​ប្រែ​សម្រួល : ​កញ្ញា​ដា​លីស (​ដេល្លី​ម៉េល​) ៖ អាម៉េរិក​កំពុង​បង្ហើយ​កញ្ចប់​ជំនួយ​យោធា​ដ៏​ធំ​មួយ​សម្រាប់​អ៊ុ​យក្រែន ដែល​មន្ត្រី​អាម៉េរិក​និយាយ​ថា​ទំនងជា​មាន​ចំនួន​សរុប​ដល់​ទៅ ២,៦ ពាន់​លាន​ដុល្លារ​។ គេ​រំពឹងថា​វា​នឹង​រួម​បញ្ចូល​ជា​លើកដំបូង​នូវ​រថពាសដែក Stryker​ជិត ១០០ គ្រឿង និង​រថពាសដែក Bradley យ៉ាងតិច ៥០​គ្រឿង​ដើម្បី​អនុញ្ញាត​ឱ្យ​កងកម្លាំង​អ៊ុយ​ក្រែន​ផ្លាស់​ទីកាន់​តែ​លឿន​​និង​មាន​សុវត្ថិភាព​នៅ​សមរភូមិ​ជួរ​មុខ​ក្នុង​សង្គ្រាម​ជាមួយ​រុស្ស៊ី ប៉ុន្តែ​មិនមែន​ជា​រថក្រោះ​ដែល​អ៊ុយ​ក្រែន​កំពុង​ស្វែងរក​នោះទេ​។​

​ក្រុមមន្ត្រី​បាន​និយាយថា តួលេខ​អាច​ផ្លាស់ប្តូរ​នៅពេល​ដែល​រដ្ឋបាលបៃដិ​ន​ឆ្លងកាត់​ការពិភាក្សាចុ​ង​ក្រោយ​លើ​កញ្ចប់​ជំនួយ​នេះ​។ ការប្រកាស​រំពឹង​ធ្វើឡើង​ក្នុង​សប្តាហ៍​នេះ​នៅពេល​ប្រមុខ​ការពារជាតិ​មក​ពី​សហរដ្ឋ​អាម៉េរិក អឺរ៉ុប និង​តំបន់​ផ្សេង​ទៀត​ជួបជុំគ្នា​ក្នុង​ប្រទេស​អាល្លឺម៉ង់​ដើម្បី​ពិភាក្សា​អំពី​ការគាំទ្រ​ផ្នែក​យោធា​សម្រាប់​អ៊ុ​យក្រែន​។ ជំនួយ​នេះ​ក៏​រំពឹង​រួមបញ្ចូល​គ្រាប់​យុទ្ធភ័ណ្ឌ​រាប់​ពាន់​គ្រាប់រួម​ទាំង​គ្រាប់​​រ៉ុក្កែត​សម្រាប់​ប្រព័ន្ធ​ការពារ​ដែនអាកាស​ផងដែរ​។​

​ក្រុមមន្ត្រី​បាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ ព្រោះ​ជំនួយ​នេះ​មិន​ទាន់​ត្រូវបាន​ផ្សព្វផ្សាយ​ជា​សាធារណៈ​។​

​ការសម្រេចចិត្ត​បញ្ជូន​រថពាសដែក Strykers ដែល​អាច​ដឹក​ជញ្ជូន​ក្នុង​រយៈពេល​ប៉ុន្មាន​សប្តាហ៍ បាន​កើត​ឡើង​ក្រោយ​ការប្រកាស​របស់​អង់គ្លេស​ក្នុង​ការបញ្ជូន​រថក្រោះ​ប្រយុទ្ធ​ឱ្យទៅ​អ៊ុយ​ក្រែន​ដែល​​ត្រូវ​បាន​ស្វែងរក​ជា​យូរ​មក​ហើយ​ដោយ​មេដឹកនាំ​អ៊ុ​យក្រែន​។ Strykers និង Bradley គឺជា​រថពាសដែក​។​

​អនុ​រដ្ឋមន្ត្រី​ការពារ​ជាតិ​ទទួលបន្ទុក​គោលនយោបាយ លោក ខូលីន កាល់ (Colin Kahl)​បាន​ប្រាប់​អ្នកយក​ព័ត៌មាន​កាលពី​ថ្ងៃ​ពុធ​ថា ដំណាក់កាល​ថ្មី​នៃ​សង្គ្រាម​កំពុង​រំលេច​រូបរាង​ឡើងខណៈ​រុស្ស៊ី​​កាន់តែ​ពង្រឹង​លេណដ្ឋាន​ខ្លាំង​ឡើង ហើយ​អ៊ុយ​ក្រែន​ត្រូវ​ការទាហាន​ថ្មើរជើង​ដែល​មាន​យានជំនិះ​ខ្លាំងៗ​ដើម្បី​ទម្លុះ​ខ្សែត្រៀម​ទាំងនោះ​៕

Strykers និង Bradley គឺជា​រថពាសដែក​