​ប្រែ​សម្រួល : កញញា​ដា​លី​ស (​ដេល្លី​ម៉េល​) ៖ ព័ត៌មាន​លម្អិត​ដ៏​គួរឱ្យ​ភ្ញាក់ផ្អើល​នៅ​ពីក្រោយ​ការផ្ទេរ​តម្លៃ ៨៨ លាន​ផោន​របស់​កីឡាករ មី​ខា​អ៊ី​ឡូ មូ​ទ្រីក (Mykhailo Mudryk) ទៅ Chelsea ពី Shakhtar Donetsk ត្រូវបាន​បង្ហាញ​ដោយ​ក្លិប​អ៊ុ​យក្រែន​។​

​មូ​ទ្រីក ដែល​គ្រោង​នឹង​ចូលរួម​ជាមួយ​គូប្រជែង​ក្នុង​ទីក្រុង​ឡុង​ដ៍ Arsenal បែរ​ជា​ចុងក្រោយ​ផ្ទេរ​ទៅ​កាន់​កីឡដ្ឋាន Stamford Bridge កាលពី​ថ្ងៃអាទិត្យ ហើយ​ត្រូ​បាន​ក្រុម​តោ​ខៀវ​យក​​មក​បង្ហាញខ្លួន​ជា​ផ្លូវការ​ក្នុងអំឡុងពេល​ពួកគេ​ឈ្នះ​លើ Crystal Palace​។​

​បន្ទាប់ពី​ការផ្ទេរ​នេះ​បាន​ធ្វើ​រួចរាល់ ប្រធាន​ក្លិប Shakhtar លោក រី​ណាត អាក់​មេ​តូ​វ (Rinat Akhmetov) ឥឡូវ​នេះ​បាន​ផ្តល់​ព័ត៌មាន​លម្អិត​ពេញលេញ​អំពី​ការផ្ទេរ​នេះ ហើយ​បាន​បង្ហើប​ថា ក្រុម​របស់​លោក ហ្គ្រា​ហាំ ផត​ធឺ (Graham Potter) លេង​ទល់នឹង Shakhtar ក្នុង​ការប្រកួត​មិត្តភាព​នៅ​ទីក្រុង​ដូណិត​ស៍រប​ស់អ៊ុយ​ក្រែន គឺជា​ផ្នែក​នៃ​កិច្ចព្រមព្រៀង​។​

​នៅក្នុង​សេចក្តីថ្លែងការណ៍​ផ្លូវការ​មួយ​នៅលើ​វេបសាយ​របស់​ពួកគេ លោក​អាក់​មេ​តូ​វ​បានសរសេរថា “​ក្លិប FC Shakhtar បាន​ចុះហត្ថលេខា​លើ​កិច្ចព្រមព្រៀង​ចុង​ក្រោយ​ជា​មួយ Chelsea FC ដូច្នេះ​កីឡាករ​បាល់ទាត់​អ៊ុ​យក្រែន មី​ខា​អ៊ី​ឡូ មូ​ទ្រីក នឹង​បន្ត​អាជីព​របស់​គេ​ជា​មួយ​ក្រុម​តោ​ខៀវ​ក្នុង​ការប្រកួត​ជើងឯក​ថ្នាក់​ជាតិ​ខ្លាំង​បំផុត​គឺ English Premier League”​។​

“​ជា​ដំបូង​និង​សំខាន់បំផុត ខ្ញុំ​ចង់​អរគុណ​ដល់​ពិភព​ស៊ីវិល័យ​អង់គ្លេស​ទាំងមូល ដែល​បាន​ជួយ​អ៊ុ​យក្រែន​។ ថ្ងៃនេះ​យើង​អាច​និយាយ​អំពី​បាល់ទាត់​អ៊ុយ​ក្រែន​បានគឺ​ដោយសា​រកងទ័ព​អ៊ុ​យក្រែន ប្រជាជន​អ៊ុ​យក្រែន និង​ការគាំទ្រ​យ៉ាងខ្លាំង​ពី​ពិភព​ស៊ីវិល័យ​អង់គ្លេស​ទាំងមូល​។ ទាល់តែ​ចូលរួម​ប្រឹងប្រែង​ទាំងអស់គ្នា​ទើប​យើង​អាច​កម្ចាត់​បិសាច​ដែល​ចូលមក​ដល់​ផ្ទះ​យើង​”​។​

​ម្ចាស់​ក្លិប​បាន​សរសេរ​ទៀត​ថា “​ថ្ងៃនេះ​ខ្ញុំ​កំពុង​ត្រៀម​ថវិកា ២៥ លាន​ដុល្លារ (២០,៥​លាន​ផោន​) ដើម្បី​ជួយ​ទាហាន អ្នកការពារ និង​គ្រួសារ​របស់​ពួកគេ​។ ប្រាក់​នេះ​នឹង​ត្រូវ​បាន​ប្រើ​ដើម្បី​គ្របដណ្តប់​លើ​តម្រូវការ​ផ្សេងៗ​គ្នា រាប់​ពី​ការផ្តល់​ការព្យាបាល​ផ្នែក​វេជ្ជសាស្ត្រ​និង​ជំនួយ​ផ្លូវចិត្ត​រហូតដល់​ការបំពេញ​នូវ​សំណើ​ជាក់លាក់​ជាច្រើន​ទៀត​”៕

​ប្រធាន​ក្លិប Shakhtar លោក រី​ណាត អាក់​មេ​តូ​វ បរិច្ចាគ ២៥ លាន​ដុល្លារ​ដែល​បាន​ពី​ការលក់​កីឡាក​រមូ​ទ្រី​ក ដើម្បី​ជួយ​ទាហាន​អ៊ុ​យក្រែន​