​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ យ៉ាងហោច​ណាស់​មនុស្ស​១០​នាក់​បាន​ស្លាប់ និង ៣៩​នាក់​រង​របួស​កាលពី​ថ្ងៃអាទិត្យ​ទី​១៥​មករា​ក្នុង​ការវាយប្រហារ​ដោយ​គ្រាប់បែក​លើ​ព្រះវិហារ​មួយកន្លែង​​នៅ​ភាគ​ខាងកើត​នៃ​សាធារណរដ្ឋ​ប្រជាធិបតេយ្យ​កុង​ហ្គោ ដែល​អះអាង​ទទួលខុសត្រូវ​ដោយ​ក្រុម​ជី​ហាដ រដ្ឋ​អ៊ីស្លាម​។​

​អ្នកនាំពាក្យ​យោធា​កុង​ហ្គោលោ​ក អាន​ថូ​នី មូលូ​សាយី (Antony Mualushayi) បាន​និយាយថា “​អំពើ​ភេរវកម្ម​” បាន​កើត​ឡើង​នៅក្នុង​ព្រះវិហារ​ប្រូតេ​ស្តង់​មួយ​ក្នុង​ទីប្រជុំជន​កា​ស៊ីន​ឌី (Kasindi)​ភាគ​ខាងជើង​ខេត្ត​គី​វូ (Kivu) នៅ​ជាប់​ព្រំដែន​ជាមួយ​ប្រទេស​អ៊ូ​ហ្គង់​ដា​។​

​លោក​បាន​បន្ថែមថា ការផ្ទុះ​បាន​សម្លាប់​មនុស្ស​យ៉ាងហោចណាស់ ១០ នាក់ និង​របួស ៣៩ នាក់ តែ​តួលេខ​នេះ​គឺ​បណ្ដោះអាសន្ន​ប៉ុណ្ណោះ​។​

​ប៉ុន្តែ​អ្នកនាំពាក្យ​សម្រាប់​ប្រតិបត្តិការ​យោធា​របស់​អ៊ូ​ហ្គង់​ដានៅកុង​ហ្គោ លោក ប៊ី​ឡាល់ កា​តាម​បា (Bilal Katamba) បាន​និយាយ​កាលពី​ល្ងាច​ថ្ងៃអាទិត្យ​ថា មនុស្ស ១៦​នាក់​ត្រូវបាន​សម្លាប់​នៅក្នុង​​ការ​បំផ្ទុះ​នេះ និង ២០ នាក់​ទៀត​រងរបួស​។​

​លោក​បាន​បន្ថែមថា “​ជន​វាយប្រហារ​បាន​ប្រើ​គ្រាប់បែក IED ដើម្បី​អនុវត្ត​ការវាយប្រហារ ហើយ​យើង​សង្ស័យថា ក្រុម ADF គឺជា​អ្នក​នៅ​ពីក្រោយ​ការវាយប្រហារ​”​។​

​ទីភ្នាក់ងារ​សារព័ត៌មាន AFP មិន​អាច​បញ្ជាក់​ដោយ​ឯករាជ្យ​អំពី​ចំនួន​អ្នក​ស្លាប់​បាន​នោះ​ទេ​។​

ADF គឺជា​ក្រុម​មួយ​ក្នុងចំណោម​ក្រុម​ប្រដាប់អាវុធ​ដ៏​កាច​សាហាវ​បំផុត​ជាង ១២០ នៅ​ភាគ​ខាងកើត​កុង​ហ្គោ​ដែល​ក្រុម​ភាគច្រើន​កើតចេញ​ពី​កេរដំណែល​នៃ​សង្គ្រាម​នៅ​ដើម​សតវត្ស​ទី​២១​នៅ​ក្នុងប្រ​​ទេស​ក្រីក្រ​ដ៏​ធំ​ល្វឹងល្វើយ​មួយ​នេះ​។​

​ក្រុម​នេះ​ត្រូវបាន​ចោទប្រកាន់​ថា​បានសម្លាប់​ជន​ស៊ីវិល​កុង​ហ្គោ​រាប់ពាន់​នាក់​និង​ធ្វើ​ការវាយប្រហារ​ដោយ​គ្រាប់បែក​នៅ​អ៊ូ​ហ្គង់​ដា​។ អ្នក​ប្រយុទ្ធ​របស់ ADF​ក៏​ធ្លាប់​បាន​បង្កប់​គ្រាប់បែក​នៅ​តាម​ទីក្រុង​​នានា​នៅ​ខេត្ត​គី​វូ​ភាគ​ខាងជើង​នា​ពេលកន្លងមក​ផងដែរ​។​

​កាលពី​ល្ងាច​ថ្ងៃអាទិត្យ ក្រុម​រដ្ឋ​អ៊ីស្លាម​បាន​អះអាង​ទទួលខុសត្រូវ​ចំពោះ​ការវាយប្រហារ​នេះ ហើយ​និយាយ​ថា “​មនុស្ស​ជិត ២០ នាក់​” ត្រូវបាន​សម្លាប់ នេះ​បើ​យោង​តាម​ក្រុម​ជំនាញ​ខាង​ឃ្លាំ​មើល​មួយ ហៅថា ក្រុម​ចារកម្ម Site​។​

​អ្នកនាំពាក្យ​កងទ័ព​លោក​មូលូ​សាយី​បាន​និយាយថា ជនសង្ស័​យកេន​យ៉ាម្នា​ក់​ត្រូវបាន​ចាប់ខ្លួន​បន្ទាប់ពី​ការវាយប្រហារ​នេះ​៕

កុង​ហ្គោ​បាន​ដាក់ខេត្ត​គី​វូ​ក្រោម​ការត្រួតត្រា​របស់​យោធា​ដើម្បី​កម្ទេច​ក្រុម​ប្រដាប់អាវុធ​ជាច្រើន​នៅ​ទីនោះ