​ប្រែ​សម្រួលៈ​បំណង​(​ដេល្លី​ម៉េល​)៖ អ្នក​ប្រឆាំង​តវ៉ា​បាន​ដុត​ស្ថានីយ៍​ប៉ូលីស​និង​ការិយាល័យ​អ្នកច្បាប់​នៅ​ទីប្រជុំជន​ម៉ា​គូ​សានី (Macusani)​របស់​ប៉េ​រូ កាលពី​ថ្ងៃ​ពុធ​ក្រោយ​ពី​មនុស្ស​ពីរ​នាក់​ត្រូវបាន​​សម្លាប់​និង​ម្នាក់​ទៀត​របួស​ធ្ងន់​ដោយ​ការ​បាញ់កាំភ្លើង​ក្នុងអំឡុងពេល​មាន​បាតុកម្ម​ប្រឆាំង​រដ្ឋាភិបាល​។​

​ប៉ូលីស​បាន​គេចខ្លួន​តា​ម​ឧទ្ធម្ភាគចក្រ​ចេញពី​ស្ថានីយ​ដែល​ហ្វូងមនុស្ស​ដុត​។​

​ការស្លាប់​មនុស្ស​នេះ​ត្រូវ​បាន​បញ្ជាក់​ដោយ​គ្រូពេទ្យ​នៅ​ទីប្រជុំជន​ម៉ា​គូ​សា​នី និង​នាំ​អោយ​ចំនួន​មនុស្ស​ស្លាប់​ក្នុង​បាតុកម្មហិង្សា​អស់​ពេល​ជាង​មួយ​ខែ​មកនេះ​កើន​ដល់​៥៣​នាក់​។​

សូមបញ្ជាក់​ថា ប៉េ​រូបាន​​ផ្ទុះ​ការតវ៉ា​ប្រឆាំង​និង​ទាមទារ​អោយ​រដ្ឋាភិបាល​បច្ចុប្បន្ន​ចុះចេញ​ពី​តំណែង ក្រោយ​ការបណ្តេញ​និង​ចាប់ខ្លួន​ប្រធានាធិបតី ប៉េ​ដ្រូ កា​ស្ទីឡូ​(Pedro Castillo)​។​

​ការបាញ់​សម្លាប់​មនុស្ស​នេះ​កើតឡើង​ចំពេល​ពួក​អ្នក​ប្រឆាំង​តវ៉ា​ជួបជុំគ្នា​នៅ​ក្រុង​លី​ម៉ាដើម្បី​ធ្វើ​បាតុកម្ម​ប្រឆាំង​រដ្ឋាភិបាល​នៅ​ថ្ងៃ​ព្រហស្បតិ៍ ដែល​ពួក​សកម្មជន​សង្ឃឹមថា​នឹង​ជួយ​បើក​ទំព័រ​ថ្មី​មួយ​ក្នុង​​ចលនា​ទាមទារ​អោយ​ប្រធានាធិបតី ឌី​ណា បូ​លូ​អា​តេ​(Dina Boluarte)​ចុះចេញ​ពី​តំណែង​។​ក្រៅពី​ទាមទារ​អោយ​លោកស្រី​ឌី​ណា បូ​លូ​អា​តេ ចុះចេញ​ពី​តំណែង ពួក​បាតុករ​ក៏​ទាមទារ​អោយ​បិទ​សភា​​និង​រៀបចំ​ការបោះឆ្នោត​ជាបន្ទាន់ផងដែរ​។​

​បាតុករ​ទាមទារ​អោយ​ដោះលែង​ប្រធានាធិបតី​កា​ស្ទីឡូ ថែម​ទៀត​។​

​ចលាចល​នេះ​បានចាប់ផ្តើម​តាំងពី​ដើម​ខែ​ធ្នូ ឆ្នាំ​២០២២ ក្រោយ​ការចាប់ខ្លួន​លោក​កា​ស្ទីឡូ ដោយសារតែ​លោក​ប៉ុនប៉ង​រំលាយ​សភា​ដើម្បីកុំអោយសភា​បោះឆ្នោត​ទម្លាក់​លោក​ពីមុខតំណែង ដែលវាជាការរំលោភរដ្ឋធម្មនុញ្ញប្រទេស៕

ផ្ទុះ​ការប្រឈមមុខ​គ្នា​នៅពេល​ប៉ូលីស​រារាំង​មិនអោយ​អ្នក​ប្រឆាំង​តវ៉ា​ធ្វើដំណើរ​ចូល​រដ្ឋធានី​លី​ម៉ា កាលពី​ថ្ងៃ​១៨​មករា​