ដោយៈ​មុនី​រ័ត្ន​/​ភ្នំពេញ​៖​អ្នកតាមដាន​ព្រឹត្តិការណ៍​នយោបាយ​នៅ​កម្ពុជា​បាន​ហៅ​ការចេញ​សេចក្តីថ្លែងការណ៍​របស់​គណបក្ស​ភ្លើងទៀន និង​ក្រុម​អង្គការ​សង្គម​ស៊ីវិល​មួយចំនួន​តូច ទាក់ទង​ទៅ​និង​ការចាប់ខ្លួន​លោក ថាច់ សេដ្ឋា​ដែល​បាន​ប្រព្រឹត្ត ខុសច្បាប់ គឺ​គ្មាន​ការទទួលខុសត្រូវ​នូវ​ទង្វើ​ដ៏​គម្រក់​របស់​មេដឹកនាំ​បក្សនយោបាយ​របស់ខ្លួន​។ ការចាប់ខ្លួន​នេះ (​ថាច់​សេដ្ឋា​)​គឺជា​រឿង​ដែល​ត្រូវអនុវត្ត​ច្បាប់​ឱ្យ​ស្មើភាព​គ្នា​ចំពោះមុខ​ច្បាប់ មិន​ថា​អ្នកឯង​ជា​អ្នកនយោបាយ ជា​មេដឹកនាំ​គណបក្សនយោបាយ ឬ​ជា​អ្នកណា​ទេ ពីព្រោះ​ច្បាប់​អត់​បានលើកឡើង អត់​មានការ​អនុគ្រោះ​ចំពោះ​បុគ្គល​ណា​ម្នាក់​ទេ​។

លោក សួន សេរីរដ្ឋា (រូបថតឯកសារ)

​ប្រធាន​ក្រុមប្រឹក្សាភិបាល​វេទិកា​សន្តិភាព​កម្ពុជា និង​ជា​អ្នកតាមដាន​ព្រឹត្តិការណ៍​នយោបាយ លោក​សួន សេរី​រដ្ឋា បាន​ថ្លែងប្រាប់​រស្មី​កម្ពុជា​ថា បើ​មើល​ទៅលើ​ខ្លឹមសារ​នៃ​សេចក្តីថ្លែងការណ៍​របស់​គណបក្ស​ភ្លើងទៀន រួមជាមួយ​នឹង​ប្រតិកម្ម​របស់​ក្រុម​អង្គការ​សង្គម​ស៊ីវិល​មួយចំនួន​ដែល​ប្រើប្រាស់​អង្គការ​សង្គម​ស៊ីវិល​ជា​កន្ទប​ដើម្បី​គ្របដណ្តប់​លើ​សកម្មភាព​នយោបាយ​លាក់​មុខ​របស់ខ្លួន​បម្រើ​គណបក្សនយោបាយ​របស់​ពួកគេ​នោះ ។គឺ​ឃើញ​យ៉ាងច្បាស់​ថា ទាំង​ថ្នាក់ដឹកនាំ​គណបក្ស​ភ្លើងទៀន និង​ក្រុម​អង្គការ​សង្គម​ស៊ីវិល​ទាំងអស់នេះ គឺ​បាន​ប្រតិកម្ម និង​បានធ្វើ​សេចក្តីថ្លែងការណ៍ ទាំង​មិនមាន​ការទទួលខុសត្រូវ​នៅ​ចំពោះមុខ​ច្បាប់ និង​ទាំង​ចេតនា​មិន​ចង់​ឱ្យ​មានការ​អនុវត្ត​ច្បាប់​ស្មើភាព​គ្នា​ចំពោះមុខ​ច្បាប់​ទេ​។ ពីព្រោះ​ករណី​លោក​ថាច់ សេដ្ឋា នេះ គឺ​អត់​ខុសពី​ករណី​អ្នករកស៊ី អ្នកជំនួញ​ជួញដូរ​ផ្សេងៗ​ទៀត ដែល​បាន​បោកប្រាស់​រំលោភ​លើ​សេចក្តីទុកចិត្តរ​បស់ដៃ​គូ​ខ្លួន​ដែល​ប្រើប្រាស់​សែក​គ្មាន​ទឹកប្រាក់ (​សែក​ស្អុយ​) សម្រាប់​ទូទាត់​របស់របរ​ដែល​ត្រូវ​ទិញ ឬ​សំណង​ដែល​ត្រូវ​សង​។

