​ប្រែ​សម្រួលៈ​បំណង​(Global Times)៖ ការផ្លាស់ប្តូរ​យុទ្ធសាស្ត្រ​កូវី​ដ​១៩​របស់​ចិន​បាន​ជួយ​សម្រួល​ដំណើរការ​គ្រប់គ្រង​ជំងឺឆ្លង​នេះ​អោយ​វា​ឈាន​ដល់​ចំណុច​ឆ្លង​ខ្ពស់​បំផុត​បាន​ឆាប់រហ័ស​និង​នាំអោយ​​ចិន​វិល​ទៅរក​ប្រក្រតីភាព​បាន​លឿន​ជាង​ការរំពឹង​ទុក នេះ​បើ​តាម​ការអះអាង​របស់​ឧបនាយក​រដ្ឋមន្ត្រី​ចិន​លោក លីវ ហ៊ី​( Liu He)​នៅ​វេទិកា​សេដ្ឋកិច្ចពិភពលោក​(WEF)​ក្នុង​ក្រុង​ដា​វ៉ូស​ប្រទេស​ស្វីស​​កាលពី​ថ្ងៃ​អង្គារ​។​

​ឧបនាយក​រដ្ឋមន្ត្រី​ចិន​លោក លីវ ហ៊ី ចូលរួម​វេទិកា​សេដ្ឋកិច្ចពិភពលោក​ក្នុង​ក្រុង​ដា​វ៉ូ​ស​

​ជំនួប​WEF​ប្រចាំឆ្នាំ​២០២៣ បាន​ចាប់ផ្តើម​កាលពី​ថ្ងៃ​ចន្ទ​ដោយ​នាំ​មក​វិញ​ទម្រង់​ជួបប្រជុំ​ក្រៅ​អ៊ីនធឺណិត​ជា​លើកដំបូង​ចាប់តាំងពី​ការផ្ទុះ​ជំងឺ​កូវី​ដ​១៩​កាល​ពី​បី​ឆ្នាំមុន​។​លោក​លីវ​បាន​ចែករំលែក​​ទស្សនៈ​នៃ​ការគ្រប់គ្រង​កូវី​ដ​១៩​នៅ​ចិន​បន្ទាប់ពី​ប្រទេស​លោក​ងាក​ចេញ​ពី​គោលនយោបាយ​សូន្យ​កូវី​ដ មកកាន់​ការ​ផ្តោតលើ​ការព្យាបាល​អ្នកជំងឺ​ធ្ងន់ៗ​កាលពី​ថ្ងៃ​៨​ធ្នូ ឆ្នាំ​២០២២ មុន​បន្ធូរបន្ថយ​ការ​គ្រប់​​គ្រង​កូវី​ដ​ពី​កំរិត​A​មកកាន់​កំរិត​B និង​បើក​ព្រំដែន​របស់​ខ្លួន​ឡើងវិញ​ទាំងស្រុង​កាលពី​ថ្ងៃ​៨​មករា​។​

​យោង​តាម​លោក​លីវ ការផ្លាស់ប្តូរ​ពី​យុទ្ធសាស្ត្រ​សូន្យ​កូវី​ដបានជួយ​សម្រួល​ដំណើរការ​គ្រប់គ្រង​កូវី​ដ​១៩​ទាំងមូល ហើយ​ក្រោយ​ការឆ្លង​កើនឡើង​ខ្លាំងប្រជាជន​ភាគច្រើន​ឥឡូវ​បាន​វិល​មក​រក​ជីវិត​ធម្មតា​វិញ​។​ការ​​ឆ្លង​ជំងឺ​កូវី​ដ​១៩​បាន​បាន​ឈាន​ដល់​ចំណុចកំពូល​យ៉ាង​លឿន​និង​ការវិល​មក​កាន់​ប្រក្រតីភាព​បាន​កើត​ឡើង​យ៉ាង​លឿន​ជាង​ការរំពឹង​ទុក​។​នៅពេល​បច្ចុប្បន្ន ចំណុច​សំខាន់​និង​ពិបាក​នៃ​ការគ្រប់គ្រង​​ជំងឺ​នេះ​ស្ថិត​លើ​អ្នកជំងឺ​កូវី​ដ​វ័យចាស់ៗ​ដែល​មាន​ជំងឺ​ផ្សេងៗ​ជាប់​ខ្លួន​ដូចជា ជំងឺ​បេះដូង លើសឈាម​និង​ទឹកនោម​ផ្អែម​។​

​លោក​លីវ បាន​និយាយថា​អាជ្ញាធរ​ចិន​ខិតខំ​អស់​ពី​សមត្ថភាព​ដើម្បី​គ្រប់គ្រង​កូវី​ដ​១៩​និង​ឥឡូវ​ភាពប្រក្រតី​បាន​វិល​មក​វិញ​ក្នុងចំណោម​ប្រជាជន​ចិន នៅពេល​ការផ្គត់ផ្គង់​នៅ​តាម​មន្ទីរពេទ្យ​ដូចជា​គ្រែ​​អ្នកជំងឺ វេជ្ជបណ្ឌិត គិលានុបដ្ឋាកគិលានុបដ្ឋាយិការ​និង​ថ្នាំ​គ្រប់​ប្រភេទ​ត្រូវបាន​ធានា​។​

​ឧបនាយករដ្ឋមន្ត្រី​ទទួលបន្ទុក​សេដ្ឋកិច្ច​រូបនេះ​បាន​បន្តទៀតថា ផលិតកម្ម​និង​ជីវិត​របស់​ប្រជាជន​ចិន​បាន​វិល​ទៅ​រក​ភាព​វិញ​កាលពី​ពេល​ថ្មីៗ​និង​ការប្រើប្រាស់​គ្រប់​ប្រភេទ​ដូចជា​សេវា​មើលថែ​និង​ទេស​​ចរណ៍​បានចាប់ផ្តើម​ដំណើរការ​វិញ​។​ចំនួន​អ្នកដំណើរ​ចិន​ត្រូវ​រំពឹងថា​នឹង​ឈានដល់​៥​ពាន់​លាន​ក្នុងអំឡុងពេល​ឈប់សម្រាក​ចូល​ឆ្នាំ​ថ្មី​នា​ប៉ុន្មាន​ថ្ងៃ​ទៀត ដែល​វា​បង្ហាញ​ការបន្ត​ប្រក្រតីភាព​ពេញលេញ​៕

​ប្រជាជន​ចិន​កំពុង​ធ្វើដំណើរ​ទៅ​ជួបជុំ​គ្រួសារ​ក្នុងអំឡុង​បុណ្យចូលឆ្នាំថ្មី​នៅ​ប៉ុន្មាន​ថ្ងៃ​ខាងមុខ​