​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី បាន​និយាយ​កាលពី​ថ្ងៃ​សុក្រ​ទី​២០​មករា​ថា “​មិន​មាន​ជម្រើស​ផ្សេង​”​ក្រៅពី​លោក​ខាងលិច​ផ្តល់​ឱ្យ​អ៊ុ​យក្រែន​​នូវ​រថក្រោះ​ធុន​ធ្ងន់​នោះ​ទេ ខណៈ​អាល្លឺម៉ង់​បាន​បរាជ័យ​ក្នុង​ការផ្តល់ជូន​រថក្រោះ Leopard របស់​ខ្លួន​សម្រាប់​លទ្ធភាព​បើក​ការវាយលុក​នៅ​និទាឃ​រដូវ​ដោយ​រដ្ឋាភិបាល​ក្រុង​គៀវ​។​

​កិច្ចប្រជុំ​ដែល​ដឹកនាំ​ដោយ​សហរដ្ឋ​អាម៉េរិក​នៃ​សម្ពន្ធមិត្ត​អ៊ុយ​ក្រែន​ចំនួន ៥០ បាន​កើតឡើង​ជាមួយនឹង​ការផ្តល់ជូន​គ្រឿង​សឹក​យោធា​ដែល​មាន​តម្លៃ​រាប់​ពាន់​លាន​ដុល្លារ រួម​ទាំង​រថពាសដែក​ធុន​ស្រាល និង​គ្រាប់​យុទ្ធភ័ណ្ឌ​ជាច្រើន​ដែល​ត្រូវការ​ចាំបាច់​ដើម្បី​រុញច្រាន​កងកម្លាំង​រុស្ស៊ី​។​

​ប៉ុន្តែ​លោក​ហ្សេ​លេន​ស្គី​បាន​សង្កត់ធ្ងន់ថា លោក​ត្រូវការ​រថក្រោះ​ប្រយុទ្ធ​មិនមែន​គ្រាន់​តែ​គ្រឿង​សឹក​ទាំងនោះ​ទេ ខណៈ​រដ្ឋមន្ត្រី​ការពារ​ជាតិ​អាម៉េរិក លោក ឡយ អូ​ស្ទីន បាន​និយាយថា​អ៊ុយ​ក្រែន​ត្រូវបាន​​រំពឹងថា​នឹង​បើក​ការវាយលុក​ប្រឆាំង​នឹង​ទាហាន​រុស្ស៊ី​ដែល​ជីក​លេណដ្ឋាន​រឹងមាំ​នៅក្នុង​ប៉ុន្មាន​សប្តាហ៍​ខាងមុខនេះ​។​

​លោក​អូ​ស្ទីន​បាន​និយាយ​នៅ​ឯ​កិច្ចប្រជុំ​នៅឯ​មូលដ្ឋាន​ទ័ពអាកាស​រ៉ា​ម​ស្តា​ញ (Ramstein) ក្នុង​ប្រទេស​អាល្លឺម៉ង់​ថា “​យើង​មាន​ឱកាស​នៅ​ទី​នេះ​នៅ​ចន្លោះ​ពេល​នេះ​និង​និទាឃ​រដូវ​…​នៅពេលណា​ដែល​​ពួកគេ​ចាប់ផ្តើម​ប្រតិបត្តិការ​របស់​ពួកគេ ពោលគឺ​ការវាយលុក​របស់​ពួកគេ​”​។​

​នៅក្នុង​សុន្ទរកថា​ជា​វីដេអូ លោក​ហ្សេ​លេន​ស្គី​បាន​ជំរុញ​ឱ្យ​ក្រុម​ប្រទេស​ទាំង​៥០​នេះ “​បង្កើនល្បឿន​” ការ​ចែកចាយ​អាវុធ ហើយ​បាន​សង្កត់ធ្ងន់ថា រថក្រោះ Leopard របស់​អាល្លឺម៉ង់​គឺជា​តម្រូវការ​ចម្បង​។​

​លោក​បាន​និយាយថា “​ជា​រៀងរាល់ថ្ងៃ​យើង​កាន់តែ​ច្បាស់​ថា​មិន​មាន​ជម្រើស​ផ្សេង​ទេ ចឹង​ការសម្រេចចិត្ត​អំពីរ​ថ​ក្រោះ​ត្រូវតែ​ធ្វើ​ឡើង​ជា​ដាច់ខាត​”៕

​អ៊ុយ​ក្រែន​ត្រូវការ​រថក្រោះ​ជា​ចម្បង​ដើម្បី​បើក​ការ​វាយលុក​លើ​រុស្ស៊ី