​ប្រែ​សម្រួល : កញ្ញា​ដា​លី​ស (VNExpress) ៖ គ្រូបង្វឹក លោក ផាក ហាង​សូ (Park Hang-seo) បាន​ស្តីបន្ទោស​ខ្លួនឯង បន្ទាប់​ពី​វៀតណាម​បាន​ចាញ់​វគ្គ​ផ្តាច់ព្រ័ត្រ AFF Cup ក្រោម​ថ្វីដៃ​ថៃ ០-១​។​

​លោក​ផា​កបាន​និយាយ​នៅក្នុង​សន្និសីទ​សារព័ត៌មាន​ក្រោយ​ការប្រកួត​កាលពី​ថ្ងៃ​ចន្ទ​ថា “​ដំបូង​និង​សំខាន់បំផុត ខ្ញុំ​ចង់​អបអរសាទរ​ដល់​ថៃ​និង​គ្រូបង្វឹក​ផូល​ឃី​ង (Polking)​។ ខ្ញុំ​ពិតជា​ចង់​ឈ្នះ​ពាន​នេះ​ជា​កាដូ​សម្រាប់​អ្នកគាំទ្រ ប៉ុន្តែ​ខ្ញុំ​មិន​អាច​ធ្វើបាន​ទេ​។ ខ្ញុំ​សោកស្ដាយ​ចំពោះ​រឿង​នោះ​ណាស់​”​។​

​គ្រូបង្វឹក​វ័យ​៦៥​ឆ្នាំ​រូប​នេះ​បាន​និយាយថា “​លទ្ធផល​ថ្ងៃនេះ​មិន​ដូច​ការរំពឹងទុក​ទេ ព្រោះ​ខ្ញុំ​មិនល្អ​គ្រប់គ្រាន់​ឡើយ​។ សម្រាប់​កីឡាករ ពួកគេ​បាន​ព្យាយាម​អស់​ពី​សមត្ថភាព ជា​ពិសេស​ពេល​ដែល​ពួកគេ​ត្រូវ​លេង​ជា​ភ្ញៀវ​។ ខ្ញុំ​សង្ឃឹមថា​អ្នកគាំទ្រ​នឹង​បន្ត​គាំទ្រ​ពួកគេ​ជំនួស​ឱ្យ​ការរិះគន់​ពួកគេ​”​។​

​បន្ទាប់​ពី​ស្មើ ២-២ នៅ​ទឹកដី​ខ្លួនឯង​ក្នុង​ជើង​ទីមួយ​នៃ​វគ្គ​ផ្តាច់ព្រ័ត្រ​កាលពី​សប្តាហ៍​មុន វៀតណាម​ត្រូវការ​ឈ្នះ ឬ​ស្មើ ៣-៣ ឬ​ច្រើន​ជាង​នេះ​ដើម្បី​លើ​កពាន​។​

​ទោះបី​លោក​ផាក​បាន​ផ្លាស់ប្តូរ​ក្រុម​បន្តិចបន្តួច​ក្នុង​ជើង​ទី​ពីរ​ក៏ដោយ ក៏​វៀតណាម​នៅតែ​ពិបាក​រក​ប្រឡោះ​ស៊ុត​បញ្ចូល​ទី​។​

​នៅ​នាទី​ទី ២៥ អ្វីៗ​កាន់តែ​មាន​ការលំបាក​នៅពេល​ប្រធាន​ក្រុម​របស់​ថៃ​បាន​ស៊ុត​បញ្ចូល​ទី​ពី​ចម្ងាយ​។ បន្ទាប់ពី​គេ​នាំ​មុខមុន លោក​ផា​កបាន​ប្តូរ​ខ្សែប្រយុទ្ធ​ស្រួច​បំផុត​របស់​គាត់​ដើម្បី​រក​គ្រាប់​បាល់​តាម​ស្មើ ប៉ុន្តែ​វៀតណាម​នៅតែ​មិន​អាច​រក​គ្រាប់​បាល់​បាន​។​

​ជាមួយ​នឹង​បរាជ័យ​នេះ លោក​ផាក ដែល​ការ​កាន់​តំណែង​របស់​គាត់​ជាមួយនឹង​ក្រុម​ជម្រើសជាតិ​បាន​ចប់សព្វគ្រប់​ហើយ​នោះ មិនបាន​ធ្វើ​ដូច​អ្វី​ដែល​មនុស្ស​ជាច្រើន​សង្ឃឹមទុក​នោះទេ ៖ នោះ​គឺ​ការនិយាយ​លា​វៀតណាម​ជាមួយនឹង​ពាន​។​

​នេះ​ជា​លើក​ទី​ពីរ​ហើយ​ដែល​ក្រុម​របស់​លោក​ផាក​ចាញ់​ថៃ​ក្នុង AFF Cup​។ ពួកគេ​បាន​ធ្លាក់​ក្នុង​ការប្រកួត​កាលពី​ឆ្នាំមុន​ដោយ​ចាញ់​ថៃ ០-២ ក្នុង​វគ្គ​ពាក់កណ្តាល​ផ្តាច់ព្រ័ត្រ​។​

​លោក​ផា​កបាន​ប្រាប់​សន្និសីទ​កាសែត​ថា “​ខ្ញុំ​មិនដឹងថា​តើ​វៀតណាម​អាច​យកឈ្នះ​ថៃ​បាន​ឬ​អត់​ទេ​បន្ទាប់​ពី​ខ្ញុំ​ចាកចេញ​។ នេះ​នឹង​ក្លាយ​ជា​ការងារ​របស់​គ្រូបង្វឹក​បន្ទាប់ ប៉ុន្តែ​ខ្ញុំ​ជឿថា បាល់ទាត់​វៀតណាម​នឹង​បន្ត​រីកចម្រើន​។ ចាប់ពី​ថ្ងៃស្អែក​ទៅ ខ្ញុំ​មិនមែន​ជា​គ្រូបង្វឹក​របស់​វៀតណាម​ទៀត​ទេ ប៉ុន្តែ​ខ្ញុំ​នៅតែ​ជា​អ្នកគាំទ្រ​ក្រុម​ជម្រើស​ជាតិ និង​ក្រុម​វៀតណាម​អាយុ​ក្រោម​២៣​។ ខ្ញុំ​សង្ឃឹមថា យើង​នឹង​រក្សា​ការចងចាំ​ល្អៗ​របស់​គ្នា​ជា​រៀងរហូត​”៕

​លោក​ផាក​និយាយ​ក្នុងអំឡុង​សន្និសីទកាសែត​ក្រោយ​ចាញ់​ថៃ​កាលពី​ថ្ងៃ​ចន្ទ