លោកបន្តថា ​នៅ​កម្ពុ​ជាមាន​ករណីនេះ​ច្រើនណាស់​ដែល​អ្នករកស៊ី​អ្នក​ធុរកិច្ច អាជីវករ​មួយចំនួន​ដែល​ប្រើប្រាស់​សែក​គ្មាន​ទឹកប្រាក់​នេះ ដើម្បី​ទូទាត់​ដោះស្រាយ​ទិញដូរ ក៏ប៉ុន្តែ​ដល់ពេល​ដែល​ដៃគូ​ទទួល​សែក​អត់​អាច​បើក​លុយ​បាន​គេ​ប្តឹង​ដាក់គុក​ជាច្រើន​។ នេះ​គឺជា​រឿង​ដែល​ត្រូវអនុវត្ត​ច្បាប់​ឱ្យស្មើភាព​គ្នា​នៅ​ចំពោះមុខ​ច្បាប់ មិន​ថា​អ្នកឯង​ជា​អ្នកនយោបាយ ជា​មេគណបក្សនយោបាយ ជា​អ្នកណា​ទេ ពីព្រោះ​ច្បាប់​អត់​បាន​លើកលែង អត់​មានការ​អនុគ្រោះ ចំពោះ​បុគ្គល​ណា​ម្នាក់​ទេ​។ ហើយ​ប្រព័ន្ធតុលាការ​ដែលជា​អង្គការ​នីតិ​វិនិច្ឆ័យ គឺមាន​កាតព្វកិច្ច​ទទួល​ពាក្យបណ្តឹង​ពី​ជនរងគ្រោះ ពិនិត្យឃើញ​អង្គហេតុ និង​អង្គច្បាប់​ច្បាស់លាស់ គឺ​សម្រេចសេចក្តី​ទៅតាម​ច្បាប់​ដែល​បាន​អនុវត្ត​។

