ដោយៈ សម្បត្តិ / ភ្នំពេញៈ រហូតដល់វេលាថ្ងៃត្រង់ ថ្ងៃទី១៥ ខែមករា ឆ្នាំ២០២៣ នេះ កម្លាំងនាយកដ្ឋាននគរបាលព្រហ្មទណ្ឌ បានបំបែកសំណុំរឿងឃាតកម្មមួយ ពាក់ព័ន្ធនឹងករណីរឿង ប្រពន្ធបានជួលឃាតក ១ពាន់ដុល្លារ ឱ្យសម្លាប់ប្ដីខ្លួនឯង ហើយជាមួយនេះ ជនដៃដល់ដែលស៊ីឈ្នួល សម្លាប់ជនរងគ្រោះ ក៏បានត្រូវចាប់ខ្លួន យកមកផ្ដន្ទាទោសតាមច្បាប់ ។
សមត្ថកិច្ចជំនាញ បានបង្ហើបប្រាប់ពីដំណើរ រឿងឃាតកម្មនេះថាៈ មានករណីប្រទះ ឃើញសាកសពអណ្តែត នៅក្នុងប្រឡាយទឹក នៅចំណុចភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល នៅថ្ងៃទី១៤ ខែមករា ឆ្នាំ២០២៣ ។
សាកសពជនរងគ្រោះ មានឈ្មោះ ខឹម ផល្លី ភេទប្រុស អាយុ ៣៣ ឆ្នាំ ជនជាតិខ្មែរ ស្រុកកំណេីត នៅភូមិថ្លុកដង្កា ឃុំផ្ទះរុង ស្រុកភ្នំក្រវ៉ាញ ខេត្តពោធិ៍សាត់ និងមាន ទីលំនៅបច្ចុប្បន្ន សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
បើតាមរបាយការណ៍ សមត្ថកិច្ច បានឲ្យដឹងថាៈ នៅវេលាកើតហេតុខាងលើ មានប្រជាពលរដ្ឋ បានប្រទះឃើញសពអណ្ដែតទឹកមួយ នៅក្នុងប្រឡាយទឹក វិរៈប្រាំ ដែលមានទទឹង ៦ ម៉ែត្រ ជម្រៅប្រហែល ២,៣០ ម៉ែត្រ ចំងាយពីផ្លូវល្បឿនលឿន ប្រហែល ១.០០០ ម៉ែត្រ ក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល ហើយគាត់ក៏បានរាយការណ៍ មកសមត្ថកិច្ចប៉ុស្តិ៍នគរបាល រដ្ឋបាលកំពង់ស្វាយ ។ ភ្លាមនោះ កម្លាំងប៉ុស្តិ៍បានរាយការណ៍មកជំនាញ ចុះពិនិត្យ និងវិភាគកន្លែងកើតហេតុស្រុក និងអាជ្ញាធរភូមិ ឃុំ គ្រូពេទ្យ ដើម្បីចុះមកពិនិត្យ សាកសព អណ្តែតទឹកនោះ។ ការពិនិត្យសាកសព សមត្ថកិច្ច ឃើញថា សាកសពស្លាប់ដោយសាររឹតក និង ឆក់ (ឃាតកម្ម) ។
ផ្អែកតាមចម្លេីយប្រពន្ធជនរងគ្រោះ ឈ្មោះ សាន់ ធីតា អាយុ ៣១ ឆ្នាំ ជនជាតិខ្មែរ បានសារភាពថាៈ ខ្លួននិងឈ្មោះ វី ភេទប្រុស អាយុប្រហែលជិត ៤០ ឆ្នាំ ជនជាតិខ្មែរ មុខរបរជាងសំណង់ ជាអ្នកសម្លាប់ប្តីរបស់ខ្លួន ដោយបានឆក់និងរឹតក សម្លាប់ ។
ដោយអនុវត្តតាមបទបញ្ជារបស់ នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, លោកឧត្តមសេនីយ៍ឯក ង៉េង ជួ ប្រធាននាយកដ្ឋាន នគរបាលព្រហ្មទណ្ឌ បានបញ្ជាឲ្យលោកឧត្តមសេនីយ៍ត្រី ខេង ម៉េងឈាង អនុប្រធាននាយកដ្ឋាន ដឹកនាំកម្លាំងជំនាញ សហការជាមួយស្នងការដ្ឋាននគរបាល ខេត្តកណ្ដាល ដើម្បីស្រាវជ្រាវចាប់ខ្លួនជនដៃដល់។
រហូតដល់វេលាថ្ងៃត្រង់ ថ្ងៃទី១៥ ខែមករា ឆ្នាំ២០២៣ នេះ កម្លាំងនាយកដ្ឋាន នគរបាលព្រហ្មទណ្ឌ បានចាប់ខ្លួនជនដៃដល់ ឈ្មោះ វី ដែលស៊ីឈ្នួលសម្លាប់ ជនរងគ្រោះ ក្នុងតម្លៃ ១.០០០ ដុល្លារ ពីប្រពន្ធជនរងគ្រោះ ។
បច្ចុប្បន្ន ជនដៃដល់ និងប្រពន្ធជនរងគ្រោះ ត្រូវបានប្រគល់ជូនស្នងការដ្ឋាន នគរបាល ខេត្តកណ្ដាល ដើម្បីចាត់ការបន្ដ តាមនីតិវិធី៕/V
ឈ្មោះ វី អាយុប្រហែលជិត ៤០ ឆ្នាំ ជនជាតិខ្មែរ មុខរបរជាងសំណង់ ជាអ្នកសម្លាប់ប្តីរបស់ឈ្មោះ សាន់ ធីតា ដោយបានឆក់និងរឹតក
