​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្មេងស្រី​អាយុ​៨​ឆ្នាំ​ក្នុងប្រទេស​ឥណ្ឌា ដែលជា​អ្នក​ស្នង​មរតក​ក្រុមហ៊ុន​ពេជ្រ​តម្លៃ​រាប់​លាន​ដុល្លារ​នោះ បែរ​ជា​បួស​ជា​ដូនជី​តាម​ច្បាប់​សាសនា​ដ៏​តឹងរ៉ឹង​បន្ទាប់​ពី​​បាន​លះបង់​ចោល​កាមកិលេស​លោកិយ​។​

​នាង ទេ​វ៉ាន់​ស៊ី សាង​វី (Devanshi Sanghvi) គឺជា​អ្នក​ស្នង​មរតក​របស់​ក្រុមហ៊ុន​គ្រឿងអលង្ការ Sanghvi and Sons ក្នុង​ទីក្រុង​ស៊ូ​រ៉ាត់ (Surat) ភាគ​ខាងលិច​ឥណ្ឌា ដែល​ល្បី​ជា ​ទីក្រុង​ពេជ្រ​” ដោយសារ​ភាព​លេចធ្លោរ​បស់​ខ្លួន​នៅក្នុង​ពាណិជ្ជកម្ម​ត្បូង​ពេជ្រ​សកល​។​

​គ្រួសារ​របស់​នាង​ក៏​ជា​សមាជិក​នៃ​សាសនា​ជែន (Jain) ជា​សាសនា​បុរាណ​ឥណ្ឌា​តូច​មួយ​ដែល​ផ្សព្វផ្សាយ​អំពី​អហិង្សា កា​របួស​យ៉ាង​តឹងរ៉ឹង និង​សេចក្តីស្រឡាញ់​ចំពោះ​សត្វ​ទាំង​តូច​ទាំង​ធំ​។​

​ក្នុង​សប្តាហ៍​នេះ នាង​ត្រូវបាន​បំបួស​ក្នុង​ពិធី​រយៈពេល​បួន​ថ្ងៃ​ដើម្បី​ប្រកាស​ពី​អាជីព​ថ្មី​របស់​នាង ដែល​នៅ​គ្រាមួយ​បានឃើញ​នាង​ជិះ​រទេះអូស​ដោយ​ដំរី​ទៀតផង នេះ​បើ​យោង​តាម​រូបភាព​ដែល​បាន​ចែករំលែក​នៅ​លើ​ប្រព័ន្ធ​ផ្សព្វផ្សាយ​ក្នុងស្រុក​។​

​កាលពី​ថ្ងៃ​ពុធ​ទី​១៨​មករា នាង​បាន​មកដល់​វត្ត​មួយ​ដើម្បី​ដោះដូរ​សម្លៀកបំពាក់​ប្រណីត​របស់​នាង​ជាមួយ​ក្រណាត់ស​សាមញ្ញ បន្ទាប់​ពី​បោះបង់​ទ្រព្យសម្បត្តិ​ចោល​អស់រលីង​។​

​នាង​សាង​វី​ត្រូវបាន​ស្គាល់​ក្នុងចំណោម​សមាជិក​នៃ​សហគមន៍​សាសនា​ជែន​ក្នុង​ទីក្រុង​ស៊ូរ៉ាត់​សម្រាប់​ភាពស្មោះត្រ​ង់​របស់​នាង​សូម្បីតែ​នៅ​វ័យក្មេង​ល្ហក់​ក៏ដោយ នេះ​បើ​យោង​តាម​សាក្សី​ម្នាក់​នៅក្នុង​ពិធី​កាលពី​ថ្ងៃ​ពុធ​ដែល​បាន​និយាយ​ទៅកាន់​ទីភ្នាក់ងារសារព័ត៌មាន AFP ក្នុង​លក្ខខណ្ឌ​មិន​បញ្ចេញ​ឈ្មោះ​។​

​ពួកគេ​បាន​និយាយថា “​នាង​ទេ​វ៉ាន់​ស៊ី​មិន​ដែល​មើល​ទូរទស្សន៍ ភាពយន្ត ឬ​ទៅ​ផ្សារ​ទំនើប​និង​ភោជនីយដ្ឋាន​ទេ​” ដោយ​បន្ថែម​ថា ក្មេង​ស្រី​នេះ​តែងតែ​មាន​វត្តមាន​ជា​ប្រចាំ​នៅ​ក្នុង​ពិធី​នៅ​ព្រះវិហារ​។​

​កុមារី​រូបនេះ​គឺជា​មនុស្ស​វ័យក្មេង​បំផុត​ដែល​បាន​ធ្វើ​ពិធី ឌី​ក​សា (Diksha) ដើម្បី​លះបង់​ទ្រព្យសម្បត្តិ​របស់​ពួកគេ​ហើយ​ចូល​បួស​ជា​ដូនជី​ក្នុង​សាសនា​ជែន​។​

​យោងតាម​ប្រព័ន្ធ​ផ្សព្វផ្សាយ​ក្នុងស្រុក​បាន​ឱ្យដឹងថា ឪពុក​ម្តាយ​របស់​សាង​វី​និយាយថា នាង​តែង​មាន​ចិត្ត​ចង់​ក្លាយជា​ដូនជី​។ គ្រួសារ​ដែល​កាន់សាសនា​ជែន​ជួនកា​ល​ត្រូវ​គេ​និយាយ​ថា​បាន​លើកទឹកចិត្ត​កូនៗ​របស់​ពួកគេ​ឱ្យ​ចូល​បួស​ជា​ភិក្ខុ​ដើម្បី​បង្កើន​ឋានៈ​សង្គម​របស់​សាច់ញាតិ​របស់​ពួកគេ​៕

នាង​សា​វី​បួស​ជា​ដូនជី​ក្នុង​សាសនា​ជែន ក្រោយ​លះបង់​កិលេស​លោកិយ​ចោល​អស់​