ការធ្វើ​តេស្ត​រហ័ស​រក​វីរុស​កូ​វីដ​-១៩ ដោយ​ខ្លួនឯង ក្នុងករណី​សង្ស័យ​ឆ្លង​វីរុស​កូ​វីដ​-១៩ គឺជា​ការជួយ​សង្គ្រោះ​ខ្លួនឯង ឱ្យមាន​ការថែទាំ​ព្យាបាល បាន​ទាន់ពេលវេលា​

​ដោយៈ ទេព មង្គល / ភ្នំពេញៈ លោកស្រី វេជ្ជបណ្ឌិត ឱ វណ្ណឌី​ន រដ្ឋលេខាធិការ និង​ជា អ្នកនាំពាក្យ ក្រសួងសុខាភិបាល និង​ជា​ប្រធាន​គណៈកម្មការ ចំពោះ​កិច្ច​ចាក់​វ៉ាក់សាំង​ជំងឺ កូ​វីដ​-១៩ ក្នុង​ក្របខណ្ឌ​ទូទាំងប្រទេស (​គ​វ​.​ក​-១៩) នៅ​ថ្ងៃទី​១៨ ខែមករា ឆ្នាំ​២០២៣ បានធ្វើ​សេចក្ដីថ្លែងការណ៍​ដ៏​ខ្លី​មួយ​ ថាៈ ” ការធ្វើ​តេស្ត​រហ័ស​រក​វីរុស​កូ​វីដ​-១៩ ដោយ​ខ្លួនឯង ក្នុងករណី​សង្ស័យ​ឆ្លង​វីរុស​កូ​វីដ​-១៩ គឺជា​ការជួយ​សង្គ្រោះ​ខ្លួនឯង ឱ្យមាន​ការថែទាំ ព្យាបាល បាន​ទាន់ពេល​វ​លា ” ។

​នៅក្នុង​សេចក្ដីថ្លែងការណ៍​របស់​ខ្លួន លោកស្រី វេជ្ជបណ្ឌិត ឱ វណ្ណឌី​ន បានលើកឡើង​ថាៈ បច្ចុប្បន្ននេះ វីរុស​កូ​វីដ​-១៩ មិនទាន់​ទៅណា​ឆ្ងាយ ពី​យើង​នោះទេ ហើយ​ពពួក​អូ​មី​ក្រុង បំប្លែង​ខ្លួន​ថ្មីៗ ក៏​កំពុងតែ​ចរាចរ​នៅលើ​សាកលលោក និង​នៅក្នុង​តំបន់​ផងដែរ​។
​លោកស្រី វេជ្ជបណ្ឌិត បាន​ណែនាំ ក្រើន​រំលឹកថាៈ នាឱកាស​សែនដូនតា និង​ចូលឆ្នាំ ប្រពៃណី​ជាតិខ្មែរ ខាងមុខនេះ សូម​បងប្អូន ប្រជាពលរដ្ឋ​ទាំងអស់ បន្ត​ការប្រុងប្រយ័ត្ន និង​អនុវត្ត​វិធានការ​ការពារ​ខ្លួន ពី​ការចម្លង​វីរុស​កូ​វីដ​-១៩ ” ៣​ការពារ និង ៣​កុំ ” និង​បន្តទៅ​ទទួលយក ការចាក់​វាក់​សាំង​ជំងឺ​កូ​វីដ​-១៩ ដួស​ជំរុញ (​ដួស​ទី​៣ ដួស​ទី​៤ ដួស​ទី​៥ ដួស​ទី​៦ និង​ដូ​ស​ជំរុញ​បន្តបន្ទាប់​) ឱ្យបាន​ត្រឹមត្រូវ តាម​ពេលវេលា​។​

​លោកស្រី វេជ្ជបណ្ឌិត ឱ វណ្ណឌី​ន បានផ្ដល់​ដំបូន្មាន​ថាៈ ដើម្បី​ជួយ​ដល់​ការថែទាំ​សុខភាព និង​ព្យាបាល​បាន​ទាន់ពេលវេលា ព្រមទាំង​ការពារ​ផល ប៉ះពាល់​សុខភាព ធ្ងន់ធ្ងរ​ពី​ជំងឺ កូ​វីដ​-១៩ ប្រសិនបើ​លោកអ្នក មាន​រោគសញ្ញា​សង្ស័យ សូមកុំ​ភ្លេច​ប្រញាប់​ធ្វើតេស្ដ​រហ័ស ដោយ​ខ្លួនឯង ដើម្បី​ពិនិត្យ​រក​វត្តមាន​វីរុស​កូ​វីដ​-១៩ ឱ្យបាន​លឿន ហើយ​ក្នុងករណី ដែល​រកឃើញថា មាន​វិជ្ជមាន​វីរុស​កូ​វីដ​-១៩ សូម​នៅ​ដាច់ដោយឡែក ចៀសវាង​ការចម្លង បន្តទៅ​ក្រុមគ្រួសារ ឬ​ទៅ​អ្នកដទៃ ហើយ​ធ្វើ​ការថែទាំ និង​ព្យាបាល​ខ្លួន ឱ្យបាន​ឆាប់រហ័ស ដើម្បី​ចូលរួមចំណែក​កាត់បន្ថយ បានជា​អតិប្បរមា នូវ​ការចម្លង​បន្ត និង​ការ​សម្រាក ព្យាបាល​នៅ​មន្ទីរពេទ្យ ដោយ​ភាព​ធ្ងន់ធ្ងរ ព្រមទាំង​អាច​សន្សំសំចៃ​ថវិកា ពី​ការចំណាយ លើ​ការថែទាំ ព្យាបាល​ជំងឺ​ធ្ងន់​ផងដែរ​។​

​លោកស្រី វេជ្ជបណ្ឌិត ឱ វណ្ណឌី​ន បានបញ្ជាក់​ជាថ្មី​ថាៈ សូមកុំ​ភ្លេច ការធ្វើ​តេស្ត​រហ័ស ដោយ​ខ្លួនឯង គឺ​ជួយសង្គ្រោះ​ខ្លួនឯង ឱ្យមាន​ការថែទាំ និង​ព្យាបាល បាន​ទាន់ពេលវេលា​! ធ្វើតេស្ត​រហ័ស និង​ព្យាបាល​រហ័ស ជា​មធ្យោបាយ​ដ៏​ល្អ ជួយ​អាយុជីវិត​លោកអ្នក ពីស​ត្រូវ​អត់​ស្រមោល កូ​វីដ​-១៩ ។ សូម​គោរព​ជូនពរ បងប្អូន​ប្រជាពលរដ្ឋ​ទាំងអស់ សូម​មាន​សុខ​ភាពល្អ​បរិបូ​ណ៍ ចម្រុងចម្រើន និង​សប្បាយរីករាយ ក្នុងឱកាស​សែនដូនតា និង​ពិធី​ចូលឆ្នាំ​ប្រពៃណី​ជាតិខ្មែរ ខាងមុខនេះ ប្រកបដោយ​សុខ​សុវត្ថិភាព​៕/V​