​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ តួ​ក​គី​កាលពី​ថ្ងៃ​ពុធ​ទី​១៨​មករា​បាន​អំពាវនាវ​ដល់​សហរដ្ឋ​អាម៉េរិក​ឱ្យ​ពន្លឿន​ការលក់​យន្តហោះ F-16​ជា​ការលក់​មួយ​ដែល​មន្ត្រី​អាម៉េរិក​មួយចំនួន​សង្ឃឹម​​ថា​អាច​លួងលោម​រដ្ឋាភិបាល​ក្រុង​អង់កា​រ៉ា​(​តួ​ក​គី​)​ឱ្យ​ដក​ការ​ជំទាស់​ចំពោះ​ការពង្រីក​ខ្លួន​របស់​អង្គការ​ណា​តូ ប៉ុន្តែ​ត្រូវបាន​ជំទាស់​យ៉ាង​ជូរចត់​ដោយ​ព្រឹទ្ធ​សមាជិក​ដ៏​សំខាន់​មួយ​រូប​។​

​ជួប​ជាមួយ​រដ្ឋមន្ត្រី​ការបរទេស​អាម៉េរិក លោក អាន​ថូ​នី ប្លីង​កិន រដ្ឋមន្ត្រីការបរទេស​តួ​ក​គី លោក មេ​វ​លូត ខា​វូ​សូ​គ្លូ (Mevlut Cavusoglu) បាន​និយាយថា​លោក​មាន​បំណង​ពិភាក្សា​អំពី​សំណើ​របស់​​ប្រទេស​លោក​សម្រាប់​ការធ្វើ​ទំនើបកម្ម​យន្តហោះ​ចម្បាំង F-16 សំខាន់ៗ​។​

​លោក​ខា​វូ​សូ​គ្លូ​បាន​និយាយថា “​ដូចដែល​យើង​បាន​និយាយ​ជាមួយ​គ្នា​ពី​មុនចឹង នេះ​មិន​ត្រឹមតែ​សម្រាប់​តួ​ក​គី​ប៉ុណ្ណោះ​ទេ​តែ​ថែមទាំង​មាន​សារៈសំខាន់​សម្រាប់​អង្គការ​ណា​តូ​និង​សម្រាប់​សហរដ្ឋ​អាម៉េរិក​​ផងដែរ​។​ដូច្នេះ​យើង​រំពឹងថា​នឹង​មាន​ការយល់ព្រម​ស្រប​តាម​ផលប្រយោជន៍​ជា​យុទ្ធសាស្ត្រ​រួម​របស់​យើង​”​។​

​សហរដ្ឋ​អាម៉េរិក​កំពុង​បង្ហើយ​សំណើ​ទិញ​យន្តហោះ​តម្លៃ ២០ ពាន់​លាន​ដុល្លារ​សម្រាប់​តួ​ក​គី ដែល​គេ​រំពឹងថា​នឹង​រួមបញ្ចូល​យន្តហោះ​ចម្បាំង F-16 ថ្មី​ប្រហែល ៤០ គ្រឿង​។​

​ការលក់​នេះ​នឹង​ធ្វើ​ឡើង​ក្នុងពេល​ដំណាលគ្នា​ជាមួយនឹង​កិច្ចព្រមព្រៀង​សម្រាប់​យន្តហោះ​កំពូល F-35​សម្រាប់​ក្រិក ដែល​ជា​គូប្រជែង​ប្រវត្តិសាស្ត្រ​របស់​តួ​ក​គី​ខណៈ​ភាព​តានតឹង​បាន​កើនឡើង​យ៉ាង​ខ្លាំង​​ជុំវិញ​ជម្លោះ​នៅ​សមុទ្រ​មេ​ឌី​ទែ​រ៉ាណេ​ខាងកើត​។​

​សហរដ្ឋ​អាម៉េរិក​បាននិងកំពុង​ស្វែងរក​មធ្យោបាយ​ដើម្បី​បញ្ចុះបញ្ចូល​ប្រធានាធិបតី​តួ​ក​គី​លោក រី​ស៊ី​ប ថា​យ​យី​ប អឺ​ដូ​ហ្គាន ឱ្យ​លុបចោល​ការជំទាស់​ចំពោះ​ការ​អនុញ្ញាត​ឱ្យ​ស៊ុយអែត​និង​ហ្វាំង​ឡ​ង់​ចូលរួម​​អង្គការ​ណា​តូ​។​

​កាលពីមុន​ប្រទេស​តំបន់ន័​រ​ឌី​កទាំង​ពីរ​បាន​បង្ហាញ​ការស្ទា​ក់​ស្ទើរ​ក្នុង​ការចូលរួម​ក្នុង​សម្ពន្ធភាព​យោធា​លោកខាងលិច​ជា​ផ្លូវការ បន្ទាប់​ពី​ការ​លុកលុយ​របស់​រុស្ស៊ី​លើ​អ៊ុ​យក្រែន​។​

​ប៉ុន្តែ​សមាជិក​ណា​តូ​ទាំងអស់​ត្រូវតែ​យល់ព្រម ហើយ​លោក​អឺ​ដូ​ហ្គាន​បាន​ជំរុញ​ស៊ុយអែត​និង​ហ្វាំង​ឡ​ង់​ឱ្យ​បង្ក្រាប​ក្រុម​សកម្មប្រយុទ្ធ​ឃឺ​ដ ដែល​បាន​ផ្លាស់​ទៅ​រស់នៅ​ប្រទេស​ទាំង​ពីរ​។​

