​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ការដាក់​ដំណើរការ​កម្មវិធី​ជជែក​បែប AI​ហៅថា ChatGPT កាលពី​ចុងឆ្នាំ​មុន​បានកត់សម្គាល់​យុគសម័យ​ថ្មី​នៃ​បច្ចេកវិជ្ជា​បញ្ញា​សិប្បនិម្មិត (AI)​ហើយ​បាន​បង្ក​​ឱ្យ​មាន​ការបារម្ភ​យ៉ាង​ទូលំទូលាយ​ជុំវិញ​ឥទ្ធិពល​របស់ AI​នៅលើ​ទីផ្សារ​ការងារ​។​

​សមត្ថភាព​របស់​វា​ក្នុង​ការសរសេរ​កំណាព្យ ការសរសេរ​ភាពយន្ត ការប្រឡង និង​ការ​ក្លែង​ធ្វើ​ជា​បន្ទប់​ជជែក​កម្សាន្ត​ទាំងមូល បាន​នាំឱ្យ​អ្នកខ្លះ​លើកឡើងថា​វា​អាច​ដណ្តើម​ការងារ​ឆាប់ៗ​នេះ​នៅក្នុង​ផ្នែក​​សេវាកម្ម​អតិថិជន ការសរសេរ​កម្មសិទ្ធិ​បញ្ញា និង​សូម្បី​វិជ្ជាជីវៈ​ផ្នែក​ច្បាប់​។​

​ក្រុមហ៊ុន Microsoft​បាន​វិនិយោគ ១០ ពាន់​លាន​ដុល្លារ​នៅក្នុង​កម្មវិធី ChatGPT ហើយ​បាន​និយាយថា បច្ចេកវិជ្ជា​នេះ​នឹង​ផ្លាស់ប្តូរ​របៀប​ដែល​មនុស្ស​ធ្វើ​អន្តរ​កម្ម​ជាមួយ​កុំព្យូទ័រ​។​

​អ្នកជំនាញ AI​លោក រី​ឆាត ដេ​វៀរី (Richard DeVere)​នាយក​ផ្នែក​វិស្វកម្ម​សង្គម​សម្រាប់​ក្រុមហ៊ុន Ultima បាន​ប្រាប់ DailyMail.com ថា “​ខ្ញុំ​ជឿថា ChatGPT​អាច​ជំនួស​កម្លាំង​​ការងារ​បច្ចុប្បន្ន ២០ ភាគរយ​”​។​

“ChatGPT មិនមែន​ជា​រឿង​គួរឱ្យភ្ញាក់ផ្អើល​ទេ វា​ជា​បដិវត្តន៍​បច្ចេកវិជ្ជា​ថ្មី​មួយ​។ រ៉ូបូ​តមិន​ដណ្តើម​ការងារ​របស់​អ្នក​ទេ ប៉ុន្តែ​មនុស្ស ដែល​មាន​រ៉ូបូ​តនឹង​ដណ្តើម​ការងារ​របស់​អ្នក​”​។​

“​នេះ​មិន​គ្រាន់តែ​ជា​រឿង​ថ្មី​ដូចជា Bitcoin, NFTs ឬ Contact Lenses ឆ្លាត​ប៉ុណ្ណោះ​ទេ តែ​នេះ​កំពុង​កើតឡើង ហើយ​វា​មិន​បង្ហាញ​សញ្ញា​នៃ​ការថយចុះ​នោះទេ​”​។​

​លោក​ដេ​វៀ​រី​បាន​បន្តទៀតថា “​វា​នឹង​មិនមែន​ជា​ដំណើរការ​តែមួយ​ប៉ព្រិចភ្នែក ដែល​មនុស្ស​ទាំងអស់​ត្រូវ​បាន​ជំនួស​ដោយ​រ៉ូបូត​ដោយ​ស្វ័យប្រវត្តិ​នោះទេ​។ រលក​ទីមួយ​នឹង​កើត​ចេញពី​អ្នក​ដែល​មាន​បទ​​ពិសោធន៍​តិច ដែល​ប្រើ​ឧបករណ៍ AI​ដើម្បី​ជួយ​ដល់​កិច្ចការ​ប្រចាំថ្ងៃ​របស់​ពួកគេ​”​។​

​ក្រុមហ៊ុន​ជាច្រើន​កំពុង​ផ្តល់​ជូន​ដំណោះស្រាយ AI​រួច​ហើយ​ដើម្បី​ធ្វើ​ស្វ័យប្រវត្តិកម្ម​ការងារ “​របស់​មនុស្ស​” ដូចជា Jounce AI ដែល​សន្យា​ផ្តល់​ការសរសេរ​កម្មសិទ្ធិបញ្ញា AI​ដោយ​ឥតគិតថ្លៃ​គ្មាន​​ដែន​កំណត់​”​។​

​អង្គការ DoNotPay កំពុង​ប្រើ ChatGPT ដើម្បី​ការពារ​មនុស្ស​នៅក្នុង​តុលាការ​ប្រឆាំងនឹង​ការផាកពិន័យ​ល្មើស​ល្បឿន​កំណត់​។​

​នៅ​ចក្រភព​អង់គ្លេស ChatGPT អាច​ធានា​តំណែង​នៅក្នុង​បញ្ជី​សម្រាំង​សម្រាប់​ការសម្ភាសន៍​ការងារ (​មួយ​ក្នុងចំណោម ២០ ភាគរយ​បាន​ធ្វើ​ដូច្នេះ​)​ដោយ​ជួយ​បំពេញ​កិច្ច​ការងារ​ផ្នែក​សរសេរ​​បាន​យ៉ាង​ល្អ​៕

ប្រាំ​ឆ្នាំ​ទៀត AI អាច​នឹង​ដណ្តើម​ការងារ​មនុស្ស ២០ ភាគរយ