​ប្រែ​សម្រួលៈ​បំណង​(​ស្ត្រេត​ថែ​សស៍​)៖​តុលាការ​ថៃ​មួយ​បាន​ចេញ​បញ្ជា​អោយ​ធ្វើ​បត្យាប័ន​(​បញ្ជូន​ខ្លួន​)​អ្នកជំនួញ​ម៉ាឡេស៊ី​ម្នាក់​ទៅ​កាន់​ប្រទេស​ចិន​ដើម្បី​ប្រឈម​ការចោទប្រកាន់​ពាក់ព័ន្ធ​នឹង​ការ​ឆបោក នេះ​បើ​​តាម​ទីភ្នាក់ងារសារព័ត៌មាន​Bernama​បាន​រាយការណ៍​កាលពី​ថ្ងៃ​ពុធ​។​

​តាមរយៈ​សវនាការ​មួយ​កាលពី​ថ្ងៃ​ពុធ តុលាការ​បាន​និយាយ​ថា​ថេឌី ធ្យែ​វ វូ​អ៊ី វ៉ាត​( Tedy Teow Wooi Huat)​ស្ថាបនិក​ក្រុមហ៊ុន​MBI​នៅ​រដ្ឋ​ប៉េណាំង ប្រទេស​ម៉ាឡេស៊ី អាច​ប្តឹង​ឧទ្ធរណ៍​ប្រឆាំង​សាល​​ក្រម​នេះ​ក្នុង​រយៈពេល​៣០​ថ្ងៃ​។​

​សូមបញ្ជាក់​ថា ទាំង​ចិន​និង​ម៉ាឡេស៊ី សុំ​បញ្ជូន​ខ្លួន​ធ្យែ​វ ​ទៅ​ប្រទេស​របស់​ផង​គេ ដោយសារ​ជន​នេះ​មាន​ជាប់​ពាក់ព័ន្ធ​នឹង​រឿងអាស្រូវ​មួយចំនួន​ក្រោយ​ត្រូវ​ប៉ូលីស​ថៃ​ចាប់ខ្លួន​កាលពី​ឆ្នាំមុន​។​

​ធ្យែ​វ ដែល​ស្លៀកពាក់​សម្លៀកបំពាក់​អ្នកទោស​ពណ៌​ត្នោត​និង​ម៉ា​ស់មុខ បាន​បង្ហាញ​មុខ​ក្នុង​កាម៉េរ៉ា ចេញពី​ពន្ធនាគារ​ធំ​ក្នុង​ក្រុង​បាងកក អមដោយ​មន្ត្រី​ពន្ធនាគារ​។​បុរស​នេះ​នៅ​ស្ងៀមស្ងាត់​ពេញ​មួយ​​សវនាការ​និង​បន្ទាប់ពី​ចៅក្រម​អាន​សាលក្រម គាត់​បាន​សួរថា​«​តើ​ខ្ញុំ​អាច​ប្តឹង​ឧទ្ធរណ៍​ទ​ឬ​?»​។​

​សារព័ត៌មាន​ម៉ាឡេស៊ី​បាន​និយាយថា ប៉ូលីស​ក្រុង​ប៉េកាំង​ចង់បាន​ធ្យែ​វ​ទៅ​សួរ​ចម្លើយ​បន្ទាប់​ពី​អ្នក​វិនិយោគ​ប្រមាណ​៤០០​នាក់​នៅ​ចិន​ប្តឹង​ទាមទារ​ប្រាក់​វិនិយោគ​ប្រមាណ​១០០​លាន​យ័ន​មកវិញ​។​កាលពី​​ឆ្នាំ​២០១៩ ជនជាតិ​ចិន​ប្រមាណ​១០០​នាក់​ក៏​ចោទប្រកាន់​ថា​ក្រុមហ៊ុន​MBI​បោកប្រាស់​ពួកគេ​ជុំវិញ​គំរោង​វិនិយោគ​ប្រាក់​បាន​ចំណេញ​ភ្លាមៗ​មួយ​។​

​កាលពី​ឆ្នាំមុន ប៉ូលីស​ម៉ាឡេស៊ី​បាន​បង្ក្រាប​ក្រុមហ៊ុន​មួយ​ដែល​គេ​ថា​មាន​ជាប់​ពាក់ព័ន្ធ​នឹង​ធ្យែ​វ​និង​កូនប្រុស​ពីរ​នាក់​របស់​គាត់​។​ក្រុម​នេះ​ត្រូវបាន​គេ​ចោទប្រកាន់ថា បង្កើត​ក្រុមហ៊ុន​សំបក​(​គ្មាន​ទ្រព្យ​និង​​ដំណើរការ​)​ដើម្បី​លាង​លុយ​ដែល​ទទួលបាន​មក​ដោយ​អំពើ​ទុច្ចរិត និង​ប្រើ​លុយ​ទាំង​នេះ​ទិញ​អចលនទ្រព្យ​ថ្លៃៗ​នៅ​ម៉ាឡេស៊ី​និង​ថៃ ព្រមទាំង​វិនិយោគ​លើ​ប្រាក់​គ្រីប​តូ​សរុប​៣៣៦​លាន​រីង​ហ្គី​ត​៕

​ធ្យែ​វ ត្រូវបាន​ចាប់ខ្លួន​កាលពី​ខែ​កក្កដា ឆ្នាំ​មុន​នៅ​ប្រជុំជន​ថៃ ដាន់​ណុ​ក​(Dannok)​ក្បែរ​ព្រំដែន​ម៉ាឡេស៊ី