ដោយៈ សុវណ្ណ​កុម្ភៈ​/​ភ្នំពេញៈ លោក ម៉ុង គឹម​ហេង រដ្ឋលេខាធិការ​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ ប្រធាន​សហព័ន្ធ​កីឡា​វ៉ូ​វី​ណា​ម​អាស៊ីអាគ្នេយ៍ និង​ប្រធានកិត្តិយស​សហព័ន្ធ​កីឡា​វ៉ូ​វី​ណា​ម​កម្ពុជា និង​លោក អ៊ូ រតនា ប្រធាន​សហព័ន្ធ​កីឡា​វ៉ូ​វី​ណា​ម​កម្ពុ​ជានា​ថ្ងៃទី​១៩ ខែមករា ឆ្នាំ​២០២៣ បាន​អញ្ជើញ​ចូលរួម​ពិធី​បិទ​ការប្រកួត​កីឡា​វ៉ូ​វី​ណា​ម​ជ្រើសរើស​ជើងឯក​យុវជន គិរី​សួគ៌ ឆ្នាំ​២០២៣​នៅ​មជ្ឈមណ្ឌល​ជាតិ​ហ្វឹកហ្វឺន​កីឡា​។​

​លោក ម៉ុង គឹម​ហេង បាន​មានប្រសាសន៍ថា នៅសល់តែ ១០៥ ថ្ងៃ​ទៀត​ប៉ុណ្ណោះ​ដែល​ព្រឹ​ត្ត​ការណ៍​ជា​ប្រវត្តិសាស្ត្រ យើងទាំងអស់គ្នា​កំពុង​ទន្ទឹងរង់ចាំ​នឹង​មកដល់ នោះ​គឺ​ការប្រកួត SEA GAMES លើក​ទី​៣២ ដែល​កម្ពុជា​ធ្វើជា​ម្ចាស់ផ្ទះ​។ សារ​នេះ​ចង់​រម្លឹក​ក៏ដូចជា​ពញ្ញាក់​ស្មារតី​ដល់​ថ្នាក់ដឹកនាំ មន្ត្រី គ្រូបង្វឹក កីឡាករ​ជម្រើសជាតិ ទាំងអស់ កុំ​ឲ្យ​ភ្លេចខ្លួន​ថា យើង​កំពុង​តែមាន​បេសកកម្ម​រួមមួយ​ដ៏​មានតម្លៃ​ជា​ប្រវត្តិសាស្ត្រ ហើយ​មិនអាច​កាត់ថ្លៃ​បាន​សម្រាប់​ខ្លួន​យើង ក្រុមគ្រួសារ​យើង និង​ប្រទេសជាតិ​យើង​។

​លោក​រដ្ឋលេខាធិការ​បា​ន​បន្តថា «​ឆ្លៀត​ក្នុងឱកាស​នេះ ខ្ញុំ​សូម​ថ្លែងអំណរគុណ​ដល់​ប្រមុខ​រាជរដ្ឋាភិបាល​សម្តេច​តេ ជោ ហ៊ុន សែន លោក​តែងតែ​យកចិត្តទុកដាក់​ខ្ពស់​ចំពោះ​សុខទុក្ខ​របស់​កីឡាករ​-​កីឡាការិនី​យើង ជាពិសេស​សម្តេច​លោក​នឹង​ផ្តល់​កិត្តិយស​ដ៏​ឧដុង្គឧត្តម​បំផុត អនុញ្ញាត​ដល់​ថ្នាក់ដឹកនាំ គ្រូបង្វឹក កីឡាករ កីឡាការិនី​យើង ក្នុងជំនួប​ជាមួយ​សម្តេច នា​ថ្ងៃទី​៤ ខែមេសា ឆ្នាំ​២០២៣ ខាងមុខនេះ​» ។

​ចំពោះ​ក្រុម​កីឡាករ​-​កីឡាការិនី​វ៉ូ​វី​ណា​ម​ក្រសួងមហាផ្ទៃ​ឈ្នះ​មេដាយមាស ៣ គ្រឿង ប្រាក់ ៣ គ្រឿង និង​សំរិទ្ធ ១ គ្រឿង ក្រុម​កីឡាករ​-​កីឡាការិនី​វ៉ូ​វី​ណា​ម​សែន​សុខ​ឈ្នះ​មេដាយមាស ៣ គ្រឿង និង​សំរិទ្ធ ៣ គ្រឿង ក្រុម​កីឡាករ​-​កីឡាការិនី​វ៉ូ​វី​ណា​ម​ស​ម្ប​តិ្ត​មុន្នី​ឈ្នះ​មេដាយមាស ២ គ្រឿង ប្រាក់ ១ គ្រឿង និង​សំរិទ្ធ ៤ គ្រឿង ក្រុម​កីឡាករ​-​កីឡាការិនី​វ៉ូ​វី​ណា​ម​ក្រសួង​ការពារ​ឈ្នះ​មេដាយមាស ១ គ្រឿង ប្រាក់ ៣ គ្រឿង និង​សំរិទ្ធ ២ គ្រឿង និង​ក្រុម​កីឡាករ​-​កីឡាការិនី​វ៉ូ​វី​ណា​ម​តា​ឡី​ឈ្នះ​មេដាយមាស ១ គ្រឿង និង​សំរិទ្ធ ១ គ្រឿង​៕/R​