​ប្រែ​សម្រួលៈ​បំណង​(​ដេល្លី​ម៉េល​,ស្ត្រេតថែមស៍)៖ យន្តហោះ​ដឹក​អ្នកដំណើរ​មួយ​ជាមួយនឹង​មនុស្ស​៧២​នាក់​នៅក្នុង​វា​បាន​ធ្លាក់​នៅ​ក្បែរ​អាកាសយានដ្ឋាន​អន្តរជាតិ​ប៉ូ​ខា​រ៉ា​(Pokhara)​របស់​ប្រទេស​នេ​ប៉ាល់ នេះ​បើ​តាម​​កាសែត​Kathmandu Post​បាន​រាយការណ៍​កាលពី​ថ្ងៃអាទិត្យ​។​

​កាសែត​បាន​និយាយថា យន្តហោះ​ដឹក​អ្នកដំណើរ​៦៨​នាក់ និង​សមាជិក​យន្តហោះ​បួន​នាក់ រួមមាន​ជនបរទេស​ដប់​នាក់​។​

​នាយករដ្ឋមន្ត្រី ពូ​ស​ប៉ា កា​ម៉ាល់ ដា​ហាល់​(Pushpa Kamal Dahal)​បាន​និយាយថា យន្ត​បាន​ហោះ​ចេញ​ពី​រដ្ឋធានី​ក​ដ្ឋ​មណ្ឌូ​(Kathmandu)​ទៅ​កាន់​ក្រុង​ប៉ូ​ខា​រ៉ា នៅនេ​ប៉ាល់​ភាគកណ្តាល​ពេលវា​​ធ្លាក់​។​លោក​បាន​អំពាវនាវ​អោយ​បុគ្គលិក​សន្តិសុខ​និង​សាធារណជន​ជួយ​ការងារ​ជួយសង្គ្រោះ និង​បាន​កោះប្រជុំ​គណៈរដ្ឋមន្ត្រី​គ្រាអាសន្ន​មួយ​។​

​រូបថត​និង​វីដេអូ​ក្នុង​បណ្តាញ​សង្គម​បង្ហាញ​កំសួល​ផ្សែងហុយ​ចេញពី​កន្លែង​ធ្លាក់​យន្តហោះ នៅ​ពេល​ពួក​អ្នក​ជួយ​សង្គ្រោះ​និង​ហ្វូងមនុស្ស​ចោល​រោម​ខ្មោច​យន្តហោះ​។​

​ព័ត៌មាន​ពិស្តារ​អំពី​ចំនួន​ស្លាប់​និង​របួស​មនុស្ស​ពី​គ្រោះថ្នាក់​ធ្លាក់​យន្តហោះ​នេះ​នៅ​មិន​ទាន់​បញ្ចេញ​អោយដឹង​នៅឡើយ​ទេ​រីឯ​មូលហេតុ​នៃ​ការធ្លាក់​ក៏​គេ​នៅ​មិនទាន់​ដឹង​ផង​ដែរ​។​តែ​របាយការណ៍​ជំហាន​​ដំបូង​អះអាងថា យ៉ាងហោច​ណាស់​មនុស្ស​៤០​នាក់​បាន​ស្លាប់​ក្នុងការ​ធ្លាក់​យន្តហោះ​កាលពី​ថ្ងៃអាទិត្យ​។​

​យន្តហោះ​ATR 72 ដែល​ហោះ​ពី​ក្រុងក​ដ្ឋ​មណ្ឌូ​ទៅ​ប៉ូខារ៉ា ធ្លាក់​នៅ​ទីក្រុង​ប៉ូ​ខា​រ៉ា

​យន្តហោះ​ATR72​កង្ហារ​ពីរ​នេះ​ត្រូវបាន​គេ​និយាយថា​មាន​អាយុកាល​ប្រើ​១៥​ឆ្នាំ​មកហើយ​

​សូមបញ្ជាក់​ថា​គ្រោះថ្នាក់​ធ្លាក់​យន្តហោះ​មិន​ជា​រឿង​ចម្លែក​ទេ​នៅនេ​ប៉ាល់ កន្លែង​ដែល​មាន​ភ្នំ​ខ្ពស់បំផុត​ចំនួន​ប្រាំបី​ក្នុងចំណោម​ភ្នំ​ខ្ពស់​បំផុត​ចំនួន​១៤​លើ​លោក រួម​មាន​ភ្នំ​អេ​វើ​រ៉េស នៅ​ពេល​អាកាសធាតុ​ក្នុ​​ង​ប្រទេស​នេះ​ផ្លាស់ប្តូរ​ភ្លាមៗ ដែល​បង្ក​ស្ថានភាព​គ្រោះថ្នាក់​សំរាប់​អាកាសចរណ៍​។​ឧស្សាហកម្ម​អាកាសចរណ៍នេ​ប៉ាល់​បាន​រីកចំរើន​នៅ​ប៉ុន្មាន​ឆ្នាំ​មកនេះ ដោយ​វា​ដឹក​ទំនិញ​និង​មនុស្ស ព្រមទាំង​អ្នកទេសចរ​​បរទេស​និង​ពួក​អ្នក​ឡើង​ភ្នំ តែ​ត្រូវ​ញាំញី​ដោយ​សុវត្ថិភាព​អន់​ដោយសារតែ​មិន​មាន​ការហ្វឹកហាត់​និង​ថែទាំ​ជួសជុល​គ្រប់គ្រាន់​។​

​ដោយសារ​ព្រួយបារម្ភ​អំពី​សុវត្ថិភាព​នេះ សហភាព​អឺរ៉ុប​បាន​ហាម​មិន​អោយ​យន្តហោះ​ទៅ​ពី​ក្រុមហ៊ុន​អាកាសចរណ៍នេ​ប៉ាល់​ទាំងអស់​ចូល​ក្នុង​ដែ​នអាកាស​ខ្លួន​ទេ​។​

​ពួក​ការី​អាកាសចរណ៍​ក៏បាន​និយាយថា ប្រទេស​នៃ​តំបន់​ហេមពាន្ត​នេះ​ក៏​ខ្វះ​ហេដ្ឋារចនាសម្ពន្ធ​ព្យាក​រណ៍​អាកាសធាតុ​ត្រឹមត្រូ​វ ជាពិសេស​សំរាប់​តំបន់​ដាច់ស្រយាល​ជាមួយនឹង​សណ្ឋាន​ដីភ្នំ​។​

​រំលឹកថា កាលពី​ខែ​ឧសភា​ឆ្នាំ​២០២២ មនុស្ស​ទាំង​២២​នាក់ រួម​មាន​ជនបរទេស​ប្រាំមួយ​នាក់ នៅក្នុង​យន្តហោះ​នេ​ប៉ាល់​មួយ បាន​ស្លាប់​ពេល​វា​ធ្លាក់​។​កាលពី​ឆ្នាំ​២០១៨​យន្តហោះ​មួយ​ក៏​បាន​ធ្លាក់​ពេល​ចុះចត​​នៅ​អាកាសយានដ្ឋាន​អន្តរជាតិ​មួយ​ក្បែរ​ក្រុងក​ដ្ឋ​មណ្ឌូ ដោយ​សម្លាប់​មនុស្ស​៥២​នាក់​៕