​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ មនុស្ស​យ៉ាង​តិច​៦៨​នាក់​បាន​ស្លាប់​កាលពី​ថ្ងៃអាទិត្យ​ទី​១៥​មករា នៅពេល​ដែល​ជើងហោះហើរ​ក្នុងស្រុក​របស់​ក្រុមហ៊ុន​អាកាសចរណ៍ Yeti Airlines បាន​ធ្លាក់​នៅ​ទីក្រុង​ប៉ូ​ខា​រ៉ា (Pokhara) ក្នុងប្រ​ទេសនេ​ប៉ាល់ ជាការ​ធ្លាក់​យន្តហោះ​ដ៏​អាក្រក់​បំផុត​ក្នុង​រយៈពេល​បី​ទសវត្សរ៍​នៅក្នុង​ប្រទេស​តូច​មួយ​នៃ​តំបន់​ភ្នំ​ហេមពាន្ត​មួយ​នេះ​។​

​ក្រុម​អ្នក​ជួយសង្គ្រោះ​រាប់រយ​នាក់​បាន​រុករក​តាម​ជម្រាល​ភ្នំ កន្លែង​ដែល​ជើងហោះហើរ​ដែល​ដឹក​មនុស្ស​ចំនួន ៧២ នាក់​មក​ពី​រដ្ឋធានី​ក​ដ្ឋ​មណ្ឌូ​បាន​ធ្លាក់​។​

​ក្រុមមន្ត្រី​បាន​បិទ​ប្រតិបត្តិការ​ស្វែងរក​សម្រាប់​ល្ងាច​ថ្ងៃ​អាទិត្យ ដោយ​និយាយថា ពួកគេ​នឹង​បន្ត​រុករក​អ្នកបាត់ខ្លួន៤នាក់ទៀតនៅ​ថ្ងៃ​ចន្ទ​នេះ​។​

​វីដេអូ​ពី​ទូរទស្សន៍​ក្នុងស្រុក​មុននេះ​បាន​បង្ហាញ​ក្រុម​អ្នក​ជួយសង្គ្រោះ​កំពុង​រុករក​ផ្នែក​ដែល​ខូច​នៃ​យន្តហោះ​។ ដី​ខ្លះ​នៅ​ជិត​កន្លែង​ធ្លាក់​ត្រូវ​ភ្លើង​ឆេះ​ខ្ទេចខ្ទី ដោយ​អណ្តាតភ្លើង​អាច​មើលឃើញ​យ៉ាងច្បាស់​។​

​អាកាសធាតុ​មាន​ភាពល្អប្រសើរ​ធម្មតា ហើយ​គេ​មិនទាន់​អាច​បញ្ជាក់​ពី​មូលហេតុ​នៃ​ការធ្លាក់​យន្តហោះ​បានទេ​។​

​បណ្តាញ​សុវត្ថិភាព​អាកាសចរណ៍​បានបង្ហាញ​ថា វា​ជា​ការធ្លាក់​យន្តហោះ​ដ៏​សាហាវ​បំផុត​របស់នេ​ប៉ាល់​ចាប់តាំងពី​ឆ្នាំ ១៩៩២ នៅពេល​ដែល​យន្តហោះ Airbus A300 របស់​ក្រុមហ៊ុន​អាកាសចរណ៍​អន្តរជាតិ​​ប៉ា​គី​ស្ថាន​បាន​ធ្លាក់​លើ​ភ្នំ​ពេល​ហោះ​ទៅ​កាន់​ទីក្រុង​ក​ដ្ឋ​មណ្ឌូ ដោយ​សម្លាប់​មនុស្ស​ទាំង ១៦៧ នាក់​នៅ​លើ​នោះ​៕

​មនុស្ស​យ៉ាង​តិច​៦៨​នាក់​បាន​ស្លាប់​កាលពី​ថ្ងៃអាទិត្យ​ទី​១៥​មករា នៅពេល​ដែល​ជើងហោះហើរ​ក្នុងស្រុក​របស់​ក្រុមហ៊ុន​អាកាសចរណ៍ Yeti Airlines បាន​ធ្លាក់​នៅ​ទីក្រុង​ប៉ូ​ខា​រ៉ា