​ប្រែ​សម្រួល : កញ្ញា​ដា​លី​ស (​ស៊ីនហួ​) ៖​ក្រុមបាតុករ​រាប់រយ​នាក់​មកពី​ទីក្រុង​ញូវយ៉ក​និង​តំបន់​ក្បែរ​នោះ​បាន​ប្រមូលផ្តុំ​គ្នា​និង​ដើរ​ក្បួន​ដង្ហែ​នៅ​ឯ​ទីលាន Times Square កាលពី​ថ្ងៃ​សៅរ៍​ដើម្បី​ប្រឆាំង​នឹង​​ការចូលរួម​របស់​ស​ហ​រដ្ឋ​អាម៉េរិក​នៅក្នុង​សង្គ្រាម​នៅ​ក្រៅប្រទេស​។​

​អ្នកចូលរួម​បាន​និយាយ​ប្រឆាំងនឹង​ការពង្រីក​វាតទី​របស់​អង្គការ​ណា​តូ​និង​បាន​អំពាវនាវ​ឱ្យ​មាន​សន្តិភាព​ក្នុង​ប្រទេស​អ៊ុ​យក្រែន ដោយ​រិះគន់​ការចំណាយ​ដ៏​ច្រើន​សម្បើម​របស់​អាម៉េរិក​លើ​វិបត្តិ​អ៊ុ​យក្រែន និង​ការប្រកាស​របស់​សេត​វិមាន​ដើម្បី​ផ្តល់​ឱ្យ​រដ្ឋាភិបាល​ក្រុង​គៀវ​នូវ​ខែល​មី​ស៊ី​លបាញ់​ពី​ដី​ទៅ​អាកាស Patriot មួយ​ផ្សេង​ទៀត​។​

​លោក ប្រាយ​អែន បេក​ឃើ (Brian Becker)​នាយក​ជាតិ​នៃ​សម្ព​ន្ធ ANSWER ដែល​ជា​សម្ពន្ធ​ប្រឆាំង​សង្គ្រាម​ដ៏​សំខាន់​នៅ​សហរដ្ឋ​អាម៉េរិក បាន​និយាយថា “​យើង​នៅ​ទីនេះ​នៅថ្ងៃនេះ​ដោយសារ​យើង​​ប្រឆាំង​នឹង​ការពង្រីក​វាតទី​គ្មាន​ទី​បញ្ចប់​របស់​អង្គការ​ណា​តូ ដែល​មិន​ត្រឹមតែ​មិន​ចាំបាច់​ប៉ុណ្ណោះ​ទេ តែ​ថែមទាំង​ខ្ជីខ្ជា​និង​គឃ្លើន​ទៀតផង​”​។​

​លោក​បេក​ឃើ​បាន​ប្រាប់​ស៊ីនហួ​នៅ​ខាងក្រៅ​ការប្រមូលផ្តុំ​គ្នា​នេះ​ថា ជាជាង​បង្កើន​សង្គ្រាម​និង​បញ្ជូន​អាវុធ​បន្ថែម​ទៅ​អ៊ុ​យក្រែន សហរដ្ឋ​អាម៉េរិក​គួរតែ​ត្រឡប់​ទៅ​តុ​ចរចា​វិញ ហើយ​ទទួលស្គាល់ថា រុស្ស៊ី​មាន​ការព្រួយបារម្ភ​ផ្នែក​សន្តិសុខ​ដោយ​ស្របច្បាប់​។​

​លោក​បេក​ឃើ ដែល​ជំរុញ​ប្រទេស​របស់​លោក​ឱ្យ​ចំណាយ​ប្រាក់​ទាំងនោះ​ដើម្បី​ជួយ​ប្រជាជន​អាម៉េរិក​ដែល​ខ្វះខាត​ជាជាង​ផ្តល់​មូលនិធិ​ដល់​សង្គ្រាម​និង​យោធានិយម បាន​និយាយថា​”​យើង​ក៏​នៅ​ទី​នេះ​នៅ​​ថ្ងៃនេះ​ដែរ ដោយសារ​សហរដ្ឋ​អាម៉េរិក​កំពុង​ចំណាយ​បន្ថែម ៦៥ ពាន់​លាន​ដុល្លារ​ដើម្បី​ផ្តល់​មូលនិធិ​ដល់​សង្គ្រាម​នៅ​អ៊ុ​យក្រែន ខណៈ​មាន​មនុស្ស​គ្មាន​ផ្ទះសម្បែង​មួយ​លាន​នាក់​នៅ​អាម៉េរិក​និង​ខណៈដែល​​សាលារៀន​របស់​យើង​ខ្វះ​ថវិកា ហើយ​មនុស្ស​ជាច្រើន​កំពុង​ក្ស័យធន​ដោយសារ​ពួកគេ​មិន​អាចមាន​លទ្ធភាព​ចំណាយ​លុយ​លើ​ដុក​ទ័រ​”​។​

​ផ្តួចផ្តើមឡើង​ដោយ​សម្ពន្ធ ANSWER និង​វេទិកា​ប្រជាជន ដែល​ជា​កន្លែង​បណ្តុះ​ចលនា​សម្រាប់​វណ្ណៈ​កម្មករ​និង​សហគមន៍​ខ្វះខាត ការប្រមូលផ្តុំ​នេះ​ត្រូវ​គេ​រំពឹងថា​នឹង​ត្រូវ​តាម​ពីក្រោយ​ដោយ​ការតវ៉ា​ស្រដៀង​គ្នា​នៅក្នុង​ទីក្រុង​ផ្សេង​ទៀត​របស់​សហរដ្ឋ​អាម៉េរិក​នៅមុន​ទិវា Martin Luther King Jr. នៅ​ថ្ងៃ​ចន្ទ​នេះ​៕

​បាតុករ​រាប់រយ​នាក់​មកពី​ទីក្រុង​ញូវយ៉ក​និង​តំបន់​ក្បែរ​នោះ​បាន​ប្រមូលផ្តុំ​គ្នា​និង​ដើរ​ក្បួន​ដង្ហែ​ប្រឆាំងនឹង​ការចូលរួម​របស់​សហ​រដ្ឋ​អាម៉េរិក​នៅក្នុង​សង្គ្រាម​នៅ​ក្រៅប្រទេស​នៅ​ឯ​ទីលាន Times Square កាលពី​ថ្ងៃ​សៅរ៍

​អាម៉េរិក​កំពុង​ចំណាយ​បន្ថែម ៦៥ ពាន់​លាន​ដុល្លារ​ដើម្បី​ផ្តល់​មូលនិធិ​ដល់​សង្គ្រាម​នៅ​អ៊ុ​យក្រែន ខណៈ​មាន​មនុស្ស​គ្មាន​ផ្ទះសម្បែង​មួយ​លាន​នាក់​នៅ​អាម៉េរិក​