​ប្រែ​សម្រួល : កញ្ញា​ដា​លី​ស (​ស៊ីនហួ​) ៖ ខណៈ​ឧស្សាហកម្ម​រថយន្ត​ទូទាំង​ពិភពលោក​ផ្លាស់ប្តូរ​ទៅរក​អគ្គិសនី​ហើយ​ចំនួន​នៃ “​រថយន្ត​ថាមពល​ថ្មី​”​ដែល​ផលិត​ដោយ​ចិន​បាន​លក់ដាច់​ច្រើនឡើង​នៅ​ទូទាំង​​ពិភពលោក ក្រុមហ៊ុន​ផលិត​រថយន្ត​និង​អ្នក​ចែកចាយ​កាន់តែ​ច្រើនឡើង​នៅ​ទូទាំង​ទ្វីប​អឺរ៉ុប​បាន​ចាត់ទុក​ការប្រកួតប្រជែង​ពី​ក្រុមហ៊ុន​ផលិត​ចិន​ជា​ឱកាស​ជាជាង​ការគំរាមកំហែង​។​

​បន្ទាប់​ពី​ផ្អាក​អស់​រយៈពេល​ពីរ​ឆ្នាំ ព្រឹត្តិការណ៍​ពិព័រណ៍​យានយន្ត​ព្រុច​សែ​ល (Brussels Motor Show) បាន​ត្រឡប់​មក​វិញ​យ៉ាង​អស្ចារ្យ​កាលពី​ថ្ងៃទី ១៤ ខែ​មករា​។​ព្រឹត្តិការណ៍​ពាណិជ្ជកម្ម​ដ៏​មាន​​កិត្យានុភាព​លើក​ទី​១០០​នេះ​ស្វាគមន៍​ភ្ញៀវ​រហូត​ដល់​ថ្ងៃទី ២២ ខែ​មករា​។ អ្វី​ដែល​យក​មក​តាំង​បង្ហាញ​គឺ​យានជំនិះ​អគ្គិសនី​ទំនើបៗ និង​បច្ចេកវិជ្ជា E-mobility​របស់​ក្រុមហ៊ុន​ផលិត​រថយន្ត​ធំៗ​​របស់​ពិភពលោក​។​

​ក្រុមហ៊ុន​ចូល​រួមទាំង ៥៥ ក៏​មាន​ម៉ាក​រថយន្ត​អគ្គិសនី​របស់​ចិន​ផងដែរ​ដូចជា BYD, SERES, BAIC ឬ MG ។ ពួកគេ​បានបង្ហាញ​រថយន្ត​អគ្គិសនី​ទាំងស្រុង​ក៏​ដូចជា​រថយន្ត​កូនកាត់ រថយន្ត​ប្រើ​សាំង និង​រថយន្ត CNG (​ឧស្ម័ន​ធម្មជាតិ​បង្ហាប់​)​។​

​ក្រុមហ៊ុន​ផលិត​រថយន្ត​អគ្គិសនី (EV) ឈាន​មុខ​គេ​របស់​ចិន BYD បាន​នាំយក​ម៉ូ​ដែល​ចំនួន​បី​មក​ដាក់​តាំង​បង្ហាញ​គឺ​រថយន្ត ATTO 3, HAN និង TANG ប៉ុន្តែ​តំណាង​ក្រុមហ៊ុន​បាន​ប្រាប់​ទីភ្នាក់ងារ​សារព័ត៌មាន​ស៊ីន​ហួថា ម៉ូ​ដែល​ផ្សេង​ទៀត​ក៏​គ្រោង​នឹង​នាំយក​ទៅ​អឺរ៉ុប​ក្នុងពេល​ឆាប់ៗ​ផងដែរ​។​

​ក្រុមហ៊ុន BYD មាន​វត្តមាន​រួចហើយ​នៅក្នុង​ប្រទេសន័​រវែ​ស ស៊ុយអែត ដា​ណឺ​ម៉ាក ហូ​ឡង់ និង​បែលហ្ស៊ិក ហើយ​នៅ​ឆ្នាំនេះ ក្រុមហ៊ុន​ក៏​នឹង​បើក​ដំណើរការ​នៅ​អាល្លឺម៉ង់ បារាំង អេ​ស្ប៉ាញ អ៊ីតាលី ព័រ​ទុយ​ហ្គាល់ និង​ចក្រភព​អង់គ្លេស​ផងដែរ​។​

​ចាប់តាំងពី​ឆ្នាំ ២០១៥ មក ផលិតផល​រថយន្ត EV របស់​ចិន​បាន​គ្របដណ្តប់​ទីផ្សារ​ពិភពលោក​។ នៅ​ឆ្នាំ ២០២២ ប្រទេស​អាស៊ី​មួយ​នេះ​បាន​នាំចេញ​រថយន្ត​ថាមពល​ថ្មី​ជិត ៦៨០.០០០ គ្រឿង ដែល​កើនឡើង ១២០ ភាគរយ​ធៀប​នឹង​ឆ្នាំ​មុន​៕

​ក្រុមហ៊ុន​រថយន្ត​អគ្គិសនី​របស់​ចិន​ដូចជា BYD, SERES, BAIC ឬ MG បាន​នាំ​រថយន្ត​ទំនើបៗ​ជាច្រើន​ទៅ​បង្ហាញ​នៅ​បែលហ្ស៊ិក