​លោក​បាន​បន្តថា ផ្ទុយទៅវិញ​បើ​មើល​ខ្លឹមសារ​នៃ​សេចក្តីថ្លែងការណ៍​របស់​ថ្នាក់ដឹកនាំ​គណបក្ស​ភ្លើងទៀន និង​ប្រតិកម្ម​ក្រុម​អង្គការ​សង្គម​ស៊ីវិល​ដែល​ធ្វើ​នយោបាយ​លាក់​មុខ​គាំទ្រ​ពួកគេ​នោះ គឺជា​ក្រុម​ដែល​មិន​ទទួលខុសត្រូវ​នូវ​ទង្វើ​ដ៏​គម្រក់ ដ៏​លាមក​របស់​មេដឹកនាំ​បក្សនយោបាយ​របស់ខ្លួន ដែល​ពួកគេ​តែងតែ​ស្រែក​ឱ្យ​រាជរដ្ឋាភិបាល​ពង្រឹង​អនុវត្ត​នីតិរដ្ឋ ចង់​ឱ្យ​រដ្ឋាភិបាល​លុបបំបាត់​វប្បធម៌​រួច​ទោស​។ ប៉ុន្តែ​នៅពេលដែល​ពួក​គ្នីគ្នា​របស់​ពួកគេ​ត្រូវ​ជាប់ទោស​គេ​បែរជា​ទាមទារ​ឱ្យដោះលែង​ឱ្យមាន​សេរីភាព​ដោយ​គ្មាន​លក្ខខណ្ឌ​។ ពាក្យ​ទាមទារឱ្យ​ដោះលែង​ដោយ​គ្មាន​លក្ខខណ្ឌ​នេះ​មិនមែនជា​លើក​ទី​១​ទេ វា​ក្លាយទៅជា​វប្បធម៌​របស់​ពួកនេះ​ទៅហើយ​ ហើយឱ្យ​តែ​ករណី​ដែល​ពាក់ព័ន្ធ​ទៅ​និង​ក្រុម​របស់​ពួកគេ​បើទោះបី​ជាមាន​ភស្តុតាង មាន​ឯកសារ បទល្មើស​ជាក់ស្តែង​រំលោភច្បាប់ បំពាន​ច្បាប់ ធ្វើ​ខុសច្បាប់ គឺ​គេ​តែងតែ​យក​វប្បធម៌​ទាមទារ​ឱ្យ​ដោះលែង​ដោយ​គ្មាន​លក្ខខណ្ឌ​យកមក​ស្រែក​បន្ត​គ្នា​បន្ទរ​គ្នា ដើម្បី​ដាក់បន្ទុក ឬ​គាបសង្កត់​មលរាជ​រដ្ឋាភិបាល ដើម្បី​កុំ​ឱ្យរាជរដ្ឋាភិបាល​អាចអនុវត្ត​ច្បាប់​ដែល​សភា​អនុម័ត​បាន ហើយ​កុំ​ឱ្យតុលាការ​អនុវត្ត​នីតិវិធី​ទៅរួច នេះ​ជា​ច​រិ​ត​វប្បធម៌​របស់​ពួកគេ​ដែល​តែងតែ​លើកឡើង​ដដែលៗ​បែប​នឹង​។​

​អ្នកតាមដាន​ព្រឹត្តិការណ៍​នយោបាយ​រូបនេះ​បាន​អះអាងថា “​រឿងនេះ​គឺជារឿង​បុគ្គល​សុទ្ធសាធ អត់​មាន​ពាក់ព័ន្ធ​រឿង​នយោបាយ​ទេ ថ្វី​ត្បិត​បុគ្គល​នោះ​គឺជា​អនុប្រធាន​របស់​គណបក្ស​នយោបាយ ជា​អ្នកនយោបាយ ក៏ប៉ុន្តែ​រឿង​ដែល​ទិញដូរ​គេ​ហើយ​ចេញ​សែក​អត់លុយ ។សែក​ស្អុយ ហើយ​មិន​ព្រម​ដោះស្រាយ មិន​ព្រម​បង់លុយ​បង់​កាក់​ឱ្យ​គេ គឺជា​រឿង​បុគ្គល​សុទ្ធសាធ​ដែល​មិនមាន​ការទទួលខុសត្រូវ​ចំពោះ​អ្វីដែល​ខ្លួន​បានធ្វើ អីចឹង​ច្បាប់​ត្រូវតែ​អនុវត្ត​ឱ្យស្មើភាព​គ្នា មិន​ថា​អ្នកឯង​ជា​អ្នកនយោបាយ មិន​ចំពោះ​ថា​អ្នកឯង​ជា​អ្នកណា​ទេ ហើយ​កុំ​និយាយ​លើកឡើងថា រឿង​នឹង​កើតឡើង​យូរហើយ រឿង​ជំពាក់​លុយ​គេ​អត់​សង​នេះ មិនមែន​យូរហើយ​ត្រូវ​បំភ្លេចចោល​ទេ យូរហើយ​ក៏​វា​ត្រូវតែ​នៅ​ជា​ធរមាន​ដែរ ពីព្រោះ​ជំពាក់​លុយ​គេ ហើយ​ចេញ​សែក​សង​គេ សែក​អត់លុយ​”​។
​ប្រភព​ដដែល​បាន​សង្កត់ធ្ងន់ថា ការលើកឡើង​របស់​គ​ណ​បក្ស​ភ្លើងទៀន និង​ក្រុម​សង្គម​ស៊ីវិល គឺជា​ចេតនា​មួយ​កុំ​ឱ្យកម្ពុជា​មានការ​អនុវត្ត​ច្បាប់ ហើយ​ចង់​ឱ្យកម្ពុជា​បន្ត​ឲ្យ​មាននៅ​វប្បធម៌​រួច​ទោស​ចំពោះ​ជន​ទាំងឡាយណា​ដែល​បាន​កំពុងតែ​រំលោភច្បាប់ និង​ធ្វើ​ខុសច្បាប់​ ហើយ​គេ​មិន​ចង់​ឱ្យកម្ពុជា​ក្លាយទៅជា​ប្រទេស​នីតិរដ្ឋ​ទេ ចំពោះ​ការអនុវត្ត​ច្បាប់​ដែល​ពាក់ព័ន្ធ​ប៉ះពាល់​ទៅលើ​ក្រុម​អ្នកនយោបាយ​របស់​ពួកគេ​។ គេ​តែងតែ​ចោទប្រកាន់​មកលើ​អ្នកអនុវត្ត​ច្បាប់​ថា​ជា​រឿង​មិន​ត្រឹមត្រូវ ហើយ​តែងតែ​ទាមទារ​ឲ្យ​មានការ​ដោះលែង​ដោយ​គ្មាន​លក្ខខណ្ឌ ដែល​នេះ​ជា​ទម្លាប់​វប្បធម៌​អាក្រក់​បំផុត​របប​ស់​ពួកនេះ តែងតែ​ធ្វើ​ដដែលៗ​កន្លងមក ហើយ​មកដល់ពេលនេះ គឺ​នៅតែ​បន្ត​អនុវត្ត​។​

