​ប្រែ​សម្រួលៈ​បំណង​(​ដេល្លី​ម៉េល​,​ប្ល៊ុ​ម​ប៊ឺ​ក​)៖ ប្រធាន​ការិយាល័យ​ស្ថិតិ​ជាតិ​ចិន លោក​កាង យី​(Kang Yi)​បាន​និយាយ​កាលពី​ថ្ងៃ​អង្គារ​ទី​១៧​មករា​ថា ប្រជាជន​គួរ​កុំ​បារម្ភ​អំពី​ការធ្លាក់ចុះ​ចំនួន​ប្រជាពលរដ្ឋ​​ចិន និង​ថា​ការផ្គត់ផ្គង់​កម្លាំង​ពលកម្ម​នៅ​តែ​ហួស​សេចក្តីត្រូវការ​នៅឡើយ​ទេ​។​

​ការអះអាង​របស់​មន្ត្រី​ចិន​កើតឡើង​ចំ​ពេល​ការិយាល័យ​ស្ថិតិ​ជាតិចិន​នៅ​ថ្ងៃ​អង្គារ​នេះ​បាន​បញ្ចេញ​ទិន្នន័យ​ដោយ​បង្ហាញ​ថា​ត្រឹម​ចុងឆ្នាំ​២០២២​ ចិន​មាន​ប្រជាជន​១,៤១​ពាន់​លាន​នាក់​តិចជាង​ឆ្នាំ​២០២១​ចំនួន​៨៥០.០០០​នាក់​។​វា​កត់សំគាល់​ការធ្លាក់​ចុះ​ចំនួន​ប្រជាជន​ចិន​ជា​លើកដំបូង​គិត​ចាប់តាំងពី​ឆ្នាំ​១៩៦១ ដែល​ជា​ឆ្នាំ​ចុងក្រោយ​នៃ​មហា​វិបត្តិ​ទុរ្ភិក្ស​ក្រោម​ការដឹកនាំ​របស់​ម៉ៅ សេទុង​។​

​ចំនួន​ប្រជាពលរដ្ឋ​ចិន​បាន​ចាប់ផ្តើម​ធ្លាក់ចុះ​នៅ​ឆ្នាំ​២០២២​ជា​លើកដំបូង​ក្នុង​រយៈពេល​៦​ទសវត្សរ៍​មក​នេះ ដែល​វា​ជា​ព្រឹត្តិការណ៍​សំខាន់​ជា​ប្រវត្តិសាស្ត្រ​មួយ​សំរាប់​ប្រទេស​ដែល​មាន​សេដ្ឋកិច្ច​ធំ​បំផុត​ទី​ពីរ​​ក្នុង​លោក​មួ​យ​នេះ ហើយ​អាច​ជួប​វិបត្តិ​ប្រជាសាស្ត្រ​ធ្ងន់ធ្ងរ​មួយ​។​

​ការិយាល័យ​បាន​និយាយថា ទារក​ទារិកា​ប្រមាណ​៩,៥៦​លាន​នាក់​បាន​កើត​នៅ​ឆ្នាំ​២០២២ ដោយ​ចុះ​ពី​ចំនួន​១០,៦២​លាន​នាក់​កាល​ពី​មួយ​ឆ្នាំ​មុន ។​វា​ជា​អត្រាកំណើត​ក្មេង​ទាប​បំផុត​នៅ​ចិន​ចាប់តាំងពី​ឆ្នាំ​១៩៥០ ទោះ​ជា​រដ្ឋាភិបាល​ខិតខំ​លើកទឹកចិត្ត​អោយ​គ្រួសារ​ចិន​មាន​កូន​ច្រើន​ឡើង​ក្តី​។​

​ការិយាល័យ​បាន​បន្ថែមទៀតថា​មនុស្ស​សរុប​១០,៤១​លាន​នាក់​បាន​ស្លាប់ ដោយ​កើន​លើស​ពី​ចំនួន​ស្លាប់​ប្រមាណ​១០​លាន​នាក់​ក្នុង​មួយឆ្នាំ​នៅ​ប៉ុន្មាន​ឆ្នាំ​ចុងក្រោយ​នេះ​។​

​ចិន​បាន​ជួបកំណើន​នៃ​ការស្លាប់​ដោយកូវី​ដ​១៩​ចាប់តាំងពី​ខែ​មុន​មក​ក្រោយ​អាជ្ញាធរ​លុបចោល​វិធានការ​គ្រប់គ្រង​កូវី​ដ​ដ៏​តឹងរឹង​។​ការស្លាប់​ដោយកូវី​ដ​១៩​ច្រើន​ទៀត​ទំនងជា​នឹង​កើតមាន​នៅ​ឆ្នាំ​២០២៣​នេះ​ចំពេល​ការឆ្លង​រាលដាល​នៅ​បន្ត​កើត​មាន​ពាសពេញ​ប្រទេស​នៅ​ឡើយ​។​

​ការធ្លាក់​ចុះ​ចំនួន​ប្រជាជន​ចិន​លឿន​ជាង​ការរំពឹង​ទុក​ពី​មុន និង​អាច​បង្អាក់​ល្បឿន​កំណើន​សេដ្ឋកិច្ច​របស់​ចិន​។​ដោយសារ​តែ​ការធ្លាក់ចុះ​នេះ ចិន​ឥឡូវ​កំពុង​តស៊ូ​ខ្លាំង​ដើម្បី​វ៉ា​ដាច់​អាម៉េរិក​ជា​មហាអំណាច​​សេដ្ឋកិច្ច​លំដាប់​ទី​មួយ​លើ​លោក និងងារ​ប្រទេស​មាន​ប្រជាជន​ច្រើន​បំផុត​ក្នុង​លោក​អាច​ធ្លាក់​ទៅ​ឥណ្ឌា​ឆ្នាំនេះ​៕

​កាលពី​ឆ្នាំ​២០១៩ ទីភ្នាក់ងារ​អង្គការសហប្រជាជាតិ​មួយ​បាន​ព្យាករណ៍​ថា​ចំនួន​ប្រជាពលរដ្ឋ​ចិន​នឹង​ឡើង​ដល់​កំពូល​និង​ចុះ​មក​វិញ​នៅ​ឆ្នាំ​២០៣១ តែ​ឆ្នាំមុន​បាន​កែប្រែ​វិញ​ដោយ​ថា​ចំនួន​ខ្ពស់​បំផុ​និង​ធ្លាក់​​ចុះ​មក​វិញ​នេះ​នឹង​ចាប់ផ្តើម​នៅ​ឆ្នាំ​២០២២