ប្រែ​សម្រួលៈ​បំណង​(​វ៉េ​អិន​អិច​ស្ព្រេ​ស​)៖ ចិន​បាន​និយាយថា មនុស្ស​ជិត​៦០.០០០​នាក់​បាន​ស្លាប់​ដោយកូវី​ដ​១៩​នៅ​តាម​មន្ទីរពេទ្យ​គិត​ចាប់តាំងពី​ខ្លួន​បាន​ឈប់​ប្រើ​គោលនយោបាយ​សូន្យ​កូវី​ដ​កាលពីដើម​​ខែ​ធ្នូ ឆ្នាំ​២០២២ ។​

​វា​ជា​ចំនួន​ស្លាប់​ដោយ​ជំងឺឆ្លង​នេះ​ខ្ពស់​ខ្លាំង​បើ​ធៀប​នឹង​តួលេខ​ផ្លូវការ​កាលពី​មុន​ៗបន្ទាប់​ពី​ចិន​រង​ការរិះគន់​ខ្លាំង​អំពី​ការផ្សាយ​ទិន្នន័យ​ស្តីពី​ស្ថានការណ៍​កូវី​ដ​១៩​នៅក្នុង​ប្រទេស​ខ្លួន ជា​ពិសេស​ពាក់ព័ន្ធ​​នឹង​ការស្លាប់​ដោយកូវី​ដ​១៩ ខណៈ​ដែល​មន្ទីរពេទ្យ​ជោរជន់​ដោយ​អ្នកជំងឺ​ហើយ​កន្លែង​តម្កល់​និង​បូជ្ញា​សព​មមាញឹ​កខ្លាំង តែ​តួលេខ​ស្លាប់ដោយកូវី​ដ​ផ្លូវការ​ទាប​ខ្លាំងទៅវិញ​។​

​ចិន​បាន​រាយការណ៍​ថា​មនុស្ស​ជិត​៦០.០០០​នាក់​បាន​ស្លាប់​ដោយកូវី​ដ​១៩​នៅ​តាម​មន្ទីរពេទ្យ​គិត​ចាប់តាំងពី​ថ្ងៃ​៨​ធ្នូ ឆ្នាំមុន​

​ចា​វ យ៉ាវី​( Jiao Yahui) ប្រធានការិយាល័យ​រដ្ឋ​បាល​វេជ្ជសាស្ត្រ​នៅក្រោម​គណៈកម្មាធិការ​សុខាភិបាល​ជាតិចិន បាន​ប្រាប់​សន្និសីទកាសែត​មួយ​កាលពី​ថ្ងៃ​សៅ​រ៍ថា រវាង​ថ្ងៃ​៨​ធ្នូ និង​១២​មករា ចំនួន​អ្នក​​ជំងឺ​កូវី​ដ​១៩​ស្លាប់​នៅ​តាម​មន្ទីរពេទ្យ​ចិន មាន​ចំនួន​សរុប​៥៩.៩៣៨​នាក់ ហើយ​អ្នក​ស្លាប់​ភាគច្រើន​អាយុ​ខ្ទង់​៨០​ឆ្នាំ​។​

​លោកស្រី​បាន​បញ្ជាក់ថា ៥.៥០៣​នាក់​ស្លាប់​ដោយ​ជំងឺ​ផ្លូវដង្ហើម​ដោយសារកូ​វីដ នៅពេល​៥៤.៤៣៥​នាក់​ទៀត​ស្លាប់​ដោយ​ជំងឺ​គួបផ្សំ​ផ្សេងៗក្នុងពេល​កើតកូ​វីដ ហើយ​អ្នក​ស្លាប់​៩០,១​ភាគរយ​មាន​អាយុ​៦៥​ឆ្នាំ​ឡើង​។​

​សូមបញ្ជាក់​ថា ចិន​ចេញផ្សាយ​តួលេខ​ស្លាប់​ដោយកូវី​ដ​១៩​ចុង​ក្រោយ​កាលពី​ថ្ងៃ​ចន្ទ ហើយ​កាលពី​ខែ​មុន​ពួក​មន្ត្រី​បាន​និយាយថា ខ្លួន​មាន​ផែនការ​រាយការណ៍​ចំនួន​ស្លាប់​និង​ឆ្លងកូវី​ដ​មួយ​ខែ​ម្តង​ជំនួស​អោ​​យ​ការចេញផ្សាយ​រាល់ថ្ងៃ​។​

