា​លី​រ៉េ​ហ្សា អាក​បារី ជា​មនុស្ស​ជំនិត​នឹង​លោក អា​លី សាម​ខា​នី​(Ali Shamkhani)​ដែល​ឥឡូវ​ជា​លេខា​ក្រុមប្រឹក្សា​សន្តិសុខ​ជាតិ​ជាន់ខ្ពស់​អ៊ីរ៉ង់​និង​ជា​រដ្ឋមន្ត្រី​ការពារ​ជាតិ​ចាប់ពី​ឆ្នាំ​១៩៩៧​ដល់​២០០៥ នៅពេលដែល​លោក​អាក​បារី ធ្វើ​ជា​អនុប្រធាន​របស់​គាត់​។​

​តាមពិត​អាក​បារី បានស្ថិតក្រោម​ការ​តាម​ឃ្លាំ​មើល​របស់​ក្រសួង​ស៊ើបការណ៍​អ៊ីរ៉ង់​និង​ត្រូវបាន​ចាប់ខ្លួន​នៅ​ឆ្នាំ​១៩៩៨​។​នៅ​ឆ្នាំ​២០០៨​ត្រូវបាន​ចាប់ខ្លួន​ជា​ថ្មី​ចំពោះ​ការធ្វើ​ចារកម្ម មុន​ត្រូវ​បាន​ដោះលែង​ក្រោម​​លក្ខខណ្ឌ​បង់ប្រាក់​ធានា​ខ្លួន​និង​បាន​ចាកចេញ​ពី​ប្រទេស​មុនត្រូវបានចាប់ខ្លួនជាថ្មី៕

​អា​លី​រ៉េ​ហ្សា អាក​បារី ត្រូវបាន​ប្រហារជីវិត ចំពោះ​ការធ្វើ​ចារកម្ម​អោយ​អង់គ្លេស​