​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​បាន​ផ្តល់​សញ្ញា​ថា ខ្លួន​បាន​ត្រៀម​រួច​ជា​ស្រេច​ក្នុង​ការបង្កើន​ជំនួយ​យោធា​របស់​ខ្លួន​សម្រាប់​អ៊ុយ​ក្រែន​បន្ថែមទៀត ខណៈ​ចក្រភព​អង់គ្លេស​និង​អាម៉េរិក​បាន​ប្តេជ្ញា​រក្សា​ការគាំទ្រ​របស់​ពួកគេ​ក្នុងការ​តស៊ូ​ប្រឆាំង​នឹង​រុស្ស៊ី “​ជា​ដរាប​”​។​

​បន្ទាប់​ពី​កិច្ចពិភាក្សា​នៅ​ទីក្រុង​វ៉ាស៊ីនតោន​ជាមួយ​រដ្ឋមន្ត្រី​ការបរទេស​អង់គ្លេស លោក ជេ​មស៍ ក្លេ​វើលី (James Cleverly) រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន​បាន​ស្វាគមន៍​​ការសម្រេចចិត្ត​របស់​ចក្រភព​អង់គ្លេស​ក្នុង​ការផ្គត់ផ្គង់​ដល់​រដ្ឋាភិបាល​ក្រុង​គៀវ​ជាមួយនឹង​រថក្រោះ​ប្រយុទ្ធ​ដ៏​សំខាន់​របស់​កងទ័ពជើងគោក​អង់គ្លេស Challenger 2 ។​

​លោក​បាន​បញ្ជាក់ថា សហរដ្ឋ​អាម៉េរិក​នឹង​ធ្វើការ​ប្រកាស​បន្ថែម​ទៀត​នៅ​ប៉ុន្មាន​ថ្ងៃ​ខាងមុខនេះ ខណៈ​រដ្ឋមន្ត្រី​ការពារជាតិ​លោក ឡយ​អូ​ស្ទីន​គ្រោង​ធ្វើ​ជា​ម្ចាស់ផ្ទះ​កិច្ចពិភាក្សា​ជាមួយ​សម្ពន្ធមិត្ត​សំខាន់​​ៗ​នៅ​ទីក្រុង​រ៉ា​ម​ស្តា​ញ (Ramstein) ក្នុង​ប្រទេស​អាល្លឺម៉ង់​នៅ​ចុង​សប្តាហ៍​នេះ​។​

​លោក​បាន​និយាយថា “​យើង​បាន​ផ្តល់​ជា​បន្ត​នូវ​អ្វី​ដែល​អ៊ុយ​ក្រែន​ត្រូវការ ហើយ​យើង​កំពុង​ធ្វើ​វា​តាមរបៀប​ដែល​ធ្វើ​ឱ្យ​ប្រាកដថា​យើង​ឆ្លើយតប​ទៅ​នឹង​អ្វី​ដែល​កំពុង​កើតឡើង​ជាក់ស្តែង​នៅលើ​សមរភូមិ ក៏ដូចជា​ព្យាករណ៍​ថា​តើ​សង្គ្រាម​នឹង​ឆ្ពោះទៅ​ទិស​ដៅ​ណា​”​។​

“​យើង​ប្ដេជ្ញាចិត្ត​ធ្វើ​ឱ្យ​ប្រាកដ​ថា​អ៊ុយ​ក្រែន​មាន​អ្វី​ដែល​ខ្លួន​ត្រូវការ​ដើម្បី​ឈ្នះ​នៅ​សមរភូមិ​”​។​

​ខណៈ​ចក្រភព​អង់គ្លេស​បាន​សន្យា​បញ្ជូន​រថក្រោះ Challenger 2​ចំនួន​១៤​គ្រឿង ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី បាន​អំពាវនាវ​សុំ​រថក្រោះ​លោកខាងលិច​ទំនើបៗ​ចំនួន ៣០០ គ្រឿង​ដើម្បី​ឱ្យ​កងកម្លាំង​របស់​លោក​អាច​វាយលុក​ប្រឆាំងនឹង​ពួក​ឈ្លានពាន​រុស្ស៊ី​៕

​រដ្ឋមន្ត្រីការបរទេស​អង់គ្លេស លោក ជេ​មស៍ ក្លេ​វើលី ថ្លែង​នៅ​សន្និសីទកាសែត​ជាមួយ​រដ្ឋមន្ត្រី​ការបរទេស​អាម៉េរិក​លោក អាន​ថូ​នី ប្លីង​កិន នៅ​សេត​វិមាន​កាលពី​ថ្ងៃ​អង្គារ