​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ក្រុម​ហង្ស​ក្រហម Liverpool​និង តោ​ខៀវ Chelsea ដែល​កំពុង​លេង​អន់​ដូចគ្នា នឹង​ប្រយុទ្ធ​គ្នា​ដើម្បី​៣​ពិន្ទុ​នៅ​ទឹកដី Anfield នៅ​ក្បាល​ព្រលប់​ថ្ងៃ​សៅរ៍​នេះ ក្នុងពេល​ដែល​តោ​ខៀវ​មានលទ្ធភាព​ឈ្នះ​ឬ​ស្មើ​តិច​ខ្លាំង​ណាស់​នៅ​ទឹកដី​របស់​ហង្ស​ក្រហម​ក្នុង​ការប្រកួត EPL​។ ទន្ទឹមនេះ West Ham ដែល​កំពុង​ត្រដរខ្យល់​នៅ​បាត​តារាង​នឹង​ស្វាគមន៍​ក្រុម​បាត​តារាង​​ដូចគ្នា Everton ខណៈ​បរាជ័យ​ណាមួយ​កើតឡើង​នឹង​មានន័យថា គ្រូបង្វឹក​របស់​ពួកគេ​អាច​នឹង​ខ្ទាត​ចេញពី​តំណែង​។

​ដោយឡែក ក្រុម​កាំភ្លើង​ធំ Arsenal នឹង​បើកទ្វារ​ផ្ទះ​ទទួល​ក្រុម Man U ក្នុង EPL នៅ​ថ្ងៃអាទិត្យ ដោយ​រំពឹង​វាយលុក​យកឈ្នះ​លើ​បិសាច​ក្រហម​ឱ្យខាងតែបាន ដើម្បី​ពង្រឹង​ការ​នាំមុខ ៨ ពិន្ទុ​លើ​កំពូល​តារាង​របស់​ពួកគេ​។

​ការព្យាករណ៍ ៖

– Liverpool vs Chelsea

* Liverpool ចាញ់ Chelsea តែ​ម្តង​គត់​ក្នុង​ជំនួប ៧ លើកចុងក្រោយ​។​
* Chelsea បាន​ចាញ់ ៦ ប្រកួត​ក្នុងចំណោម ៩ ប្រកួត​ចុងក្រោយ​របស់​ពួកគេ​នៅ​ក្នុង​ការប្រកួត​ទាំងអស់​។​
* ៦ ប្រកួត​ក្នុងចំណោម ៨ លើក​ចុងក្រោយ​របស់ Liverpool គឺ​មាន​ការ​ស៊ុត​ចូល​គ្នា​ទៅវិញទៅមក​។​
* Mo Salah ស៊ុត​ចូល​ទាំង​២​ប្រកួត​រវាង​ក្រុម​ទាំង​ពីរ​កាល​ពី​រដូវ​កាល​មុន​។​

​ទាំង Liverpool និង Chelsea បាន​ជួប​ការលំបាក​មិន​អាច​បំពេញ​តាម​ការ​រំពឹងទុក​មុន​បើក​រដូវ​កាល ហើយ​ក្រុម​ទាំងពីរ​បាន​ឈរ​នៅ​លេខ​រៀង​ទី ៩ និង​ទី ១០ ក្នុង​ក្របខ័ណ្ឌ Premier League បន្ទាប់​ពី​ពាក់កណ្តាល​រដូវ​កាល​ដ៏​ខកចិត្ត​។​

​ហង្ស​ក្រហម​បាន​ចាញ់​ការប្រកួត​ក្រៅ​ដី​ពីរ​លើ​ក​ជាប់​គ្នា ប៉ុន្តែ​មាន​ភាពរឹងមាំ​នៅ​ទឹកដី Anfield ដោយ​ឈ្នះ​៦​ដង​ក្នុង​ចំណោម ៩ ប្រកួត​ក្នុងផ្ទះ​របស់​ពួកគេ និង​ចាញ់​តែ​ម្តង​ប៉ុណ្ណោះ​។ ក្រុម​តោ​ខៀវ​បាន​ចែក​ផ្លូវ​ជា​មួយ​លោក Thomas Tuchel នៅ​ដើមរដូវ​កាល​នេះ ហើយ​បាន​ជំនួស​គាត់​ដោយ​លោក Graham Potter ដែល​បាន​ចាប់ផ្តើម​ជីវិត​ដ៏​លំបាក​នៅ​ទឹកដី Stamford Bridge ដោយ​ឈ្នះ​តែ​២​ដង​ក្នុង​ចំណោម​១០​ប្រកួត​ចុងក្រោយ​របស់​ពួកគេ​នៅក្នុង Premier League ។​

