​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​លេន​ស្គី បាន​និយាយថា ការផ្គត់ផ្គង់​សព្វាវុធ​របស់​លោក​ខាងលិច ត្រូវតែ​ធ្វើ​អោយបាន​លឿន​និង​លើស​ការវាយប្រហារ​​របស់​រុស្ស៊ី​ហើយ​បាន​ជំរុញ​ពិភពលោក​ឱ្យ​ធ្វើ​ការសម្រេចចិត្ត​ឱ្យ​បាន​លឿន ពីព្រោះ “​សោកនាដកម្ម​កំពុង​មាន​ខ្ពស់ជាង​អាយុជីវិត ហើយ​របប​ផ្តាច់ការ​កំពុង​វ៉ា​លទ្ធិប្រជាធិបតេយ្យ​”​។​

​នៅក្នុង​សុន្ទរកថា​វីដេអូ​មួយ​កាលពី​ថ្ងៃ​ពុធ​ទី​១៨​មករា​ទៅកាន់​វេទិកា​សេដ្ឋកិច្ច​ពិភពលោក​ដែល​ប្រជុំ​នៅ​ទីក្រុង​ដា​វ៉ូស (Davos)​ប្រទេស​ស្វីស​លោក​ហ្សេ​លេន​ស្គី​បាន​ឈរ​ហើយ​សុំ​រក្សា​ភាព​ស្ងៀមស្ងាត់​មួយ​​សម្ទុះ​សម្រាប់​ជនរងគ្រោះ​នៃ​ការធ្លាក់​ឧទ្ធម្ភាគចក្រ​នៅ​អ៊ុ​យក្រែន ដែល​រួមមាន​ទាំង​រដ្ឋមន្ត្រីក្រសួង​មហាផ្ទៃ​របស់​គាត់​ផងដែរ​។​

​ខណៈ​មូលហេតុ​នៅ​មិនទាន់​ដឹង​ច្បាស់ លោក​បាន​និយាយថា “​រាល់​មនុស្ស​ទាំងឡាយ និង​រាល់​ការស្លាប់​ទាំងឡាយ​គឺជា​លទ្ធផល​នៃ​សង្គ្រាម​”​។​

​លោក​បាន​និយាយថា ពិភពលោក​ត្រូវតែ​មាន​ប្រតិកម្ម​លឿន​ជាង​មុន​ចំពោះ​បញ្ហា​ប្រឈម​នានា​ដូច​ជា​សន្តិសុខ​ពិភពលោក ការប្រែប្រួល​អាកាសធាតុ និង​ភាពអត់ឃ្លាន​ដោយ​និយាយ​ថា​ឥឡូវនេះ​កំពុង​​មាន “​វិបត្តិ​ពេលវេលា​”​។​

​លោក​ហ្សេ​លេន​ស្គី​បាន​និយាយថា រុស្ស៊ី​បានចាប់ផ្តើម​សង្គ្រាម ហើយ​ពិភពលោក​ត្រូវការ​ពេល​ច្រើន​ថ្ងៃ​ដើម្បី​បញ្ចេញ​ប្រតិកម្ម​ជាមួយនឹង​ទណ្ឌកម្ម​ដំបូង​ហើយ​ជាមួយនឹង​”​ពេលវេលា​ដែល​ពិភពលោក​សេរី​​ប្រើប្រាស់​ក្នុងការ​គិតពិចារណា គឺ​ត្រូវបាន​ប្រើ​ដោយ​រដ្ឋ​ភេរ​វករ​ដើម្បី​សម្លាប់​មនុស្ស​”​។​

​លោក​បាន​និយាយថា ពិភពលោក​មិនត្រូវ​ស្ទាក់ស្ទើរ​នោះឡើយ ៖ “​ការផ្គត់ផ្គង់​ប្រព័ន្ធ​ការពារ​ដែនអាកាស​ដល់​អ៊ុ​យក្រែន ត្រូវតែ​មាន​ភាព​លើសលប់​ពី​ការវាយប្រហារ​ដោយ​មី​ស៊ី​ល​ដ៏​ច្រើន​របស់​រុស្ស៊ី​។ កា​ផ្គត់​​ផ្គង់​រថក្រោះ​លោកខាងលិច​ត្រូវតែ​មាន​ចំនួន​ច្រើនជាង​ការវាយលុក​របស់​រថ​ក្រោះ​រុស្ស៊ី​”​។​

​នៅពេល​សួរ​អំពី​ការចូលរួម​ពិភាក្សា​ជាមួយ​រុស្ស៊ី លោក​ហ្សេ​លេន​ស្គី​បាន​និយាយថា “​ពួកគេ​ត្រូវតែទទួលស្គាល់​កំហុសរ​បស់​ពួកគេ ពួកគេ​ត្រូវតែ​ទទួលស្គាល់​លក្ខន្តិកៈ​របស់​អ៊ុយ​ក្រែ​នហើយ​ពួកគេ​ត្រូវតែ​​គោរព​បូរណភាព​ទឹកដី​របស់​យើង​”​។​

​អគ្គលេខាធិការ​អង្គការ​ណា​តូ លោក ជែន ស្តូល​ធិន​បឺក (Jens Stoltenberg) បាន​និយាយថា អ្នកគាំទ្រ​លោកខាងលិច​របស់​អ៊ុ​យក្រែន នឹង​ពិភាក្សាគ្នា​នៅ​សប្តាហ៍​នេះ​អំពី​វិធី​ផ្គត់ផ្គង់​អាវុធ​​ធុន​ធ្ងន់​និង​ទំនើប​ជាង​មុន ដើម្បី​ជួយ​ប្រទេស​នេះ​ប្រយុទ្ធ​ជាមួយ​រុស្ស៊ី​។​

​ក្រុម​ទំនាក់ទំនង​អ៊ុយ​ក្រែ​ននឹង​ប្រមូលផ្តុំ​គ្នា​នៅ​មូលដ្ឋាន​ទ័ពអាកាស​រ៉ា​ម​ស្តា​ញ (Ramstein) ក្នុង​ប្រទេស​អាល្លឺម៉ង់​នៅ​ថ្ងៃ​ព្រហស្បតិ៍​និង​ថ្ងៃ​សុក្រ​។ ក្រុម​នេះ​មាន​មន្ត្រី​ការពារ​ជាតិ​កំពូល​ប្រហែល ៥០ នាក់ រួម​ទាំង​រដ្ឋមន្ត្រី​ការពារ​ជាតិ​អាម៉េរិក លោក ឡយ អូ​ស្ទីន ដែល​កំពុង​សម្របសម្រួល​ការរួមចំណែក​យោធា​ដល់​អ៊ុ​យក្រែន​៕

លោក​ហ្សេ​លេន​ស្គី​ថ្លែង​ទៅ​កាន់​វេទិកា​សេដ្ឋកិច្ច​ពិភពលោក​ដែល​ប្រជុំ​នៅ​ទីក្រុង​ដា​វ៉ូស​កាលពី​ថ្ងៃ​ពុធ