​ប្រែ​សម្រួលៈ​បំណង​(​ស្ត្រេត​ថែមស៍​)៖ ហ្វាំង​ឡង់​កាលពី​ថ្ងៃ​សុក្រ​ទី​២០​មករា​បាន​ប្រកាស​ផ្តល់​ជំនួយ​យោធា​តំលៃ​៤០០​លាន​អឺរ៉ូ​ដល់​អ៊ុយ​ក្រែន​រួម​មាន​កាំភ្លើង​ធំ តែ​មិន​មាន​រថក្រោះ​Leopard​ទេ​។​

​រដ្ឋមន្ត្រី​ការពារ​ជាតិ​ហ្វាំង​ឡ​ង់​លោក មី​កកូ សា​វ៉ូ​ឡា​(Mikko Savola)​បាន​និយាយ​ក្នុង​សេចក្តីថ្លែងការណ៍​មួយ​ថា « អ៊ុយ​ក្រែន​បន្ត​ត្រូវការការ​គាំទ្រ​ដើម្បី​ការពារ​ទឹកដី​របស់​ខ្លួន​»​។​លោក​មិន​បាន​​បញ្ចេញ​ព័ត៌មាន​ពិស្តារ​អំពី​ជំនួយ​ទេ តែ​ថា​វា​មិន​រួម​មាន​រថក្រោះ​ប្រយុទ្ធ​Leopard​ទេ​។​

​វា​ជា​ជំនួយ​ជា​សម្ភារ​សឹក​លើក​ទី​១២​របស់​ប្រទេស​ក្នុង​តំបន់ន័​រ​ឌិក​នេះ​សំរាប់​អ៊ុ​យក្រែន​ ហើយជំនួយ​១១​លើក​កាលពីមុន​មាន​តំលៃ​សរុប​១០៩​លាន​អឺរ៉ូ​។​

​ក្រសួងការពារជាតិ​ហ្វាំង​ឡ​ង់​នៅថ្ងៃនេះក៏បាន​និយាយថា ហ្វាំង​ឡង់​នឹង​ចុះហត្ថលេខា​ជាមួយ​ស៊ុយអែត​ស្តីពី​ការគាំទ្រ​អ៊ុ​យក្រែនដើម្បី​អោយ​ប្រាកដថា ជំនួយ​សំរាប់​អ៊ុយ​ក្រែ​ននឹង​មិន​បង្ក​គ្រោះថ្នាក់​ដល់​វិស័យ​ការពារ​​ជាតិ​នៃ​ប្រទេស​ទាំង​ពីរ​។​

​កាលពី​ថ្ងៃ​ព្រហស្បតិ៍ ស៊ុយអែត​បាន​សន្យា​បញ្ជូន​អោយ​អ៊ុយ​ក្រែ​ននូវ​ប្រព័ន្ធ​កាំភ្លើង​ធំ​Archer​របស់ខ្លួន ដែល​រដ្ឋាភិបាល​ទីក្រុង​គៀវ​ស្នើសុំ​អស់​ពេល​រាប់​ខែ​មក​ហើយ រួមជាមួយ​នឹង​រថពាសដែក​និង​កាំ​ជ្រួច​​ប្រឆាំង​រថក្រោះ​។​

​សម្ពាធ​ក៏​កំពុង​កើនឡើង​ពី​សម្ពន្ធមិត្ត​អឺរ៉ុប​លើ​អាល្លឺម៉ង់​ដើម្បី​អនុញ្ញាត​អោយ​បញ្ជូន​ចេញ​រថក្រោះ​Leopardរបស់អាល្លឺម៉ង់ដែល​កងកម្លាំងប្រដាប់អាវុធ​ក្នុង​ប្រទេស​ជាច្រើន​លើ​លោក​កំពុង​ប្រើ រួមមាន​​ហ្វាំង​ឡ​ង់​។​

​រដ្ឋមន្ត្រីការបរទេស​ហ្វាំង​ឡង់​លោក ប៉េក​កា ហា​អា​វី​ស្តូ​( Pekka Haavisto)​បាន​និយាយ​កាលពី​ថ្ងៃ​អង្គារ​ថា «​យើង​សង្ឃឹមថា​ការសំរេចចិត្ត​បញ្ជូន​Leopard​នឹង​ក្លាយជា​ការពិត​និង​ហ្វាំង​ឡ​ង់​ត្រៀម​​ដើរតួនាទី​របស់​ខ្លួន​ក្នុង​ការគាំទ្រ​ដំណើរការ​នេះ​៕

​ហ្វាំង​ឡង់​ត្រៀម​ផ្តល់​កាំភ្លើង​ធំ​Caesar​ទៅអោយ​អ៊ុ​យក្រែន