​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អាជ្ញាធរ​បាន​និយាយ​កាលពី​ថ្ងៃអាទិត្យ​ទី​១៥​មករា​ថា មនុស្ស​យ៉ាង​តិច ២៧ នាក់​បាន​ស្លាប់​នៅក្នុង​ព្យុះ​នៅ​ទូទាំង​ប្រទេស​ហ្វីលីពីន​ក្នុង​ខែ​នេះ​ខណៈ​អ្នក​ព្យាករណ៍​​អាកាសធាតុ​បាន​ព្រមាន​អំពី​ភ្លៀង​ធ្លាក់​ខ្លាំង​នៅក្នុង​ប្រទេស​ដែល​ងាយ​រងគ្រោះ​ដោយ​គ្រោះមហន្តរាយ​ធម្មជាតិ​មួយ​នេះ​។​

​ភ្លៀង​ធ្លាក់​ខ្លាំង​និង​ទឹកជំនន់​បាន​ញាំញី​កោះ​ភាគ​ខាងត្បូង​និង​ភាគ​កណ្តាល​របស់​ប្រទេស​ចាប់តាំងពី​ចុង​សប្តាហ៍​បុណ្យ​ណូអែល ដោយ​បង្ខំ​មនុស្ស​រាប់សែន​នាក់​ឱ្យ​ភៀសខ្លួន​ចេញពី​ផ្ទះសម្បែង​របស់​ពួកគេ​។​

​ការិយាល័យ​ការពារ​ជន​ស៊ីវិល​បាន​និយាយ​នៅក្នុង​របាយការណ៍​មួយ​កាលពី​ថ្ងៃអាទិត្យ​ថា​ចាប់តាំងពី​ដើមឆ្នាំ ២០២៣​មក ព្យុះ​ចំនួន​បី​បាន​សម្លាប់​មនុស្ស ២៧ នាក់​នៅ​ទូទាំង​ប្រទេស​។​

​មនុស្ស​១១​នាក់​ត្រូវបាន​រាយការណ៍​ថា​បាន​រងរបួស​និង​បីនាក់​កំពុង​បាត់​ខ្លួន​។​

​ទីភ្នាក់ងារ​ព្យាករណ៍​អាកាសធាតុ​រដ្ឋ Pagasa បាន​ព្រមាន​កាលពី​ថ្ងៃអាទិត្យ​អំពី​ភ្លៀង​ធ្លាក់​ខ្លាំង​នៅ​ឧបទ្វីប​ប៊ី​ខូ​ល (Bicol)​និង​ខេត្ត​ក្វេ​ហ្សុន (Quezon) នៅ​ចុង​ភាគខាងត្បូង​នៃ​កោះ​លូ​ហ្សុន (Luzon)​។​

Pagasa បាន​និយាយ​នៅក្នុង​ការណែនាំ​មួយ​ថា “​នៅក្រោម​ស្ថានភាព​ទាំងនេះ ទឹកជំនន់​និង​ការ​រអិល​បាក់​ដី ដែល​បណ្តាល​មក​ពី​ភ្លៀង​ទំនង​ជា​កើតឡើង​នៅតាម​តំបន់​ខ្ពស់ៗ​…​និង​តំបន់​ងាយ​រង​​គ្រោះធម្មជាតិ​”​។​

​យោង​តាម​ការិយាល័យ​ការពារ​ជន​ស៊ីវិល​បានឱ្យដឹងថា មនុស្ស​ជាង ៨៣.០០០ នាក់​កំពុង​ជ្រកកោន​នៅ​ក្នុង​មជ្ឈមណ្ឌល​ជម្លៀស ហើយ​ផ្ទះ​ជាង ១.២០០ ខ្នង​ត្រូវបាន​ខូចខាត​ដោយសារ​ទឹកជំនន់​និង​ភ្លៀង​ធ្លាក់​ខ្លាំង​៕

​សមាជិក​ឆ្មាំ​សមុទ្រ​ហ្វីលីពីន​ជួយ​អ្នកស្រុក​ដែល​រងគ្រោះ​ដោយ​ទឹកជំនន់​នៅក្នុង​ទីក្រុង Lamitan ប្រទេស​ហ្វីលីពីន កាលពី​ថ្ងៃទី​១១ ខែ​មករា ឆ្នាំ​២០២៣