​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កសិករ​អា​ហ្សង់​ទីន​ម្នាក់​បាន​ដាំ​រូបភាព​ដ៏​ធំ​សម្បើម​របស់​លី​អូ​នែ​ល ម៉េស​ស៊ី លើ​ផ្ទៃដី​ទំហំ ៥០ ហិកតា ដែល​អាច​មើលឃើញ​ពី​ទី​អវកាស​នៅ​ចម្ការពោត​ដែល​ត្រូវបាន​​រចនា​យ៉ាង​ពិសេស​ដើម្បី​អបអរ​ដល់​វីរភាព​បាល់ទាត់​ពិភពលោក​របស់​តារា​រូបនេះ​។​

​លោក ម៉ា​ស៊ី​មី​លី​យ៉ាណូ ស្ពីណា​ហ្សេ (Maximiliano Spinazze) បាន​ប្រើ​រូបមន្ត​គណនា​កន្លែង​ដែល​គ្រាប់ពូជ​ត្រូវ​ដាំ​នៅក្នុង​ចម្ការ​របស់​គាត់​នៅ​តំបន់​ឡូ​ស​ខុន​ដូ​រ៉េស (Los Condores) ក្នុង​ខេត្តខ័​រ​ដូ​បា (Cordoba) ភាគ​កណ្តាល​ប្រទេស​អា​ហ្សង់​ទីន​។​

​លទ្ធផល​គឺ​ជា​រូបភាព​ដ៏​ធំ​សម្បើម​នៃ​ម៉េស​ស៊ីមា​ន​ពុកចង្កា ដែល​មើលឃើញ​ពី​លំហ​អាកាស​។ ការ​ឧទ្ទិស​ដ៏​មិន​គួរ​ឱ្យ​ជឿ​ចំពោះ​កីឡាករ​បាល់ទាត់​ដ៏​អស្ចារ្យ​រូបនេះ​បាន​កើត​ឡើង​បន្ទាប់ពី​រូបគេ​បាន​ជួយ​​អា​ហ្សង់​ទីន​ឱ្យ​ទទួលបាន​ជ័យជម្នះ​ដ៏​ល្បី​ក្នុងវើ​លខាប់​លើ​ក្រុម​បារាំង​ក្នុង​ប្រទេស​កាតា​។​

​លោកស្ពី​ណា​ហ្សេ កសិករ​ដែល​រំលេច​ចម្ការពោត​ចេញ​ជា​រូប​មិន​ធម្មតា​មួយ​នេះ បាន​និយាយថា “​សម្រាប់​ខ្ញុំ ម៉េស​ស៊ីគឺ​គ្មាន​អ្នកណា​អាច​យកឈ្នះ​បានឡើយ​។​ឥឡូវ ពួកគេ​ជា​ម្ចាស់​ជើងឯក​ពិភពលោក ខ្ញុំ​​ពិតជា​រីករាយ​ដែល​នេះ​អាច​បញ្ចេញ​បាន​តាមរយៈ​ការដាំ​ដំណាំ​”​។​

​ប្រទេស​អាម៉េរិក​ខាងត្បូង​ដែល​ង​ប់ង​ល់នឹង​បាល់ទាត់​មួយ​នេះ​គឺជា​អ្នក​ផលិត​កសិផល​ធំ​បំផុត​មួយ​លើ​ពិភពលោក ពោល​គឺជា​អ្នក​ផលិត​ពោត​ធំជាងគេ​ទី​៣​លើ​សកលលោក​៕

ចម្ការពោត​របស់​លោក​ស្ពីណា​ហ្សេ​មើលឃើញ​ជា​រូប​ម៉េស​ស៊ីពី​លំហ​អាកាស