​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ យន្តហោះ​ធំ​បំផុត​របស់​ពិភពលោក​ដែល​មាន​ស្លាប​ប្រវែង ៣៨៣ ហ្វីត (​ប្រហែល​១១៧​ម៉ែត្រ​) ថ្មីៗ​នេះ​បាន​ហោះ​លើ​ផ្ទៃមេឃ​នៅ​វាល​ខ្សាច់​ម៉ូ​ចេវ (Mojave)​ក្នុង​​រដ្ឋ​កាលីហ្វ័​រញ៉ា ដើម្បី​បំពេញ​ការហោះហើរ​សាកល្បង​រយៈពេល ៦ ម៉ោង​សម្រាប់​កំណត់ត្រា​ថ្មី​។​

​យន្តហោះ​ដឹក​អ្នកដំណើរ Stratolaunch Roc ឬ​ហៅ​កាត់​ថា Roc​បាន​ធ្វើ​ការហោះហើ​រសាក​ល្បង​លើក​ទី​ពីរ​របស់​ខ្លួន​កាលពី​ព្រឹក​ថ្ងៃ​សុក្រ​សប្តាហ៍​មុន​ខណៈ​ដឹក​យន្តហោះ​សាកល្បង​ដាច់​ដោយ​​ឡែក​ឈ្មោះថា Talon-A​។​

Talon-A (TA-O)​គឺជា​យន្តហោះ​សាកល្បង​ដែល​អាច​ប្រើ​ឡើងវិញ​បាន​ប្រវែង ៨,៥ ម៉ែត្រ ដែល​អាច​ផ្ទុក​ទំនិញ​ក្នុង​ល្បឿន​លឿន​ជាង​សំឡេង​ប្រាំ​ដង​។​

​ការហោះហើរ​នេះ​គឺជា​ជំហាន​ដ៏​សំខាន់​មួយ​សម្រាប់​វឌ្ឍនភាពរ​បស់​ក្រុមហ៊ុន​ឆ្ពោះទៅរក​ការហោះហើរ​ផ្តាច់ចេញ​ពី​គ្នា​សាកល្បង និង​ការហោះហើរ​លឿន​ជាង​សំឡេង​លើកដំបូង​របស់​យន្តហោះ TA-1 ក្នុង​ឆមាស​ទី​មួយ​នៃ​ឆ្នាំ ២០២៣​។​

​គោលបំណង​ចម្បង​សម្រាប់​ការហោះហើរ​កាលពី​ថ្ងៃ​សុក្រ ដែល​ជា​ការហោះហើរ​លើក​ទី​ប្រាំបួន​របស់​យន្តហោះ​នេះ រួម​មាន​ការហោះហើរ​នៅ​ខាង​ក្រៅ​តំបន់​វាល​ខ្សាច់​ម៉ូ​ចេវជា​លើកដំបូង​និង​ការវាយតម្លៃ​នៃ​បរិយាកាស​ផ្តាច់ចេញ​ពី​គ្នា​។​

​លោក ហ្សា​ខារី ក្រេវ័​រ (Zachary Krevor) នាយក​ប្រតិបត្តិ​និង​ជា​ប្រធាន​ក្រុមហ៊ុន Stratolaunch បាន​និយាយ​នៅក្នុង​សេចក្តីថ្លែងការណ៍​មួយ​ថា “​ក្រុម​ដ៏​អស្ចារ្យ​របស់​យើង​កំពុង​បន្ត​ធ្វើ​ឱ្យ​មាន​វឌ្ឍនភាព​លើ​ការ​កំណត់​ពេលវេលា​ហោះ​សាកល្បង​របស់​យើង ហើយ​វា​គឺ​តាមរយៈ​ការខិតខំ​ប្រឹងប្រែង​របស់​ពួកគេ​ទើប​យើង​កាន់តែ​ខិត​ជិត​ជាង​ពេលណាៗ​ទាំងអស់​ចំពោះ​ការ​ផ្តាច់ចេញ​ពី​គ្នា​ដោយ​សុវត្ថិភាព និង​ការហោះ​សាកល្បង​ល្បឿន​លឿន​ជាង​សំឡេង​ជា​លើកដំបូង​របស់​យើង​”៕

​យន្តហោះ Roc បាន​ធ្វើ​ការហោះហើ​រសាក​ល្បង​លើក​ទី​ពីរ​របស់​ខ្លួន​កាលពី​ព្រឹក​ថ្ងៃ​សុក្រ​សប្តាហ៍​មុន​