​ប្រែ​សម្រួលៈ​បំណង​(cgtn)៖ រដ្ឋាភិបាល​អាម៉េរិក​កំពុង​ជួប​វិបត្តិ​កំរិត​ខ្ចីប្រាក់ ហៅ​ថា​ពិ​ដាន​បំណុល​។​ក្រសួង​រតនាគារ​អាម៉េរិក​កំពុង​លៃលក​រកប្រាក់​ដើម្បី​រក្សា​អោយ​រដ្ឋាភិបាល​នៅ​ដំណើរការ​និង​ជៀស​​វាង​ការខកខាន​ក្នុងការ​បំពេញ​កាតព្វកិច្ច​បំណុល​រដ្ឋ នេះ​បើ​តាម​រដ្ឋមន្ត្រី​រតនាគា​រ​អាម៉េរិក​លោកស្រី ចា​ណេត យេ​លឡិន​(Janet Yellen)​។​

​តែ​វិធានការ​របស់​ក្រសួង​រតនាគារ​អាម៉េរិក​នឹង​គ្រាន់តែ​ជួយ​សម្រួល​ការងារ​បាន​បួន​ប្រាំ​ខែ​ទៅ​មុខ ហើយ​បើសិនជា​ពិ​ដាន​បំណុល​នេះ​មិន​ត្រូវបាន​ដំឡើង​ទេ រដ្ឋាភិបាល​នឹង​អស់​លុយ​ចាយវាយ​នោះ​ផល​វិ​​បាក​យ៉ាងណា​នោះ​គ្មាន​នរណា​អាច​ទាយ​បានទេ​។​

​ពិ​ដាន​បំណុល​ជា​កំរិត​ព្រំដែន​មួយ​ដែល​រដ្ឋាភិបាល​អាម៉េរិក​អាច​ខ្ចី​ប្រាក់​មក​បង់​ការចំណាយ​ដូចជា សន្តិសុខ​សង្គម គំរោង​សុខាភិបាល​និង​ប្រាក់ខែ​សំរាប់​អ្នករដ្ឋការ​។​

​កំរិត​បច្ចុប្បន្ន​ឡើងដល់​៣១,៤​ទ្រី​លាន​ដុល្លារ ហើយ​វិធានការ​លៃលក​របស់​ក្រសួង​ង​រតនាគារ​នឹង​អាច​ដោះស្រាយ​បញ្ហា​បាន​ត្រឹម​ថ្ងៃ​៥​មិថុនា ដូច្នេះ​សភា​ត្រូវ​បោះឆ្នោត​ដំឡើង​ពិ​ដាន​បំណុល​នេះ​ក្នុង​រង្វង់​ប្រាំ​​មួយ​ខែ​ទៅ​មុខ​ដើម្បី​បញ្ចៀស​ការខកខាន​បំពេញ​កាតព្វកិច្ច​បំណុល​។​

​តែ​ពួក​អ្នកវិភាគ​បាន​ព្យាករណ៍​ថា សេដ្ឋកិច្ច​អាម៉េរិក​នឹង​រីកចំរើន​កាន់តែ​យឺត​ឬ​គាំង​ដែល​នឹង​ប៉ះពាល់​ពេល​ដែល​សភា​ត្រូវ​ចរចា​ដើម្បី​បង្កើត​កិច្ចព្រមព្រៀង​ថ្មី​។​

​សេត​វិមាន​កំពុង​អំពាវនាវ​អោយ​សភា​ដំឡើង​កំរិត​ខ្ចី​ប្រាក់​នេះ​ដោយ​គ្មាន​លក្ខខណ្ឌ និង​និយាយ​ថា​ខ្លួន​នឹង​មិន​ធ្វើ​សម្បទាន​ឬ​ចរចា​លក្ខខណ្ឌ​ណា​មួយ​ស្តីពី​ការបង្កើន​ពិ​ដាន​បំណុល​នេះ​ទេ​។​នៅ​ពេល​ពួក​​សាធារណរដ្ឋ​ក្នុង​សភា​គាំទ្រ​ការកាត់បន្ថយ​ចំណាយ អ្នកខ្លះ​កំពុង​បារម្ភ​ថា សភា​ដែល​បែកបាក់​មួយ​នឹង​ពិបាក​ស្វែងរក​កិច្ចព្រមព្រៀង​ណាមួយ​លើ​បញ្ហា​នេះ​។​

​រដ្ឋមន្ត្រី​រតនាគា​រ​អាម៉េរិក​បានព្រមានថា ការខកខាន​របស់​រដ្ឋាភិបាល​ក្នុងការ​បំពេញ​កាតព្វកិច្ច​បំណុ​លរបស់​ខ្លួន​នឹង​ប៉ះពាល់​សេដ្ឋកិច្ច​អាម៉េរិក ការរស់នៅ​របស់​ប្រជាជន​និង​ស្ថិរភាព​ហិរញ្ញវត្ថុ​សកល​​ព្រមទាំង​កេរ្តិ៍ឈ្មោះ​(​ក្រេ​ឌី​ត​)​របស់​អាម៉េរិក​។​

​សូមបញ្ជាក់​ថា ពិ​ដាន​បំណុល​នេះ​ត្រូវបាន​ដំឡើង​ប្រមាណ​៨០​លើក​មក​ហើយ​ចាប់តាំងពី​ទសវត្សរ៍​១៩៦០​។​ការសំរេច​បាន​ការដំឡើង​ជា​ថ្មី​ឬ​អត់​មិន​ត្រូវបាន​ធានា​ទេ និង​ថា​តើ​បរាជ័យ​ក្នុង​ការបំពេញ​កាត​ព្វ​​កិច្ច​បំណុល​នឹង​ប៉ះពាល់​សេដ្ឋកិច្ច​អាម៉េរិក​កំរិត​ណា​នោះ​ក៏​គ្មាន​នរណា​អាច​ប៉ាន់ស្មាន​បានដែរ​៕