​ប្រែ​សម្រួល : កញ្ញា​ដា​លីស​(​ដេល្លី​ម៉េល​) ៖ បុរស​អាយុ ៣៥ ឆ្នាំ​ម្នាក់​ត្រូវបាន​ចោទប្រកាន់​ពី​បទ​វាយដំ​លើ​កីឡាករ អា​រ៉ុន រ៉ាំ​ស៍ឌែល (Aaron Ramsdale) បន្ទាប់​ពី​អ្នកចាំទី Arsenal​រូប​នេះ​ត្រូវ​​បាន​ធាក់​ពីក្រោយ​ខ្នង​នៅ​ចុងបញ្ចប់​នៃ​ជ័យជម្នះ​ក្នុងជំនួប North London Derby លើ​ក្រុម​មាន់​ខ្នាយ​មាស Tottenham ។​

​បុរស​ឈ្មោះ យ៉ូ​សេប វ៉ាត (Joseph Watts) រស់នៅ​សង្កាត់​ហ៊ែ​កនី (Hackney) នឹង​បង្ហាញ​ខ្លួន​នៅ​តុលាការ​ហាយ​បឺរី (Highbury) នៅ​ថ្ងៃទី ១៧ ខែ​កុម្ភៈ​បន្ទាប់ពី​ត្រូវបាន​ចាប់ខ្លួន​កាលពី​ថ្ងៃ​​ទី​១៦​មករា​ជុំវិញ​ការវាយប្រហារ​នៅឯ​កីឡដ្ឋាន Tottenham Hotspur កាលពី​ថ្ងៃអាទិត្យ​។​

​ក្លិប Tottenham បាន​ធ្វើការ​ជាមួយ​ក្រុម​ស៊ើបអង្កេត​បាល់ទាត់​របស់​ប៉ូលីស​ក្រុង​ឡុង​ដ៍ ដើម្បី​កំណត់​អត្តសញ្ញាណ​អ្នកគាំទ្រ ដែល​បាន​លុកលុយ​ទីលាន​ដើម្បី​ទាត់​រ៉ាំ​ស៍ឌែល​។​

​បន្ទាប់​ពី​ការប្រកួត ក្រុម Tottenham បាន​និយាយថា ពួកគេ​មាន​ការតក់ស្លុត​ចំពោះ​ការវាយប្រហារ​នេះ ហើយ​នឹង​ធ្វើការ “​ដើម្បី​ចាត់វិធានការ​ខ្លាំង​បំផុត​ដែល​អាច​ធ្វើ​ទៅ​បាន​រួម​ទាំង​ការហាមឃាត់​​ភ្លាមៗ​ពី​កីឡដ្ឋាន Tottenham Hotspur”​។​

​លោក​វ៉ាត​មិន​ស្ថិត​ក្រោម​ការ​ឃុំឃាំង​ទេ ប៉ុន្តែ​សេចក្តីថ្លែងការណ៍​របស់​ប៉ូលិស​ក្រុង​បានបញ្ជាក់​ថា គាត់​ត្រូវបាន​ចោទប្រកាន់​ពី​បទ​វាយដំ​រាងកាយ​ដោយ​ការ​ធាក់​ពីក្រោយ​ខ្នង​កីឡាករ​នៅ​ក្នុង​តំបន់​ដែល​​នៅជាប់​នឹង​តារាង​បាល់ទាត់ និង គប់​កាំជ្រួច​ទៅកាន់​កន្លែង​លេង​បាល់ទាត់ ដែល​ករណី​ទាំង​ពីរ​នេះ​គឺ​ផ្ទុយ​នឹង​ច្បាប់​បាល់ទាត់ (​បទល្មើស​ទាក់ទង​នឹង​បាល់ទាត់​) ឆ្នាំ ១៩៩១៕

យ៉ូ​សេប វ៉ាត នឹង​បង្ហាញ​ខ្លួន​នៅ​តុលាការ​ហាយ​បឺរី​នៅ​ថ្ងៃទី ១៧ ខែ​កុម្ភៈ​