លោក ថាច់ សេដ្ឋា ពេលឃាត់ខ្លួន(រូបថតសមត្ថកិច្ច)

​សូមជម្រាបថា កាលពី​ថ្ងៃទី​១៦ ខែមករា ឆ្នាំ​២០២៣ កងកម្លាំង​នគរបាល​នៃ​ស្នងការដ្ឋាន​នគរបាល​រាជធានី​ភ្នំពេញ បានធ្វើការ​ឃាត់ខ្លួន​លោក ថាច់ សេដ្ឋា ដោយ​អនុវត្ត​ទៅតាម​ដីកា​បង្គាប់​ឲ្យ​នាំខ្លួន​របស់​ចៅក្រម​ស៊ើបសួរ​សាលាដំបូង​រាជធានី​ភ្នំពេញ​លេខ ចុះ​ថ្ងៃទី​១៦ ខែមករា ឆ្នាំ​២០២៣​។ ការឃាត់ខ្លួន​នេះ បន្ទាប់ពី​តំណាង​អយ្យការ​បានទទួល​ពាក្យបណ្តឹង​ពី​ក្រុមហ៊ុន រិ​ន ឆាយ ផន​សប ដែល​បាន​ប្តឹង​លោក ថាច់ សេដ្ឋា ពាក់ព័ន្ធ​ការចេញ​សែក​គ្មាន​សាច់ប្រាក់​។

