ដោយៈ ដកស្រង់​ពី​វចនានុក្រម​សម្តេច​សង្ឃរាជ ជួន ណាត​

​ក្រពុលបាយ​

​នាមសព្ទ​

​ឈ្មោះ​ត្រី​ស្រកា​មួយ​ប្រភេទ សន្ដាន​ត្រី​ឆ្កោក​, តែ​សម្បុរ​ស​ស្លាំង​បន្តិច​
​ត្រី​ក្រពុលបាយ ។​

​ខ្ញី​

នាមសព្ទ​

​ឈ្មោះ​ប្រទាល​មួយ​ប្រភេទ សន្ដាន​នឹង​រំដេង បរិភោគ​ជា​អាហារ ឬ ធ្វើជា​ថ្នាំកែរោគ​បាន ។​

​គុណសព្ទ​

​ដែលមាន​ម្រាមដៃ ឬ ម្រាមជើង​ក្រញរ​ស្រដៀង​នឹង​មើម​ខ្ញី​
​ម្រាមដៃ​ខ្ញី​, ម្រាមជើង​ខ្ញី ។​

​ខ្យង​

​នាមសព្ទ​

​ឈ្មោះ​សត្វ​សន្តាន​នឹង​ស័ង្ខ សំបក​សន្ដាន​ខ្ចៅ​តែ​រូប​ធំ​ជាង​ខ្ចៅ​ជាង​គ្រែង ខ្លះ​មាន​ពុកមាត់​, ខ្លះ​គូទ​ស្រួច​, ខ្លះ​ទាល​; គូទ​ស្រួច​ហៅ ខ្យងគូទស្រួច​, គូទ​ទាល​ហៅថា ខ្យងគូទទាល​, មាន​ទឹកជា​លំនៅ​ខ្លះ​, នៅលើ​គោក​ខ្លះ ។ ស្រុក​ខ្លះ​ហៅ ខ្ច​ង ព្រោះ​គេ​យល់ថា​គូ​នឹង ខ្ចៅ​, គេ​និយាយថា ខ្ច​ង​ខ្ចៅ​, ប៉ុន្ដែ​តាមពិត ខ្យង នេះ​ប្រើ​មក​យូរណាស់​ហើយ ។​

​ខ្វិត​

​នាមសព្ទ​

( បា​. ក​បិ​ដ្ឋ គួរ​សរសេរ កិ្វ​ដ្ឋ ) ឈ្មោះ​ឈើ​មាន​ផ្លែ​បរិភោគបាន សន្ដាន​នឹង​ក្រសាំង ។ ខ្វិត​មាន​ពីរ​ប្រភេទ គឺ ខ្វិត​ធំ មាន​ផ្លែ​ធំៗ ; ខ្វិត​តូច ឬ ខ្វិត​ធម្មតា មាន​ផ្លែ​តូចៗ​។​

​នាមសព្ទ​

​ពន្លាក​តូច​សម្រាប់​ជាង​ឆ្លាក់ ។​

​កិរិយាវិសេសន៍​

​ពាក្យ​សម្រាប់​ចម្រើន​ពាក្យ​ឱប​, ពាក្យ​កៀវ​ឲ្យ​ប្លែក​ឡើង​
​ឱប​ខ្វិត គឺ​ឱប​ជាប់​, ជិត​, ស្និទ្ធ ។​

​គីង្គក់​

​នាមសព្ទ​

​ឈ្មោះ​សត្វ​ពួក ១ រាង​អើត​មុខ ស្បែក​គគ្រាត សន្ដាន​នឹង​កង្កែប តែ​នៅលើ​គោក ។ ប្រទាល​មួយ​យ៉ាង​មាន​សណ្ឋាន​បែប​គីង្គក់ ហៅថា ប្រទាល​គីង្គក់ ។​