​ប្រែ​សម្រួល : កញ្ញា​ដា​លី​ស (​បាងកក​ប៉ុស្តិ៍​) ៖ ជើងហោះហើរ​ប្រហែល ២៤០ ពី​ប្រទេស​ចិន​មក​ថៃ​រំពឹង​កើតឡើង​អំឡុង​បុណ្យ​ចូល​ឆ្នាំ​ចិន​ពី​ថ្ងៃទី​១៩-២៥​មករា​ខែកុម្ភៈ ឬ ប្រហែល ៣៤ ជើង​ក្នុង​មួយ​ថ្ងៃ​ដោយ​​ជួយ​ជំរុញ​យ៉ាងខ្លាំង​ដល់​វិស័យ​ទេសចរណ៍ នេះ​បើ​យោង​តាម​ក្រុមហ៊ុន Aeronautical Radio of Thailand Ltd (Aerothai)​។​

​ប្រធាន​ក្រុមហ៊ុន Aerothai លោក នូ​ផា​ស៊ីត ចាក់​ភី​តាក់ (Nopasit Chakpitak) បាន​និយាយ​កាលពី​ថ្ងៃ​សុក្រ​ថា អាជ្ញាធរ​រំពឹង​ជើងហោះហើរ​មក​ដល់​និង​ចាក​ចេញ​ចំនួន១៨​ផ្អែក​លើ​កាលវិ​​ភាគ​ហោះហើរ​ធម្មតា បូក​ទាំង​ជើងហោះហើរ​បន្ថែមចំនួន ១៦ ជើង (​មិន​រាប់​បញ្ចូល​ជើងហោះហើរ​ដឹកជញ្ជូន​)​។​

​លោកបន្ថែមថា អំឡុង​រយៈពេល​៧​ថ្ងៃនេះ អាកាសយានដ្ឋាន​សុវណ្ណ​ភូមិ​រំពឹង​ទទួល​ជើងហោះហើរ​ចំនួន ៧៥ ជើង ឬ ១១ ជើង​ក្នុង​មួយថ្ងៃ អាកាសយានដ្ឋាន​ដន​មឿង​ទទួល ៥២ ជើង អាកាសយានដ្ឋាន​ភូ​កេត ៧៨ ជើង និង​អាកាសយានដ្ឋាន​ឈៀង​ម៉ៃ ៣៥ ជើង​។​

​លោក​នូ​ផាស៊ី​ត​និយាយថា ក្នុង​ខែមករា​ឆ្នាំនេះ ក្រុមហ៊ុន Aerothai​ព្យាករណ៍​ថា ជើងហោះហើរ ១.១៦០ ជើង​ពី​ចិន ឬ ៣៧ ជើង​ក្នុង​មួយ​ថ្ងៃ​នឹង​ចូល​មក​ថៃ​។ នេះ​គឺ​ធ្លាក់ចុះ ៩១ ភាគរយ​ពី​ចំនួន ១២.២០៩ ជើង ឬ ៣៩៤ ជើង​ក្នុង​មួយថ្ងៃ​ក្នុង​ខែ​មករា ឆ្នាំ ២០១៩​។

​លោក​ព្យាករណ៍​ថា​នឹង​មាន​ជើងហោះហើរ ៣៦.៨៩៦ ជើង​ពី​ចិន​ក្នុងឆ្នាំនេះ គឺ​ច្រើន​ជាង​ឆ្នាំមុន​ពីរដង​។ លោក​បាន​បន្ថែមថា ចំនួន​ជើងហោះហើរ​ពី​ចិន​នឹង​ឈាន​ដល់​កម្រិត​មុនកូ​វីដនៅ​ឆ្នាំក្រោយ​៕

ភ្ញៀវ​ចិន​សម្រុក​មកលេង​ថៃ​អំឡុង​បុណ្យ​ចូល​ឆ្នាំ​ចិន