​ទោះបីជា​បាន​ជះ​លុយ​ដ៏​ច្រើន​សន្ធឹកសន្ធាប់​ក្នុង​រដូវក្តៅ​នេះ​ក្តី ក៏​លោក Potter នៅ​តែ​ជួប​ការលំបាក​ក្នុងការ​សម្រាំង​កីឡាករ​ជម្រើស​១១​នាក់​ខ្លាំង​បំផុត​របស់​គាត់​។ ក្រុម​តោ​ខៀវ​ត្រូវបាន​ជំរុញ​បន្ថែម​ដោយ​ការមកដល់​ក្នុង​ខែ​មករា​របស់​កីឡាករ Joao Felix, Mykhaylo Mudryk និង Benoit Badiashile រួម​ជាមួយ​ខ្សែប្រយុទ្ធ​របស់ Molde គឺ David Datro Fofana ។ ផ្ទុយទៅវិញ Liverpool បាន​មានះ​មិន​ព្រម​ចាយ​លុយ​លើ​ខ្សែបម្រើ​ទេ បើទោះបីជា​មាន​បញ្ហា​ក្នុង​តំបន់​នេះ​ក៏ដោយ​។​

​បញ្ហា​របស់ Chelsea ក្នុង​រដូវ​កាល​នេះ​គឺ​នៅ​តំបន់​ប្រយុទ្ធ​។ ពួកគេ​ជា​ក្រុម​ស៊ុត​បញ្ចូល​ទី​ទាប​បំផុត​នៅក្នុង​ពាក់កណ្តាល​រដូវ​កាល​នេះ ហើយ​បាន​ស៊ុត​បញ្ចូល​ទី​បានត្រឹមតែ ២២ គ្រាប់​ប៉ុណ្ណោះ​ក្នុង​ការប្រកួត Premier League ចំនួន ១៩ លើក​។

​ទោះយ៉ាងណា ក្រុម​តោ​ខៀវ​ត្រូវ​ប្រឈមមុខ​នឹង​ក្រុម Liverpool ដែល​ការពារ​ខ្សោយ​ក្នុង​រដូវ​កាល​នេះ ដោយ​បាន​បណ្តោយ​របូត ២៥ គ្រាប់​ក្នុង ១៨ ប្រកួត​។​

​ក្រុម​ណា​ដែល​អាច​កេងចំណេញ​លើ​ចំណុចខ្សោយ​របស់​គូប្រកួត​នឹង​មាន​លទ្ធភាព​ឈ្នះ​នៅ​ទឹកដី Anfield ។ តែ​ទោះ​យ៉ាងណា Liverpool មានប្រៀប​ជាង Chelsea ដោយ​ជួប​គ្នា ៧ ដង​ចុងក្រោយ ហង្ស​ក្រហម​ចាញ់​តោ​ខៀវ​តែ​ម្តង​គត់​។​

​លទ្ធផល​ព្យាករណ៍ Liverpool ឈ្នះ ២-១​។​

– West Ham vs Everton

* Everton បាន​ចាញ់ ៨ លើក​ក្នុងចំណោម ១១ ប្រកួត​ចុងក្រោយ​របស់​ពួកគេ​។​
* ជ័យជម្នះ​៣​លើក​ក្នុងចំណោម ៤ លើ​ក​របស់ West Ham នៅ​រដូវ​កាល​នេះ​បាន​កើតឡើង​ក្នុងផ្ទះ​។​
* Everton រក​បាន​តែ​១​គ្រាប់​គត់​ក្នុង​ការប្រកួត​ក្រៅ​ដី​៥​លើកចុងក្រោយ​។​
* ៤ ប្រកួត​ក្នុងចំណោម​ការជួបគ្នា​៥​លើក​ចុងក្រោយ​នៃ​ក្របខ័ណ្ឌ Premier League ក្រុម​ទាំង​ពីរ​រក​បាន​តែ​មួយ​គ្រាប់​ប៉ុណ្ណោះ​។​

