​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មន្ត្រី​អាម៉េរិក​ម្នាក់​បាន​និយាយ​កាលពី​ថ្ងៃ​ព្រហស្បតិ៍​ទី​១៩​មករា​ថា នាយក CIA​លោក វី​លលៀម បឺន (William Burns)​បាន​ធ្វើ​ទស្សនកិច្ច​នៅ​ទីក្រុង​គៀវ​​កាលពី​សប្តាហ៍​មុន​ដើម្បី​ជួប​ជាមួយ​ប្រធានាធិបតី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​លេន​ស្គី នៅក្នុង​ឧទាហរណ៍​ចុងក្រោយ​បំផុត​នៃ​ទំនាក់ទំនង​កម្រិត​ខ្ពស់​រវាង​សហរដ្ឋ​អាម៉េរិក​និង​អ៊ុ​យក្រែន​។​

​មន្ត្រី​ដែល​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ បាន​និយាយថា លោកបឺ​ន​បាន​សង្កត់ធ្ងន់លើ “​ការ​បន្ត​គាំទ្រ​របស់​ទីក្រុង​វ៉ាស៊ីនតោន​”​សម្រាប់​អ៊ុយ​​ក្រែន​នៅក្នុង​សង្គ្រាម​។ លោកបឺ​នក៏បាន​ជួប​ជាមួយម​ន្ត្រី​ចារកម្ម​អ៊ុយ​ក្រែន​ផងដែរ​។​

​នាយក CIA បាន​រាយការណ៍​ជូន​លោក​ហ្សេ​លេន​ស្គី​ម្តង​ហើយ​ម្តង​ទៀត​មុន​ពេល​និង​ចាប់​តាំងពី​រុស្ស៊ី​ចាប់ផ្តើម​ការ​លុកលុយ​អ៊ុយ​ក្រែន​កាលពី​ខែ​កុម្ភៈ​កន្លង​ទៅ​ដោយ​បាន​ប្រគល់​ជូន​ការ​រក​ឃើញ​របស់​​ចារកម្ម​អាម៉េរិក​អំពី​ផែនការ​និង​ចេតនា​សង្គ្រាម​របស់​រដ្ឋាភិបាល​ក្រុង​មូ​ស្គូ​។​

​សង្គ្រាម ដែល​ចាប់ផ្តើម​ដោយ​ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន ជិត​ឈាន​ចូល​ឆ្នាំ​ទី​ពីរ​របស់​ខ្លួន​ហើយ ដែល​បណ្តាលឱ្យ​មនុស្ស​រាប់​ម៉ឺន​នាក់​ស្លាប់ និង​មិន​មាន​ដំណោះស្រាយ​ច្បាស់លាស់​នៅឡើយ​ទេ​។ រដ្ឋាភិបាល​ក្រុង​វ៉ាស៊ីនតោន​ហៀបនឹង​បញ្ជូន​ជំនួយ ២,៥ ពាន់​លាន​ដុល្លារ​ផ្សេងទៀត​ឱ្យទៅ​អ៊ុ​យក្រែន រួម​ទាំង​រថពាសដែក Stryker ជា​លើកដំបូង​ផងដែរ​។​

​កិច្ចប្រជុំ​របស់​លោក​បឺនជា​មួយលោក​ហ្សេ​លេ​ន​ស្គី​ត្រូវបាន​រាយការណ៍​ដំបូង​គេ​ដោយ​កាសែត Washington Post ។​

​នាយក CIAបាន​ប្រាប់​កាសែត PBS NewsHour កាលពី​ខែ​មុន​ថា អ្នកវិភាគ​ទីភ្នាក់ងារ CIA បាន​ព្យាករណ៍​ឃើញ “​ការ​បន្ថយល្បឿន​ប្រយុទ្ធ​គ្នា​រវាង​យោធា​ទាំងពីរ នៅពេល​ដែល​រដូវរងា​ឈាន​ចូល​មក​ដល់​”​។​

​លោក​បឺន អតីត​ឯកអគ្គរដ្ឋទូត​អាម៉េរិក​ប្រចាំ​ទីក្រុង​មូ​ស្គូ បាន​និយាយថា “​ខ្ញុំ​មិន​បាន​មើលស្រាល​សូម្បី​ម្តង​ចំពោះ​បន្ទុក​និង​បញ្ហា​ប្រឈម ដែល​សង្គ្រាម​នេះ​បាន​បង្ក​ឡើង​សម្រាប់​អ៊ុយ​ក្រែ​ន​និង​សម្រាប់​យើង​ទាំងអស់គ្នា​ដែល​គាំទ្រ​អ៊ុ​យក្រែន​។ ប៉ុន្តែ​តាម​យុទ្ធសាស្ត្រ ខ្ញុំ​គិតថា ទោះ​តាម​វិធី​ណា​ក៏​ដោយ អ្នក​ដឹង​ទេ រហូត​មកដល់ពេលនេះ សង្គ្រាម​របស់​ពូ​ទីន​គឺជា​បរាជ័យ​សម្រាប់​រុស្ស៊ី​”៕

នាយក CIA លោក វី​លលៀម បឺន​