​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ បេ​ក្ខ​នារី​បវរកញ្ញា​ចក្រវាល​មក​ពី​ប្រទេស​អែល​សាល់​វ៉ាឌ័​របាន​ឡើង​លើ​ឆាក​ក្នុង​សប្តាហ៍​នេះ ដោយ​ស្លៀកពាក់​ឈុត​កាក់​មាស​ដែល​បំផុសគំនិត​ដោយ​លុយ​អេឡិចត្រូ​​និច Bitcoin ដើម្បី​រំលឹក​ដល់​ប្រទេស​របស់​នាង ដែល​បាន​ក្លាយជា​ប្រទេស​ដំបូង​គេ​របស់​ពិភពលោក​ដែល​ទទួល​យក​រូបិយប័ណ្ណ​អេឡិចត្រូនិចឬ​គ្រីបតូជា​លុយ​ស្របច្បាប់​កាលពីពីរ​ឆ្នាំមុន​។​

​រាជ​នី​សម្រស់​អែល​សាល់​វ៉ាឌ័​រ នាង អាឡេ​ចាន​ដ្រា ហ្គា​ចា​ដូ (Alejandra Guajardo) ដែល​ចូលរួម​ប្រកួតប្រជែង​ក្នុង​ព្រឹត្តិការណ៍​ប្រចាំ​ឆ្នាំ​លើក​ទី ៧១​របស់​កម្មវិធី​ប្រឡង​បវរកញ្ញា​សកល​មួយ​នេះ​​នៅ​ទីក្រុង​ញូ​វ​អ័​រ​លីន (New Orleans)​សហរដ្ឋ​អាម៉េរិក​កាលពី​ថ្ងៃ​សៅរ៍ បាន​ចែករំលែក​រូបថត​និង​វីដេអូ​របស់​នាង​នៅក្នុង​ឈុត​សម្លៀក​បំពាក់​នេះ​នៅលើ Instagram​កាលពី​ល្ងាច​ថ្ងៃ​ពុធ​សប្តាហ៍​​មុន ដែល​អម​ជាមួយ​ស្បែកជើង​កវែង​ពណ៌​មាស​។​

​នៅក្នុង​ចំណងជើង​នៃ​សារ​បង្ហោះ​នោះ នាង​ហ្គា​ចា​ដូ​បាន​សរសើរ​ស្រុកកំណើត​របស់​នាង​ជា “​ប្រទេស​ដែល​មាន​ចក្ខុវិស័យ​ពិតប្រាកដ​នៃ​ការផ្លាស់ប្តូរ​ជា​វិជ្ជមាន​សម្រាប់​អនាគត​” ខណៈ​កោតសរសើរ​ការសម្រេច​ចិត្ត ដែល​រង​ការរិះគន់​យ៉ាង​ខ្លាំង​របស់​រដ្ឋាភិបាល​ក្នុង​ការទទួលយក Bitcoin ជា​រូបិយប័ណ្ណ​ស្របច្បាប់​ក្នុង​ឆ្នាំ ២០២១ រួម​ជាមួយ​ប្រាក់​ដុល្លារ​អាម៉េរិក​។​

​រចនា​ដោយ​មិត្ត​រួម​ជាតិ​អែល​សាល់​វ៉ាឌ័​ររបស់​នាង​ឈ្មោះ ហ្វ្រង់​ស៊ី​ស្កូ ហ្គេ​រ៉េរ៉ូ (Francisco Guerrero) ឈុត “​សម្លៀកបំពាក់​ជាតិ​” សម្រាប់​ការប្រឡង​បវរកញ្ញា​នេះ​គឺ​គ្របដណ្តប់​ដោយ​កាក់​មាស Bitcoin កាក់​ខូឡុន (Colon) និង​គ្រាប់​កា​កាវ​។​

​កាក់​ខូឡុន​គឺជា​រូបិយវត្ថុ​ក្នុងស្រុក​រយៈពេល​មួយ​សតវត្សរ៍ ដែល​បាន​បញ្ចប់​ក្នុង​ឆ្នាំ ២០២១ នៅពេល​ដែល​ប្រាក់​ដុល្លារ​អាម៉េរិក​ត្រូវបាន​អនុម័ត​ឱ្យប្រើ​ស្របច្បាប់​។ នៅ​សម័យបុរាណ គ្រាប់​កា​កាវ​ត្រូវបាន​ប្រើ​ជា​ប្រាក់​នៅ​ទូទាំង​តំបន់​មេ​សូ​អាម៉េរិ​កា (Mesoamerica)៕

​នាង អាឡេ​ចាន​ដ្រា ហ្គា​ចា​ដូ គ្រង​ឈុត​កាក់ Bitcoin សម្រាប់​កម្មវិធី​ប្រឡង​បវរកញ្ញា​ចក្រវាល​នៅ​ទីក្រុង​ញូ​វ​អ័​រ​លីន