​យោងតាម​សេចក្តីប្រកាស​ព័ត៌មាន​របស់​អ្នកនាំពាក្យ​នៃ​អយ្យការ​អម​សាលាដំបូង​រាជធានី​ភ្នំពេញ​កាលពី​ថ្ងៃទី​១៦ ខែមករា បាន​ឲ្យ​ដឹងថា ៖ កាលពី​ថ្ងៃទី​២៦ ខែវិច្ឆិកា ឆ្នាំ​២០១៩ តំណាង​អយ្យការ​បានទទួល​ពាក្យបណ្តឹង​ពី​ក្រុមហ៊ុន រិ​ន ឆាយ ផន​សប បាន ប្តឹង​ពី​ឈ្មោះ ថាច់ សេដ្ឋា ភេទ​ប្រុស ពីបទ​៖ មិន​បំពេញ​កាតព្វកិច្ច​ចំពោះ​ឧបករណ៍​អាច​ជួញដូរ បាន (​ការចេញ​សែក​ដោយ​គ្មាន​សាច់ប្រាក់​ចំនួន ០៥​សន្លឹក​) ។ បន្ទាប់ពី​បានធ្វើការ​ស៊ើបអង្កេត ស្តាប់​ចម្លើយ​របស់​ភាគី​ពាក់ព័ន្ធ​ព្រមទាំង​ពិនិត្យ​លើ​ភស្តុតាង​នានា​តាម​នីតិវិធី​រួចមក អយ្យការ​អម សាលាដំបូង​រាជធានី​ភ្នំពេញ បានសម្រេច​បើក​ការ​ស៊ើបសួរ​លើ​ឈ្មោះ ថាច់ សេដ្ឋា ភេទ​ប្រុស ពីបទ​៖ មិន​បំពេញ​កាតព្វកិច្ច​ចំពោះ​ឧបករណ៍​អាច​ជួញដូរ​បាន ប្រព្រឹត្ត​នៅ​រាជធានី​ភ្នំពេញ កាលពី កំឡុង​ឆ្នាំ​២០១៩ បទល្មើស​ដែលមាន​ចែង​ឲ្យ​ផ្ដន្ទាទោស​តាម​បញ្ញត្តិ​មាត្រា ២៣១ នៃ​ច្បាប់​ស្តីពី ឧបករណ៍​ដែល​អាច​ជួញដូរ​បាន និង​ប្រតិបត្តិការ​ទូរ​ទាត់​សង​ប្រាក់ តាម​ដីកា​សន្និដ្ឋាន​ប​ញ្ចូ​ន​រឿង ឲ្យ​ស៊ើបសួរ​លេខ ២០២៣ អយ​ញ ចុះ​ថ្ងៃទី​២២ ខែមេសា ឆ្នាំ​២០២១ ។​

​ក្នុងដំណាក់កាល​ស៊ើបសួរ ជន​ត្រូវ​ចោទ​ឈ្មោះ ថាច់ សេដ្ឋា ខកខាន​មិនបាន​ចូលខ្លួន​បំភ្លឺ តាម​ដីកា​បង្គាប់​ឲ្យ​ចូលខ្លួន​ចំនួន ០២​លើក របស់​ចៅក្រម​ស៊ើបសួរ​ដែលមាន​លេខ ៦៤ “​ម​” ព្រ​.​ទ ចុះ ថ្ងៃទី​២៨ ខែកុម្ភៈ ឆ្នាំ​២០២១ និង​ដីកា​បង្គាប់​ឲ្យ​ចូលខ្លួន​លេខ ១៩ “​ឈ​១”​ព្រ​.​ទ ចុះ​ថ្ងៃទី​២២ ខែមិថុនា ឆ្នាំ​២០២១ ដោយ​ពុំមាន​មូលហេតុ ។ រហូតមកដល់​ថ្ងៃទី​១៦ ខែមករា ឆ្នាំ​២០២៣ ចៅក្រម​ស៊ើបសួរ បានសម្រេច​ចេញ​ដីកា​បង្គាប់​ឲ្យ​នាំខ្លួន​លើ​ជន​ត្រូវ​ចោទ ថាច់ សេដ្ឋា ដើម្បី​ស្តាប់​ចម្លើយ​តាម​នីតិ វិធី ក្រោយពី​បាន​ស្តាប់​ចម្លើយ​និង​ពិនិត្យ​លើ​ភស្តុតាង​នានា ចៅក្រម​ស៊ើបសួរ​បានសម្រេច ឃុំខ្លួន​ជន​ត្រូវ​ចោទ ថាច់ សេដ្ឋា តាម​ដីកា​បង្គាប់​ឲ្យ​ឃុំខ្លួន​លេខ ៤១២ “​ឈ​១” ដ​.​ឃ​.​ដ ចុះ​ថ្ងៃទី​១៦ ខែមករា ឆ្នាំ​២០២៣ ៕សរន