​ដោយៈ ភ្នំ​ស្វាយ / បន្ទាយ​មាន​ជ័​យៈ រដ្ឋបាល​ក្រុង​ប៉ោយប៉ែត បានបញ្ជាក់​ថាៈ រដ្ឋបាល​សង្កាត់​ផ្សារកណ្តាល មិនបាន​រាយការណ៍​ទេ ឬ​ស្នើយោបល់​ឡើយ ករណី​ដី​ទីលាន​សួនច្បារ និង​ដី​អណ្តូងស្នប់ នៅ​ភូមិ​ផ្សារកណ្ដាល សង្កាត់​ផ្សារកណ្ដាល ក្រុង​ប៉ោយប៉ែត ដែល​ត្រូវ​បានស្នើ​ផ្ទេរ​ទីតាំង ឬ​លក់​ដី​នោះ ។ ក្នុងនោះដែរ សាលាក្រុង ក៏​ចេញ​លិខិតនិរាករណ៍ លើ​លិខិត​រដ្ឋបាល​សង្កាត់ ហើយ​ដែរ​។​

​លោក គាត ហ៊ុល អភិបាលក្រុង​ប៉ោយប៉ែត បាន​ប្រាប់​កាសែត​រស្មី​កម្ពុជា នៅ​ថ្ងៃទី​១៩ ខែមករា​នេះ​ថាៈ រដ្ឋបាល​ក្រុង និង​លោក​ផ្ទាល់ មានការ​សោកស្តាយ ដោយ​រដ្ឋបាល​សង្កាត់​ផ្សារកណ្តាល មិនបាន​រាយការណ៍ និង​មិនបាន​ស្នើយោបល់ មក​រដ្ឋបាល​ក្រុង ពី​ករណី​ដី​ទីលាន​សួនច្បារ និង​ដី​អណ្តូងស្នប់ នៅ​ភូមិ​ផ្សារកណ្ដាល នោះទេ ។​

​ចំណែក​សាលាក្រុង​ប៉ោយប៉ែត ក្នុង​លិខិត​សេចក្តីសម្រេច លេខ​០០៨/២៣ សសរ ចុះ​ថ្ងៃទី​១៦ ខែមករា ឆ្នាំ​២០២៣ កន្លងមក បានសម្រេច​និរាករណ៍ រាល់​សេចក្តី សម្រេច​ទាំងឡាយណា របស់​រដ្ឋបាល​សង្កាត់​ផ្សារកណ្តាល ដែល​ចេញ ជូន​ប្រជាពលរដ្ឋ ក្នុង​ការទទួល​ពាក្យស្នើសុំ​ចុះបញ្ជី​កម្មសិទ្ធិ​ដីធ្លី មាន​លក្ខណៈ​ជា ប្រព័ន្ធ លើ​លើ​លិខិត​ទាំងឡាយណា របស់​រដ្ឋបាល​សង្កាត់​ផ្សារកណ្ដាល ពាក់ព័ន្ធ​នឹង​ដី​ទីលាន​សួនច្បារ និង​ដី​អណ្តូងស្នប់​ទាំងអស់ នៅលើ​ទីតាំង​ដី​លំនៅដ្ឋាន សម្រាប់​ដោះស្រាយ ជូន​ពលរដ្ឋ មកពី​តំបន់​ប៉ះពាល់​ផ្លូវ​រថភ្លើង ក្រុង​ប៉ោយប៉ែត នា​ភូមិ​ផ្សារកណ្ដាល សង្កាត់​ផ្សារកណ្ដាល ក្រុង​ប៉ោយប៉ែត ខេត្តបន្ទាយមានជ័យ​។​