​ប្រធានាធិបតី ចូ បៃ​ដិន បាន​បង្ហាញ​ការគាំទ្រ​ចំពោះ​ការលក់​យន្តហោះ F-16 ឱ្យទៅ​តួ​ក​គី​។ លោក​ប្លីង​កិន​នៅ​ក្នុង​កិច្ចប្រជុំ​របស់​គាត់​បាន​ហៅ​តួ​ក​គី​ជា​សម្ពន្ធមិត្ត​ដ៏​ជិតស្និទ្ធ​មួយ​ហើយ​បាន​សរសើរ​តួនាទី​​របស់​តួ​ក​គី​ក្នុងការ​ចរចា​ជាមួយ​អ៊ុយ​ក្រែ​ន​និង​រុស្ស៊ី ដើម្បី​អនុញ្ញាត​ឱ្យ​មាន​ការនាំចេញ​គ្រាប់​ធញ្ញជាតិ​ពី​ទីផ្សារ​នំប៉័ង​ពិភពលោក​ដ៏​សំខាន់​នេះ​។​

​ប៉ុន្តែ​ព្រឹទ្ធសមាជិក លោក បប់ មេ​និន​ដេស (Bob Menendez)​ជា​សមាជិក​គណបក្ស​ប្រជាធិបតេយ្យ​ដ៏​សំខាន់​របស់​លោកបៃ​ដិន ដែលជា​ប្រធាន​គណៈកម្មាធិការ​ទំនាក់ទំនង​បរទេស​របស់​ព្រឹទ្ធសភា បាន​ប្តេជ្ញា​រារាំង​រាល់​ការលក់​ទាំងឡាយ​ឱ្យ​ទៅ​តួ​ក​គី​។​

​នៅក្នុង​សុន្ទរកថា​មួយ​កាលពី​ចុង​ខែ​មុន លោក​មេ​និន​ដេស​បាន​និយាយថា ការលើកឡើង​របស់​លោក​អឺ​ដូ​ហ្គាន ដែល​គំរាម​បាញ់​មី​ស៊ី​ល​លើ​ទីក្រុង​អាថែន គឺ “​មិន​អាច​ទទួលយកបាន​ទាំងស្រុង​”​ហើយ​បាន​​ថ្កោលទោស​ការហាមឃាត់​ពី​នយោបាយ​របស់​អភិបាលក្រុង​អ៊ី​ស្តង់​ប៊ុល​ដ៏​មាន​ប្រជាប្រិយភាព​ដែល​ពីមុន​ត្រូវ​គេ​មើលឃើញ​ថា​ជា​ការគំរាមកំហែង​កំពូល​ចំពោះ​លោក​អឺ​ដូ​ហ្គាន​នៅ​ក្នុង​ការបោះឆ្នោត​ខែ​ឧស​​ភា​ខាង​មុខ​។​

​លោក​មេ​និន​ដេស​បាន​និយាយ​អំពី​លោក​អឺ​ដូ​ហ្គាន​យ៉ាង​ដូច្នេះ​ថា “​គាត់​ប្រហែល​ធ្វើ​វា​ទាំង​កំហឹង​។ ឬ​គាត់​ប្រហែល​ធ្វើ​វា​ដោយសារតែ​គាត់​ជា​ជន​អន្ធពាល​”​។​

​លោក​បាន​និយាយថា “​ប៉ុន្តែ​រឿង​មួយ​គឺ​ច្បាស់​ណាស់ សហរដ្ឋ​អាម៉េរិក​ត្រូវតែ​យកចិត្តទុកដាក់​ឱ្យ​ខ្លាំង​លើ​វិធានការ​ទាំងឡាយ​របស់​ប្រធានាធិបតី​តួ​ក​គី​” ដោយ​បាន​ប្តេជ្ញា​ថា​នឹង​រារាំង​ការលក់​យន្តហោះ F-16 ដរាបណា​លោក​អឺ​ដូ​ហ្គាន “​បញ្ឈប់​យុទ្ធនាការ​ឈ្លានពាន​រប​ស់​គាត់​នៅ​ទូទាំង​តំបន់​ទាំងមូល​”​។​

​នៅក្នុង​សេចក្តីថ្លែងការណ៍​រួមមួយ លោក​ប្លីង​កិន​និង​លោកខាវូ​សូ​គ្លូ​បាន​និយាយថា ពួកគេ “​បាន​យល់ព្រម​លើ​សារៈសំខាន់​នៃ​ការរក្សា​ស្ថិរភាព និង​បណ្តាញ​ទំនាក់ទំនង​” នៅ​សមុទ្រ​មេ​ឌី​ទែ​រ៉ាណេ​ខាងកើត​៕

រដ្ឋមន្ត្រីការបរទេស​អាម៉េរិក លោក អាន​ថូ​នី ប្លីង​កិន ជួប​ជាមួយ​រដ្ឋមន្ត្រី​ការបរទេស​តួ​ក​គី លោក មេ​វ​លូត ខា​វូ​សូ​គ្លូ នៅ​ក្រសួងការបរទេស​អាម៉េរិក​