ដោយៈ សុផល / ភ្នំពេញ​៖ លោក អូ​លី​វ្យេ បិ​ច Olivier Becht រដ្ឋមន្ត្រី​ប្រតិភូ នៃ​ក្រសួង​អឺរ៉ុប និង​ការបរទេស​បារាំង ទទួលបន្ទុក​ពាណិជ្ជកម្ម​ក្រៅប្រទេស ការទាក់ទាញ​វិនិយោគិន និង​ជនជាតិ​បារាំង​នៅ​បរទេស នឹង​អញ្ជើញ​មក​បំពេញ ទស្សនកិច្ច នៅ​ប្រទេស​កម្ពុជា នៅ​ថ្ងៃ​អង្គារ ទី​២៤ និង​ថ្ងៃ​ពុធ ទី​២៥ ខែមករា ឆ្នាំ​២០២៣ ខាងមុខ ក្នុង​គោលដៅ​ពង្រឹង​កិច្ចសហប្រតិបត្តិការ​សេដ្ឋកិច្ច រវាង​ប្រទេស​បារាំង និង​កម្ពុជា​។​

​ដំណើរ​ទស្សនកិច្ច​នេះ ធ្វើឡើង​បន្ទាប់​ជំនួប​រវាង សម្តេចនាយក​រដ្ឋមន្ត្រី ហ៊ុន សែន និង​លោក​ប្រធានាធិបតី​បារាំង អេ​ម៉ា​នុយ​អ៊ែ​ល ម៉ា​ក្រុង នៅ​ទីក្រុង​ប៉ារីស កាលពី​ថ្ងៃទី​១៣ ខែធ្នូ ឆ្នាំ​២០២២ កន្លងទៅ​។ នេះ​បើ​យោងតាម​សេចក្តីប្រកាស ព័ត៌មាន របស់​ស្ថានទូត​បារាំង ប្រចាំ​នៅ​កម្ពុជា នា​ថ្ងៃទី​២០ ខែមករា នេះ​។​

​អមដំណើរ​ដោយ​គណៈប្រតិភូ​ធុរជន ដឹកនាំ​ដោយ​សហព័ន្ធ​ធុរកិច្ច​បារាំង MEDEF International និង Business France លោក អូ​លី​វ្យេ បិ​ច នឹង​ជួបពិភាក្សា​ការងារ​ជាមួយ ថ្នាក់ដឹកនាំ​នយោបាយ​កម្ពុជា ជាច្រើនរូប រួមមាន សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ កម្ពុជា លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម និង​លោក សុខ ចិន្តា​សោភា រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​អគ្គលេខាធិការ ក្រុមប្រឹក្សា​អភិវឌ្ឍន៍​កម្ពុជា​។

​ក្នុង​ដំណើរ​ទស្ស​និច្ច​នេះ លោក​រដ្ឋមន្ត្រី​ប្រតិភូ នឹងមាន​ជំនួប​ផ្សេងៗ ជាមួយ សហគមន៍​បារាំង​នៅ​កម្ពុជា ពិសេស​តំណាង​សហគមន៍​ធុរកិច្ច​បារាំង​ដ៏​រស់​រវើក​។ ប្រជាពលរដ្ឋ​បារាំង ចំនួន ៥ ០០០ នាក់ ដែល​កំពុង​រស់នៅ​កម្ពុជា បាន​ចុះបញ្ជី ជាមួយ​ស្ថានទូត​។

លោក អូ​លី​វ្យេ បិ​ច Olivier Becht រដ្ឋមន្ត្រី​ប្រតិភូ នៃ​ក្រសួង​អឺរ៉ុប និង​ការបរទេស​បារាំង ទទួលបន្ទុក​ពាណិជ្ជកម្ម​ក្រៅប្រទេស ការទាក់ទាញ​វិនិយោគិន និង​ជនជាតិ​បារាំង​នៅ​បរទេស

​សេចក្តីប្រកាស​ពត៌មាន​ដដែល​នេះ បានឱ្យដឹងថាៈ លោក​រដ្ឋមន្ត្រី​ប្រតិភូ នឹងចូលរួម ពិធី​បញ្ចុះបឋមសិលា សាងសង់​ឡើងវិញ នូវ​ស្តូប​រំលឹក​ដល់​វិញ្ញាណក្ខន្ធ​យុទ្ធជន ពលី​កម្ពុជា និង​បារាំង នៅក្នុង​សង្គ្រាមលោកលើកទី​១ តាម​ការសម្រេច​របស់ រាជរដ្ឋាភិបាល​កម្ពុជា ដែល​នឹង​ប្រព្រឹត្តិ​ទៅ ក្រោម​វត្តមាន​របស់លោក​ឧបនាយក រដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី នគរូបនីយកម្ម និង​សំណង់ និង​លោកស្រី ភឿង ស​កុ​ណា រដ្ឋមន្ត្រីក្រសួង​វប្បធម៌ និង​វិចិត្រសិល្បៈ​។​

​ក្រៅពីនេះ លោក អូ​លី​វ្យេ​បិ​ច នឹង​ទៅពិនិត្យ​ដំណើរការ​សាងសង់​រោង​ចក្រ​ប្រព្រឹត្ត កម្ម​ទឹកស្អាត​បាក់​ខែង ដែល​ទទួលបាន​ហិរញ្ញប្បទាន ពី​ទីភ្នាក់ងារ​បារាំង សម្រាប់​ការអភិវឌ្ឍ (AFD) ធនាគារ​វិនិយោគ​អឺរ៉ុប និង​សហភាព​អឺរ៉ុប ។ នៅ​សៀមរាប លោក​នឹង​ទស្សនា​ប្រាសាទ​អង្គរ ជាពិសេស​ការដ្ឋាន​ជួសជុល ប្រាសាទ មេបុណ្យ​ខាងលិច ដែល​ផ្តល់​ហិរញ្ញវត្ថុ ដោយ​ប្រទេស​បារាំង​។

​ដំណើរ​ទស្សនកិច្ច​នេះ បង្ហាញ​ពី​ការប្តេជ្ញាចិត្ត​កាន់តែខ្លាំង​ឡើងៗ​របស់​ប្រទេស បារាំង នៅ​តំបន់​អាស៊ាន ដែល​ឆ្លុះបញ្ចាំង​ឱ្យឃើញ តាមរយៈ​ការចូលរួម​របស់លោក ប្រធានាធិបតី​បារាំង ក្នុង​កិច្ចប្រជុំ​កំពូល​ប្រទេស G20 កាលពី​ចុងឆ្នាំ​២០២២ នៅ​កោះ​បាលី និង​កិច្ចប្រជុំ​សហប្រតិបត្តិការ​សេដ្ឋកិច្ច​អាស៊ី​ប៉ាស៊ីហ្វិក (APEC) នៅ​ទីក្រុង​បាងកក​។​

​អាស៊ីអាគ្នេយ៍ គឺជា​តំបន់​សំខាន់​មួយ នៃ​យុទ្ធសាស្ត្រ​បារាំង នៅ​ឥណ្ឌូ​-​ប៉ាស៊ីហ្វិក ដោយសារ​តំបន់​នេះ គឺជា​ទីតាំង​រស់​រវើក​ជាងគេ​បំផុត ក្នុង​ពិភពលោក បើ​និយាយ​ពី ទិដ្ឋភាព​សេដ្ឋកិច្ច ដោយមាន​អត្រាកំណើន​ខ្ពស់ ហើយ​អាស៊ាន គឺជា​ដៃគូ​ពាណិជ្ជកម្ម លំដាប់​ទី​៣ របស់​សហភាព​អឺរ៉ុប​៕/V​