​កំដៅ​កំពុង​កើន​ឡើង​លើ​កៅអី​របស់​អ្នក​ចាត់ការ​ទូទៅ West Ham លោក David Moyes និង​សម​ភាគី Everton របស់គាត់ គឺ លោក Frank Lampard ហើយ​បរាជ័យ​សម្រាប់​ក្រុម​ណាមួយ​នៅ​ថ្ងៃ​សៅរ៍​នេះ​អាច​ជា​ថ្ងៃ​ការងារ​ចុងក្រោយ​របស់​អ្នក​ទាំង​ពីរ​។​

​លោក Moyes និង​លោក Lampard គឺជា​ឈ្មោះ​ពីរ​ដែល​គ្របដណ្តប់​លើ​លទ្ធភាព​បណ្តេញ​ចេញ​នៅ Premier League ខណៈ​ក្រុម​ហត់នឿយ​របស់​ពួកគេ​ទាំង​ពីរ​កំពុង​ស្ថិត​ក្នុង​តំបន់​កាត់ចោល ដោយ​ពួកគេ​នី​មួយៗ​ទទួល​បាន​ត្រឹមតែ ១៥ ពិន្ទុ​ប៉ុណ្ណោះ​ពី​ការប្រកួត​បើកឆាក​ចំនួន ១៩ លើ​ក​របស់​ពួកគេ​។​

​ក្រុម​ញញួរ​ធំ​ដណ្តើម​បាន​ត្រឹមតែ​មួយ​ពិន្ទុ​ប៉ុណ្ណោះ​ពី​ការប្រកួត​ចំនួន ៧ លើក​ចុងក្រោយ​របស់​ពួកគេ ខណៈ​ក្រុម​ស្ករ​គ្រាប់​មិន​បាន​ទទួល​ជ័យជម្នះ​សោះ​ក្នុង​ការប្រកួត ៧ លើកចុងក្រោយ​។​

​លទ្ធផល​ត្រូវតែ​កើតមាន​នៅ​ឯ​កីឡដ្ឋាន London ប៉ុន្តែ​វា​ច្បាស់​ណាស់​ជា​ការប្រកួត​ដ៏​ភ័យខ្លាច​សម្រាប់​អ្នក​ចាត់ការ​ទូទៅ​ទាំងពីរ ព្រោះ​មិន​អាច​ចាញ់​បានឡើយ​។​

​ការលំបាក​របស់ Everton គឺ​អាច​ងាយ​ស្តារ​ជាង West Ham ព្រោះ​ក្រុម​ទីក្រុង​ឡុង​ដ៍​នេះ​បាន​បញ្ចប់​ក្នុង​ចំណាត់ថ្នាក់​លេខ ៧ ក្នុង Premier League កាល​ពី​រដូវ​កាល​មុន ហើយ​ដូច្នេះ​មាន​លក្ខណៈសម្បត្តិ​គ្រប់គ្រាន់​សម្រាប់ Europa Conference League ជាហេតុ​ធ្វើឱ្យ​ពួកគេ​ហត់​កាន់តែខ្លាំង​។​

​ការ​ផ្សងព្រេង​នៅ​ទ្វីបអឺរ៉ុប​គឺជា​ការរំខាន​ខ្លាំង​សម្រាប់​ក្រុម​ញញួរ​ធំ ដែល​បាន​ចាញ់ ១២ ប្រកួត​ក្នុង​ការប្រកួត​លី​ក ១៩ លើ​ក​របស់​ពួកគេ​។​

​ទោះយ៉ាងណា ការ​ឈ្នះ ៤ លើ​ក​របស់ West Ham បាន​កើតឡើង ៣ ដង​ទៅ​ហើយ​នៅក្នុង​ផ្ទះ ហើយ​ក្រុម​ទាំង​ពីរ​រមែង​ស៊ុត​ចូល​ត្រឹម​១​គ្រាប់​ប៉ុណ្ណោះ ក្នុងជំនួប ៤ ដង​ចុងក្រោយ​។

​លទ្ធផល​ព្យាករណ៍ West Ham ឈ្នះ ១-០​។

– Arsenal vs Man U

* Arsenal បានឈ្នះ ១៥ ដង​ក្នុង​ចំណោម ១៨ ប្រកួត​ក្នុង​លី​កនៅ​រដូវ​កាល​នេះ​។​
* Arsenal តែង​ឈ្នះ​ហើយ​របូត​គ្រាប់​បាល់​ក្នុង ៩ ប្រកួត​នៃ​ការប្រកួត​ក្នុងផ្ទះ ១១ លើកចុងក្រោយ​។​
* Man U បាន​ស៊ុត​បញ្ចូល​ទី​ក្នុង​ការប្រកួត​ក្រៅ​ដី ៩ លើក​ចុង​ក្រោយ​នៅ Premier League របស់​ពួកគេ​។​
* កីឡាករ Martin Odegaard រកបាន ៥ គ្រាប់​ក្នុង​ការប្រកួត​លី​ក ៧ លើកចុងក្រោយ​សម្រាប់ Arsenal​។​

