​ប្រែ​សម្រួលៈ​បំណង​(​ស្ត្រេត​ថែមស៍​)៖ ប្រតិបត្តិ​ការស្វែងរក​និង​ជួយសង្គ្រោះ​ក្រោយ​មាន​ហេតុការណ៍រ​លំបាក់​ទឹកកក​នៅ​ខ្ពង់រាប​ទី​បេត៍ ប្រទេស​ចិន​ត្រូវបាន​បញ្ចប់​កាលពី​ថ្ងៃ​សុក្រ​ក្រោយ​រក​ឃើញ​សាកសព​​មនុស្ស​២៨​នាក់​។​

​ការបាក់​ព្រិល​ទឹកកក​នេះ​បាន​កើត​ឡើង​កាលពី​ល្ងាច​ថ្ងៃ​អង្គារនៅ​ច្រក​ចេញ​នៃ​រូងភ្នំ​មួយ​នៅ​ទី​បេត៍ភាគ​អាគ្នេយ៍​។​វា​នាំ​អោយ​កប់​មនុស្ស​ជាច្រើន​នៅក្នុង​រថយន្ត​របស់​គេ​។​

​ក្រសួង​គ្រប់គ្រង​គ្រាអាសន្ន​ចិន​បាន​បញ្ជូន​ក្រុម​ឆ្លើយតប​ទៅ​កាន់​តំបន់​កើតហេតុ​នៅ​ថ្ងៃ​បន្ទាប់​។​

​បើតាម​ទីភ្នាក់ងារ​សារព័ត៌មាន​ស៊ីន​ហួរ​រាយការណ៍​កាលពី​ថ្ងៃ​សុក្រ មនុស្ស​ស្លាប់​ក្នុង​ហេតុការណ៍​បាក់​ព្រិល​ទឹកកក​នេះ​មាន​ចំនួន​២៨​នាក់​ហើយ​«​ប្រតិបត្តិ​ការស្វែងរក​និង​សង្គ្រោះ​បាន​បញ្ចប់​ត្រឹម​ម៉ោង​៥​កន្លះ​ល្ងាចថ្ងៃសុក្រ​»​។​

​ការបាក់​ព្រិល​ទឹកកក​នៅ​ផ្លូវ​រូងភ្នំ​ឌូ​អូ​ស្យុ​ង​ឡា​(Duoxiongla)​បង្កឡើង​ដោយ​ខ្យល់​បក់​ខ្លាំង​និង​សីតុណ្ហភាព​កើនឡើង​កាលពី​ថ្ងៃ​អង្គារ នេះ​បើ​តាម​អ្នកជំនាញការ​ប្រាប់​សារព័ត៌មាន​ស៊ីន​ហួរ​។​

​ការបាក់​ព្រិល​ទឹកកក​កើតមាន​ជា​ធម្មតា​នៅ​តំបន់​ភ្នំ​ហេមពាន្ត តំបន់​ដែល​សំបូរ​ភ្នំ​ខ្ពស់ៗគ្រប​ដោយ​ព្រិល​ទឹកកក​​។​

​កាលពី​ខែ​តុលា មនុស្ស​យ៉ាង​ហោច​ណាស់​២៦​នាក់​បាន​ស្លាប់​នៅ​ពេល​ពួក​អ្នក​ឡើង​ភ្នំ​មួយក្រុម​ជាប់​ក្នុង​ការបាក់​ព្រិល​ទឹកកក​នៅ​ភ្នំ​មួយ​ក្នុង​រដ្ឋ​អ៊ុត​តា​រ៉ា​ខាន់រ​បស់​ឥណ្ឌា​៕

​ក្រសួង​គ្រប់គ្រង​គ្រាអាសន្ន​ចិន​បាន​បញ្ជូន​ក្រុម​ឆ្លើយតប​ទៅ​កាន់​តំបន់​កើតហេតុ​និង​បាន​រក​ឃើញ​ជនរងគ្រោះ​ដល់​ជីវិត​២៨​នាក់​កាលពី​ថ្ងៃ​សុក្រ​