​អាជ្ញាធរ​នៅ​មួយ​ខែ​មកនេះ​បាន​រាយការណ៍​អ្នក​ស្លាប់​ដោយកូវី​ដ​ក្នុង​មួយ​ថ្ងៃ​បួន​ប្រាំ​នាក់ ជា​តួលេខ​ដែល​មិន​ស៊ីគ្នា​នឹង​ទិដ្ឋភាព​នៅ​កន្លែង​តម្កល់​និង​បូជ្ញា​សព ព្រមទាំង​អ្នកជំងឺ​នៅ​តាម​មន្ទីរពេទ្យ​។​

​នៅពេល​អ្នកជំនាញការ​សុខភាព​បាន​ព្រមាន​ថា ចិន​អាច​មាន​អ្នក​ស្លាប់​ដោយកូវី​ដ​១៩​ដល់​ទៅ​១​លាន​នាក់​នៅ​ឆ្នាំនេះ អាជ្ញាធរ​សុខាភិបាល​ចិន​បាន​រាយការណ៍​ចំនួន​មនុស្ស​ស្លាប់​ដោយ​ជំងឺ​នេះ​មានត្រឹមតែ​​ជាង​៥.០០០​នាក់​ចាប់​តាំងពី​ពេល​ផ្ទុះ​កូវី​ដ​១៩​ដំបូង នៅមុន​ចិន​ជួប​ការផ្ទុះ​ជំងឺ​នៅ​មួយ​ខែ​មកនេះ​។​

​កាលពី​ថ្ងៃ​សៅរ៍​នេះដែរ អង្គការ​សុខភាព​ពិភពលោក​(WHO)​បាន​ទទូច​សុំ​អោយ​ចិន​ចែករំលែក​ព័ត៌មាន​លម្អិត​អំពី​ស្ថានការណ៍​កូវី​ដ​១៩​បន្ទា​ប់ពី​រដ្ឋាភិបាល​ទីក្រុង​ប៉េកាំ​ង​បាន​រាយការណ៍​ថា​មនុស្ស​ជិត​៦០.០០០​នាក់​ស្លាប់​ពាក់ព័ន្ធ​នឹង​កូវី​ដ​១៩​ចាប់តាំងពី​ដើម​ខែ​មុន​មក​។​

​ក្នុង​កិច្ច​ពិភាក្សា​ជាមួយ​បណ្ឌិត ម៉ា ស៊ា​វ​​វ៉េ​(Ma Xiaowei) នាយក​គណៈកម្មាធិការ​សុខាភិបាល​ជាតិចិន ​នាយក​WHO​លោក តេ​ដ្រូ​ស អាត​ហាណូម ហ្គេ​ប្រេ​យេស៊ូ​ស បានបញ្ជាក់​អះអាង​ឡើងវិញ​អំពី​សារសំខាន់​នៃ​កិច្ច​សហការ​របស់​ចិន​កាន់តែខ្លាំង​ឡើង​ព្រមទាំង​តម្លាភាព។

​នៅពេល​រដ្ឋាភិបាល​ក្រុង​ប៉េកាំ​ង​បាន​រាយការណ៍​ថា វីរុស​បំ​ប្លែងខ្លួន BA.5.2 និង BF.7​កំពុង​ធ្វើ​ចរាចរណ៍​នៅក្នុង​ប្រទេស​ខ្លួន អង្គការ​WHO​បាន​ស្នើសុំ​ទិន្នន័យ​បន្ថែម​ពី​ចិន រួម​មាន​ព័ត៌មាន​ស្តីពី​ការ​​វិវត្តន៍​របស់​វីរុស​ផង​៕

​អ្នកជំងឺ​ជោរជន់​មន្ទីរពេទ្យ តែ​ចិន​នៅ​មិន​ទាន់​រកឃើញ​វីរុស​បំ​ប្លែងខ្លួន​ថ្មី ការ​គំរាម​អំពី​ការវិវត្តន៍​របស់កូ​វីដ​១៩​នៅឡើយ​ទេ​