​ប្រែ​សម្រួលៈ​បំណង​(​ដេល្លី​ម៉េល​)៖​ជនរងគ្រោះ​ដំបូងៗ​ពី​ការវាយប្រហារ​ដោយ​កាំជ្រួច​រុស្ស៊ី​លើ​ប្លុក​អាគារ​មនុស្ស​រស់​នៅមួយ​ត្រូវ​បាន​រាយ​ឈ្មោះ​នៅពេល​ចំនួន​មនុស្ស​ស្លាប់​ពី​ការវាយប្រហារ​មួយ​ប្រាវ​កាលពី​ថ្ងៃ​សៅរ៍​​បាន​កើន​ដល់​៣០​នាក់​មក​ទល់​ពេល​នេះ​ខណៈ​ពួក​អ្នក​ជួយ​សង្គ្រោះ​និង​ស្វែងរក​បាន​បន្ត​ខិតខំ​ស្វែងរក​អ្នក​នៅ​មាន​ជីវិត​និង​សាកសព​បន្ថែម​ក្នុង​អាកាសធាតុ​ត្រជាក់​ដល់​កក​។​

​បុគ្គលិក​គ្រាអាសន្ន​បាន​និង​កំពុង​ធ្វើកា​រទាំ​ង​ថ្ងៃ​ទាំងយប់​លើ​គំនរ​អាគារ​បាក់បែក​នៅ​ក្រោយ​ការវាយប្រហារ​ដោយ​កាំជ្រួច​រុស្ស៊ី​នៅ​ទីក្រុង​ដ្នី​ប្រូ​ភាគកណ្តាល​របស់​អ៊ុយ​ក្រែ​ន​កាលពី​យប់​ថ្ងៃ​សៅរ៍​។​

​ប្រធានាធិបតី​អ៊ុយ​ក្រែនលោក​វ៉ូ​ឡូឌី​មៀ ហ្សេ​ឡេន​ស្គី បាន​និយាយថា​មនុស្ស​៧៣​នាក់​បាន​រងរបួស និង​៣៩​នាក់​ត្រូវបាន​ជួយសង្គ្រោះ​តាំងពី​មុន​មក នៅពេល​អាជ្ញាធរ​ក្រុង​បាន​និយាយថា មនុស្ស​៤៣​នាក់​​ទៀត​កំពុង​បាត់​ខ្លួន​។​

​មន្ត្រី​អ៊ុយ​ក្រែ​នក្នុងពេល​ជាមួយគ្នាបា​ន​បង្ហោះ​រូបភាព​បុគ្គលិក​ជួយសង្គ្រោះ​បាន​រកឃើញ​និង​ទាញ​ចេញ​អ្នក​នៅ​មាន​ជីវិត​ពី​គំនរ​អាគារ​។​អភិបាល​តំបន់​លោក វ៉ាឡេ​នទីន រ៉េ​ហ្ស៍​នី​ឆេន​កូ​(Valentyn Reznichenko)​បាន​និយាយថា ក្មេង​ចំនួន​ប្រាំពីរ​នាក់​ត្រូវបាន​ជួយ​សង្គ្រោះ​និង​នាំ​ទៅកាន់​មន្ទីរពេទ្យ​ដោយសារ​របួស​។​

​យោង​តាម​យោធា​អ៊ុ​យក្រែន កាំជ្រួចដែល​ធ្លាក់ត្រូវចំ​អាគា​ស​នេះ​គឺ​Kh-22​បាញ់​ដោយ​កងកម្លាំង​រុស្ស៊ី​ចេញពី​តំបន់ឃឺស​(Kursk)​នៅ​រុស្ស៊ី​។​ប្លុក​អាគារ​ទាំងមូល​បាក់​ទៅ​ជា​គំនរ​ថ្ម​នៅពេល​កំណាត់​ដែល​ឆេះ​រោល​ប៉ើង​​ទៅកាន់​វិថី​ក្បែរ​នោះ​។​

​បុគ្គលិក​ជួយសង្គ្រោះ​ប្រើ​រថយន្ត​ស្ទូច​និង​ត្រាក់ទ័រ​ចូ​កនៅ​គំនរ​ប្លុក​អាគារ​ដែល​បាក់​ក្រោយ​ត្រូវ​កាំជ្រួចរុស្ស៊ី​កាលពី​យប់​ថ្ងៃ​សៅរ៍​នៅ​ពេល​ជនរងគ្រោះ​ខ្លះ​ប្រើ​ភ្លើង​ចេញពី​ទូរស័ព្ទដៃ​របស់​គេ​ដើម្បី​អោយសញ្ញាសុំ​ជំនួយ​​សង្គ្រោះ​។​

​បុគ្គលិក​អគ្គិភ័យ​ក៏​ត្រូវបាន​បញ្ជូន​ចូល​ដើម្បី​ពន្លត់ភ្លើង​ដែល​ឆេះ​ក្រោយ​ការវាយប្រហារ នៅ​ពេល​អ្នក​ជួយ​សង្គ្រោះ​ចាប់ផ្តើម​ជីក​កាយ​រក​ជនរងគ្រោះ ទាំង​ស្លាប់​និង​អ្នក​នៅ​មាន​ជីវិត​។​

​ការវាយប្រហារ​តាម​ផ្លូវអាកាស​មួយ​ប្រាវ​ធំ​កាលពី​ថ្ងៃ​សៅរ៍​ក៏​បានសំដៅ​រដ្ឋធានី​គៀវ និង​ទីក្រុង​ខា​គី​វ​នៅ​ប៉ែក​ឦសាន ដោយ​បញ្ចប់​ការ​ស្ងប់ស្ងាត់​អស់​ពេល​ពីរ​សប្តាហ៍​។​

​បើតាម​មេទ័ព​អ៊ុ​យក្រែន រុស្ស៊ី​បាន​បាញ់​កាំជ្រួច​៣៣​ដើម​កាលពី​ថ្ងៃ​សៅរ៍ ក្នុងនេះ​២១​ដើម​ត្រូវ​បាន​បាញ់​ទម្លាក់​។​

​ក្នុងពេល​ជាមួយគ្នា ក្រសួងការពារជាតិ​រុស្ស៊ី​មិន​បាន​និយាយ​អំពី​ការវាយប្រហារ​នៅក្រុ​ងដ្នី​ប្រូ​ទេ តែ​ថា​«​គោលដៅ​កំណត់​ទុក​ទាំងអស់​ត្រូវ​បាន​វាយប្រហារ​»​នៅពេល​ប្រធានាធិបតី​រុស្ស៊ី​លោកពូ​ទីន​បាននិយាយ​​ថា​ប្រតិបត្តិការ​យោធា​ពិសេស​កំពុង​បង្ហាញ​និន្នាការ​វិជ្ជមាន​មួ​យ​និង​លោក​សង្ឃឹមថា ទាហាន​រុស្ស៊ី​នឹង​ដណ្តើមបាន​ទឹក​ដី​បន្ថែម​ក្រោយ​ការ​វាយ​យក​បាន​ទីប្រជុំជន​សូ​ឡេ​ដា​(Soledar)៕

​បុគ្គលិក​ជួយសង្គ្រោះ​អ៊ុយ​ក្រែន​ស្ទូច ជីក​និង​កាយ​ថ្ម​ចេញ​ដើម្បី​រក​ជនរងគ្រោះ​នៅ​គំនរ​អាគារ​ធំ​មួយ​នៅ​ក្រុង​ដ្នូ​ប្រូ ក្រោយ​ការវាយប្រហារ​របស់​រុស្ស៊ី​កាលពី​យប់​ថ្ងៃ​សៅរ៍​