​ប្រែ​សម្រួល : កញ្ញា​ដា​លី​ស (VNExpress) ៖ ក្រុមហ៊ុន Microsoft Corp កាលពី​ថ្ងៃ​ពុធ​ទី​១៨​មករា​បាន​និយាយថា ខ្លួន​នឹង​លុបបំបាត់​ការងារ​ចំនួន ១០.០០០ និង​សន្សំសំចៃ​ប្រាក់ចំណូល ១,២ ពាន់​លាន​ដុល្លារ ខណៈ​អតិថិជន​ដែល​ប្រើប្រាស់​សេវា Cloud-computing របស់​ខ្លួន​វាយតម្លៃ​ការចំណាយ​របស់​ពួក​គេ​ឡើង​វិញ ហើយ​ក្រុមហ៊ុន​កំពុង​ប្រឈមមុខ​នឹង​វិបត្តិ​សេដ្ឋកិច្ច​។​

​ការបញ្ឈប់​ការងារ​នេះ​បាន​បន្ថែម​ពីលើ​ការបញ្ឈប់​បុគ្គលិក​រាប់​ម៉ឺន​នាក់​ដែល​បាន​ប្រកាស​ក្នុង​ប៉ុន្មាន​ខែ​ថ្មីៗ​នេះ​នៅ​ទូ​ទាំង​វិស័យ​បច្ចេកវិជ្ជា ដែល​បាន​ធ្លាក់ចុះ​បន្ទាប់ពី​មាន​កំណើន​ស្ទុះ​ខ្លាំង​ក្នុងអំឡុង​​ជំងឺ​រាតត្បាត​។​

​ដំណឹង​នេះ​កើតឡើង សូម្បី​តែ​ក្រុមហ៊ុន​បង្កើត​សូ​ហ្វ​វែ​មួយ​នេះ​គ្រោង​នឹង​បង្កើន​ការចំណាយ​លើ​បញ្ញា​សិប្ប​និមិត្ត (AI)​ដែល​ឧស្សាហកម្ម​នេះ​មើលឃើញថា​ជា​ចំណុច​ភ្លឺស្វាង​ថ្មី​។​

​នៅក្នុង​កំណត់ត្រា​មួយ​ទៅ​កាន់​និយោជិត នាយក​ប្រតិបត្តិ​លោក សា​តយ៉ា ណា​ឌែ​ល​ឡា (Satya Nadella) បាន​ព្យាយាម​និយាយ​អំពី​ទស្សនវិស័យ​ផ្សេងគ្នា​សម្រាប់​ផ្នែក​ផ្សេងៗ​នៃ​អាជីវកម្ម​។​

​លោក​បាន​និយាយថា អតិថិជន​ចង់ “​បង្កើន​ប្រសិទ្ធភាព​ការចំណាយ​ឌីជីថល​របស់​ពួកគេ​ដើម្បី​ធ្វើ​បាន​កាន់តែ​ច្រើន​ដោយ​ចំណាយ​កាន់តែ​តិច និង អនុវត្ត​ការចំណាយ​យ៉ាង​ប្រុងប្រយ័ត្ន​ខណៈ​ផ្នែក​ខ្លះ​នៃ​​ពិភពលោក​កំពុង​ស្ថិត​ក្នុង​វិបត្តិ​សេដ្ឋកិច្ច ហើយ​ផ្នែក​ផ្សេង​ទៀត​កំពុង​រំពឹង​មាន​វិបត្តិ​។ ក្នុងពេល​ជាមួយគ្នា​នេះ​ដែរ រលក​នៃ​សេវា Cloud-computing​ដ៏​សំខាន់​បន្ទាប់​កំពុង​កើត​ឡើង​ជាមួយ​នឹង​​ភាពជឿនលឿន​នៃ​បច្ចេកវិជ្ជា AI”​។​

​លោក​ណា​ឌែ​ល​ឡា​បាន​និយាយថា ការបញ្ឈប់​ការងារ ដែល​ប៉ះពាល់​ដល់​កម្លាំង​ការងារ​របស់ Microsoft​តិចជាង​៥​ភាគរយ នឹង​បញ្ចប់​នៅ​ចុង​ខែ​មីនា ជាមួយ​នឹង​ការជូនដំណឹង​ចាប់ផ្តើម​នៅ​ថ្ងៃ​ពុធ​”​។​

​ទោះយ៉ាងណា ក្រុមហ៊ុន Microsoft នឹង​បន្ត​ជួល​បុគ្គលិក​នៅក្នុង “​ផ្នែក​យុទ្ធសាស្ត្រ​” ។ AI ទំនង​ជា​ផ្នែក​មួយ​នៃ​ផ្នែក​ទាំងនោះ​។ លោក​ណា​ឌែ​ល​ឡា​នៅ​សប្តាហ៍​នេះ បាន​លើកសរសើរ AI​ទៅកាន់​មេ​ដឹក​​នាំ​ពិភពលោក ដែល​ជួបប្រជុំគ្នា​នៅ​ទីក្រុង​ដា​វ៉ូស (Davos) ប្រទេស​ស្វីស ដោយ​អះអាង​ថា បច្ចេកវិជ្ជា​នេះ​នឹង​ផ្លាស់ប្តូរ​ផលិតផល​របស់​ខ្លួន​និង​មាន​ឥទ្ធិពល​លើ​មនុស្ស​ជុំវិញ​ពិភពលោក​៕