​បរាជ័យ​របស់ Manchester City ក្នុង​ការប្រកួត Derby កាលពី​សប្តាហ៍​មុន​បាន​ធ្វើឱ្យ​ក្រុម Arsenal គ្រប់គ្រង​យ៉ាង​រឹងមាំ​ក្នុងការ​ប្រជែង​ដណ្តើមពាន Premier League ហើយ​ក្រុម​របស់​លោក Mikel Arteta នឹង​មិន​ខ្លាច​នរណា​ទាំងអស់​នៅ​ពាក់កណ្តាល​រដូវ​កាល​សេសសល់ រួម​ទាំង​គូ​ប្រជែង Manchester United នៅ​ថ្ងៃអាទិត្យ​ផងដែរ​។​

​ការ​ចាញ់ ២-១ របស់ Man City នៅ​ទឹកដី Old Trafford បាន​បើកទ្វារ​សម្រាប់​ក្រុម​កាំភ្លើង​ធំ ហើយ​ពួកគេ​សម​នឹង​ឈ្នះ ២-០ លើ Tottenham កាលពី​ថ្ងៃអាទិត្យ ដែល​នាំ​ឱ្យ​ពួកគេ​មាន ៨ ពិន្ទុ​ដាច់​នៅលើ​កំពូល​តារាង​។​

United គឺជា​ក្រុម​តែមួយគត់​ដែល​បាន​យក​ឈ្នះ Arsenal ក្នុង​រដូវ​កាល​នេះ ដោយ​ពួកគេ​បានឈ្នះ ៣-១ ក្នុង​ខែកញ្ញា នៅពេលដែល Marcus Rashford ស៊ុត​បញ្ចូល​ទី​បាន​ពីរ​គ្រាប់ ហើយ​ក្រុម​របស់​លោក Erik ten Hag បាន​កែប្រែ​ជំនោរ​ការប្រកួត​របស់​ពួកគេ​ជាមួយនឹង​លទ្ធផល​ល្អ​ជា​បន្តបន្ទាប់​ចាប់តាំងពី​ការ​សម្រាក​វើល​ខា​ប់​។​

​ទោះយ៉ាងណា ក្រុម​កាំភ្លើង​ធំ​មាន​លទ្ធភាព​ឈ្នះ​ខ្ពស់ជាង​នៅថ្ងៃនេះ​។ Newcastle គឺជា​ក្រុម​តែមួយគត់​ដែល​បាន​ចាកចេញ​ពី​ទឹកដី Emirates ជាមួយនឹង​១​ពិន្ទុ​នៅក្នុង​លី​កនៅ​រដូវ​កាល​នេះ នៅ​ពេល​ពួកគេ​ស្មើ​សូន្យ​គ្រាប់​ថ្មីៗ​នេះ ប៉ុន្តែ​ការប្រកួត​ក្នុងផ្ទះ​របស់ Arsenal តែង​មាន​លក្ខណៈ​វាយ​សម្រុក​ទៅវិញទៅមក ល្អមើល​ខ្លាំងណាស់​។​

​ខណៈ United បាន​ស៊ុត​បញ្ចូល​ទី​ក្នុង​ការប្រកួត​ក្រៅ​ដី ៩ លើក​ចុងក្រោយ​របស់​ពួកគេ និង ជាមួយនឹង​មហិច្ឆតា​ដណ្តើមពាន​រៀងៗ​ខ្លួន ក្រុម​ទាំង​ពីរ​រំពឹង​មាន​គ្រាប់​បាល់​ស៊ុត​ចូលគ្នា​នៅ​ថ្ងៃអាទិត្យ​នេះ តែ​ប្រៀប​ឈ្នះ​គឺ​នៅ​ខាង​កាំភ្លើង​ធំ​។

​លទ្ធផល​ព្យាករណ៍ Arsenal ឈ្នះ ២-១៕

Liverpool ត្បិត​លេង​អន់​នៅតែ​រំពឹង​ឈ្នះ​លើ Chelsea ដែល​កំពុង​លេង​អន់​ដូចគ្នា