​សូម​រំលឹកថា កាលពី​ថ្ងៃទី​១៤ ខែមករា ឆ្នាំ​២០២៣ មាន​មនុស្ស រាប់សិប​នាក់ ដែល​អះអាងថា ស្ថិតក្នុង​ប្រជាពលរដ្ឋ ចំនួន ៥៩៩ គ្រួសារ បាន​លើកគ្នា​ទៅ​តវ៉ា ជំទាស់ និង​ហាមឃាត់​មិន​ឲ្យ​អាជ្ញាធរ​សង្កាត់​ផ្សារកណ្ដាល ក្រុង​ប៉ោយប៉ែត និង​ឈ្មួញ ចុះ​បោះបង្គោល ព្រំដី​ទំហំ ៩.៦០០ ម៉ែត្រការ៉េ ដែលមាន​តម្រុយ​ថា នឹង​ពុះ​បំបែក​ជា​ដី​ល្វែង ដើម្បី​លក់​។​

​ពួកគេ បានបញ្ជាក់​ថាៈ ដី​នោះ​របស់​សហគមន៍​ប្រជាពលរដ្ឋ ចំនួន ៥៩៩ គ្រួសារ ដែល​ធ្លា​ប់រង​ផលប៉ះពាល់ ពី​គម្រោង​ស្តារឡើងវិញ ផ្លួ​វ​រថភ្លើង កន្លងមក​។ ហេតុនេះ ពលរដ្ឋ សូម​សំណូមពរ ក៏ដូចជា​ជំទាស់​ដាច់អហង្ការ មិនឱ្យ​អាជ្ញា​ធរមាន​សមត្ថកិច្ច លក់ដូរ ឬ​ផ្ទេរ ឬ​អភិវឌ្ឍន៍​ដី ដែលមាន​តម្លៃ​រាប់សិប ដុល្លារ​អាមេរិក ឬ​ដោះដូរ​យក មក​អភិវឌ្ឍន៍ ធ្វើ​ហេដ្ឋារចនាសម្ព័ន្ធ ក្នុង​សហគមន៍​អី​នោះឡើយ​។​

​ប៉ុន្តែ​មន្ត្រី​សាលាក្រុង​ប៉ោយប៉ែត និង​សាលាសង្កាត់​ផ្សារកណ្តាល បាន​ប្រាប់ថាៈ ក្នុងចំណោម​ពលរដ្ឋ​មួយចំនួន​តូច (៥% នៃ​ពលរដ្ឋ​ជិត ៦០០ គ្រួសារ​) នោះ មាន​មនុស្ស​ពី​ក្រៅ​សហគមន៍ ឬ​ក្រៅ​សាច់រឿង​ផងដែរ ហើយ​បាន​និយាយ​ភូតកុហក និង​ច​រឹក​ច្រណែន ខណៈ​ពលរដ្ឋ ៩៥% ដែល​បាន​យល់ព្រម ហើយ​ជ្រាបថា ដី​បំរុង​សួនច្បារ​នោះ មាន​ទំហំ​តែ​ជាង ៣.០០០ ម៉ែត្រការ៉េ​ប៉ុណ្ណោះ​។ ពោលគឺ មិនមាន​ទំហំ​ជិត ១ ហិកតា ហើយ​មានតម្លៃ​រាប់សិប​ម៉ឺន​ដុល្លារ​អាមេរិក​នោះឡើយ​។​

​ចំណែក​លោក ស្រិល អិន ចៅសង្កាត់​ផ្សារកណ្តាល បាន​ប្រាប់​សារព័ត៌មាន​ថាៈ ករណីនេះ មិនមាន​អ្វី​ត្រូវ​បកស្រាយ​ទៀតឡើយ ព្រោះ​គម្រោង​ដែល​សង្កាត់ និង​សហគមន៍ ត្រូវ​ដោះដូរ ដើម្បី​យក​ថវិកា​មក​អភិវឌ្ឍន៍ ហេដ្ឋារចនាសម្ព័ន្ធ​នោះ ត្រូវបាន​រំសាយ​ហើយ ។​

​លោក​បាន​បន្តថាៈ បន្ថែម​លើ​នោះ រដ្ឋបាល​ក្រុង​ប៉ោយប៉ែត ក៏​បានចេញ​សេចក្តី សម្រេច និរាករណ៍​រាល់​លិខិត​ពាក់ព័ន្ធ​រឿងនេះ របស់​សាលាសង្កាត់ ហើយ​ដែរ​៕/V​