​ប្រែ​សម្រួលៈ​បំណង​(​ដេល្លី​ម៉េល​)៖​ម៉ា​រៀ រ៉េ​ស​សា​(Maria Ressa)​ជ័យលាភី​រង្វាន់​ណូបែល​សន្តិភាព​សញ្ជាតិហ្វីលីពីន​និង​ក្រុមហ៊ុន​សារព័ត៌មាន​អន​ឡាញ​Rappler​របស់​លោកស្រី​ត្រូវបាន​តុលាការ​សំរេច​អោយ​​រួចផុត​ពី​ការចោទប្រកាន់​គេចវេស​ពន្ធ​ទាំង​បួន​ករណី​កាលពី​ថ្ងៃ​ពុធ​។​

​រ៉េ​ស​សា ដែល​ទទួល​រង្វាន​ណូបែល​ជាមួយ​អ្នកកាសែត​រុស្ស៊ី​កាលពី​ឆ្នាំ​២០២១ នៅតែ​ប្រឈម​បណ្តឹង​ព្រហ្មទណ្ឌ​ចំនួន​បី​ផ្សេងទៀត រួម​មាន​បណ្តឹង​បរិហារកេរ្តិ៍​មួយ ដែល​លោកស្រី​កំពុង​ប្តឹង​ឧទ្ធរណ៍​។​លោកស្រី​​បាន​ប្រាប់​អ្នកយកព័ត៌មាន​នៅ​ក្រៅ​តុលាការ​ថា​«ថ្ងៃនេះ ការពិត​ទទួលបាន​ជ័យជម្នះ​។​ការចោទប្រកាន់​ទាំងនេះ​មាន​ហេតុផល​នយោបាយ​។​យើង​អាច​បញ្ជាក់បាន​ថា សារព័ត៌មាន Rappler​មិនជា​​អ្នក​គេចពន្ធ​ទេ​»​។​

​ម៉ា​រៀ រ៉េ​ស​សា បង្ហាញ​ភាព​រីករាយ​ក្រោយ​តុលាការ​លុបចោល​ការចោទប្រកាន់​គេច​ពន្ធ​បួន​ករណី​ប្រឆាំង​លោក​ស្រី​

​អ្នកកាសែត​ចូល​ចិត្ត​រិះគន់​អាជ្ញាធ​រវ័យ​៥៩​ឆ្នាំ​រូប​នេះ បាននិងកំពុង​តស៊ូ​នឹង​បណ្តឹង​ហូរហែ ដែល​នាំអោយពួក​អ្នកគាំទ្រ​សារព័ត៌មាន​និយាយថា​ដោយសារតែ​លោក​ស្រី​ចូលចិត្ត​រិះគន់​មិន​សំចៃមាត់​លើ​អតីត​ត​ប្រធានា​​ធិបតី​រ៉ូ​ឌ្រី​ហ្គោ ឌុយ​ទែត​និង​សង្គ្រាម​ប្រឆាំង​ថ្នាំញៀ​ន​របស់លោក​។​លោកស្រី​ត្រូវបាន​ប្រគល់​រង្វាន់​ណូបែល​ជាមួយ​អ្នកកាសែត​រុស្ស៊ី​ចំពោះ​កិច្ចខិតខំ​របស់គេ​ដើម្បី​«​ការពារ​សេរីភាព​នៃ​ការសម្តែង​មតិ​»​។​

​ទោះ​ជា​តុលាការ​សំរេច​អោយ​រួចផុត​ពី​ការចោទប្រកាន់​ពាក់ព័ន្ធ​នឹង​ពន្ធ ក៏​សារព័ត៌មាន​Rappler​របស់​លោកស្រី​ប្រឈម​ភាពមិនប្រាកដប្រជា​។​វា​កំពុង​តស៊ូ​នឹង​បទបញ្ជា​អោយ​បិទ​ដោយសារ​រំលោភច្បាប់​​ហាម​មិន​អោយ​បរទេស​មាន​កម្មសិទ្ធិ​ក្នុង​ក្រុមហ៊ុន​ផ្សព្វផ្សាយ​ក្នុងស្រុក​។​អង្គភាព​សារព័ត៌មាន​ដែល​នៅ​ដំណើរការ​នៅឡើយ​នេះ ត្រូវបាន​ចោទប្រកាន់​ថា​អនុញ្ញាត​អោយ​ជនបរទេស​គ្រប់គ្រង​ដឹកនាំ​ពីលើ​​តាមរយៈ​ក្រុមហ៊ុនមេ​Rappler Holdings​របស់វា។​

​ក្រោម​ច្បាប់រដ្ឋធម្មនុញ្ញ​ហ្វីលីពីន ការវិនិយោគ​ក្នុង​វិស័យ​សារព័ត៌មាន​គឺ​សំរាប់តែ​ជន​ហ្វីលីពីន​ឬ អង្គភាព​ដែល​គ្រប់គ្រង​ដោយ​ហ្វីលីពីន​ប៉ុណ្ណោះ​។​

​ប្រធានាធិបតី​ហ្វីលីពីន​ថ្មី លោក​ហ្វែរ​ឌីណ​ង់ ម៉ាកូ​ស ជូនៀ បាន​និយាយ​កាលពី​ឆ្នាំមុន​ថា លោក​មិន​ជ្រៀតជ្រែក​ករណី​របស់​លោក​ស្រី​រ៉េ​ស​សា​ទេ ដោយសារ​តែ​អំណាច​ដាច់​ពីគ្នា​រវាង​រដ្ឋាភិបាល​និង​តុលាការ​៕