​ប្រែ​សម្រួលៈ​បំណង​(​ស្ត្រេត​ថែមស៍​)៖​នាយក​ខាង​ចាក់​ថ្នាំ​បង្ការ​នៅ​អង្គការ​សុខភាព​ពិភពលោក​(WHO)​កាលពី​ថ្ងៃ​សុក្រ​បាន​សរសើរ​ចិន​ចំពោះ​ការធ្វើអោយ​មាន​ការរីក​ចំរើន​យ៉ាង​ឆាប់រហ័ស​លើ​ការចាក់​​វ៉ាក់សាំង​កូវី​ដ​១៩​និង​ដូស​ជំរុញ​ជូនមនុស្ស​វ័យចាស់ៗ​ចាប់តាំងពី​ខ្លួន​ដកចេញ​ការគ្រប់គ្រង​ជំងឺឆ្លង​នេះ​ដ៏​តឹងរឹង​កាលពី​ខែ​មុន​។​

​ប្រជាជន​ចិន​ជាង​១,៤​លាន​នាក់​ត្រូវ​បាន​ចាក់​វ៉ាក់សាំង​បង្ការ​ភាគ​ច្រើន​ចាប់តាំងពី​ជំងឺ​នេះ​លេច​ចេញ​ដំបូង​នៅ​ទីក្រុង​អ៊ូ​ហាន​កាលពី​ចុងឆ្នាំ​២០១៩​និង​ជាមួយ​នឹង​វិធានការ​គ្រប់គ្រង​កូវី​ដ​ដ៏​តឹងរឹង ចិន​​មាន​អ្នក​ឆ្លង​និង​ស្លាប់​ដោយ​ជំងឺ​នេះ​ទាប បើ​ធៀប​នឹង​ប្រទេស​ផ្សេងៗ​។​តែ​ចាប់​តាំងពី​ពេល​ដកចេញ​វិធានការ​ទប់ស្កាត់​កូវី​ដ​ដ៏​តឹងតែង​កាលពី​ខែ​ធ្នូ ចិន​បាន​ជួប​កំណើន​នៃ​ការឆ្លង​និង​ស្លាប់​យ៉ាង​គំហ៊ុក​។​

​ស្ត្រី​វ័យ​ចំណាស់​ម្នាក់​ចាក់​វ៉ាក់សាំង​កូវី​ដ​១៩​នៅ​ភូមិ​មួយ ជាយក្រុង​សៀង​ហៃ​កាលពី​ថ្ងៃ​២១​ធ្នូ ឆ្នាំ​២០២២

​កេត អូ​ប្រាយ​អឹន​(Kate O’Brien)​នាយក​ខាង​ចាក់​ថ្នាំ​បង្ការ​នៅ​អង្គការ​សុខភាព​ពិភពលោក​បាន​ប្រាប់​សន្និសីទកាសែត​មួយ​នៅ​ក្រុង​ហ្សឺ​ណែវ​ថា «​ចិន​កំពុង​ធ្វើអោយ​មាន​វឌ្ឍនភាព​យ៉ាង​ធំ​ក្នុង​​ការចាក់​វ៉ាក់សាំង​កូវី​ដ​១៩​និង​ដូស​ជំរុញ​ដល់​មនុស្សចាស់​»៕