​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ នៅ​កសិដ្ឋាន​មួយ​នៅ​ជិត​ទីក្រុង​ហាណូយ លោក ឡេ វ៉ាន់​ហៀន (Le Van Hien) ជ្រើសរើស​មាន់​ល្អ​បំផុត​ក្នុងចំណោម​ហ្វូង “​មាន់​ជើង​នាគ​” របស់​គាត់​ដែលជា​​ពូជ​មាន់​ជើងក្រាស់​ប៉ុន​ដុំឥដ្ឋ ដែល​អាច​លក់បាន​រហូត​ដល់ ២.០០០ ដុល្លារ​ក្នុង​មួយ​ក្បាល​។​

​ជើង​ដ៏​ក្រាស់​របស់​មាន់​សុង​តាវ (Dong Tao) ដែល​ដាក់​ឈ្មោះ​តាម​ឃុំ​មួយ​ដែល​វា​បង្កាត់​ពូជ​នៅ​ភាគ​ខាងជើង​ប្រទេស​វៀតណាម ត្រូវបាន​ចាត់ទុក​ជា​អាហារ​ដ៏​ឆ្ងាញ់​បំផុត​ហើយ​ជាពិសេស​ពេញនិយម​​ក្នុងចំណោម​អ្នក​មានទ្រព្យ​ស្តុកស្តម្ភ​ក្នុងឱកាស​បុណ្យចូលឆ្នាំថ្មី​ប្រពៃណី​វៀតណាម ដែល​ហៅថា តេត (Tet)​។​

​មាន់​ទម្ងន់​បួន​គីឡូក្រាម​ដ៏​មាន​តម្លៃ​របស់​លោក​ហៀន ដែល​ជើង​ដ៏​ធំ​សម្បើម​របស់​វា​មាន​ប្រហែល​មួយ​ភាគ​ប្រាំ​នៃ​ទម្ងន់​ខ្លួន​របស់​វា ត្រូវ​បាន​លក់​ក្នុងតម្លៃ​ប្រហែល ១៥០ ដុល្លារ​ប៉ុន្តែ​វា​តែង​មាន​តម្លៃ​ខ្ពស់​​ជាង​មុន ១០ ដង​អំឡុង​ចូលឆ្នាំថ្មី​។ មាន់​ខ្លះ​ថែមទាំង​ចូលរួម​ក្នុង​ការប្រកួត​សម្រស់​មាន់​ទៀតផង​។​

​លោក​ហៀន​បាន​ប្រាប់​ទីភ្នាក់ងារ​សារព័ត៌មាន AFP ថា គន្លឹះ​នៃ​រសជាតិ​ដ៏​ឆ្ងាញ់​របស់​មាន់​នេះ​គឺ​របប​អាហារ​ពោត​និង​ស្រូវ និង សេរីភាព​ដើរ​របស់​វា​។​

​ទោះបីជា​មេមាន់​ពង​ត្រូវបាន​រក្សា​ទុក​ក្នុង​ទ្រុង​ដែក​ក៏ដោយ ក៏ប៉ុន្តែ​មាន់​ដែល​បង្កាត់​ពូជ​សម្រាប់​យក​សាច់​ត្រូវបាន​ឱ្យ​ដើរហើរ​ក្នុង​សួន​តូច​មួយ​។​

​លោក​ហៀន ដែល​បាន​ចិញ្ចឹម​មាន់​នាគ​ជាង ១៥ ឆ្នាំ បាន​និយាយថា “​មាន់​កាន់តែ​ដើរ​ច្រើន សាច់ដុំ​កាន់តែខ្លាំង​និង​កាន់តែ​ធំ​”​។​

​សាច់​សុង​តាវ ដែល​អាច​ឡើងដល់ ១០ គីឡូក្រាម មាន​តម្លៃ​ថ្លៃ​ព្រោះ​សាច់​រប​ស់វាហាប់​ណែន​និង​មាន​រសជាតិ​ឆ្ងាញ់ មិនសូវ​មាន​ខ្លាញ់​៕

​មាន​ជើង​នាគ​របស់​វៀតណាម​ត្រូវប៉ាន់​ខ្លាំង​អាច​លក់បាន​ដល់ ២.០០០ ដុល្លារ​ក្នុង​មួយ​ក្បាល​ក្នុងឱកាស​ចូលឆ្នាំថ្មី