​ប្រែ​សម្រួលៈ​បំណង​(​ដេល្លី​ម៉េល​)៖​ជនជាតិ​ប៉េ​រូ​រាប់សិប​នាក់​បាន​រងរបួស​នៅពេល​ភាព​តានតឹង​កញ្ជ្រោល​ឡើង​ជា​ថ្មី​កាលពី​យប់​ថ្ងៃ​សុក្រ ក្រោយពី​ប៉ូលីស​បាន​ប៉ះទង្គិច​ជាមួយ​អ្នក​ប្រឆាំង​តវ៉ា​នៅក្នុង​បាតុកម្ម​​ប្រឆាំង​រដ្ឋាភិបាល ដែល​បាន​និង​កំពុង​រាលដាល​នៅ​ទូទាំង​ប្រទេស​។​

​នៅក្នុង​រដ្ឋធានី​លី​ម៉ា ប៉ូលីស​បាន​ប្រើ​គ្រាប់​បែកផ្សែង​ដើម្បី​បណ្តេញ​បាតុករ ដែល​ចោល​ដប​និង​ដុំថ្ម នៅ​ពេល​ពួកគេ​ដុត​អោយ​ឆេះ​របស់​របរ​នៅ​តាម​ដង​វិថី​។​

​នៅ​តំបន់​ពូ​ណូ​(Puno)​ភាគ​ខាងត្បូង​ប្រទេស អ្នក​ប្រឆាំង​តវ៉ា​ប្រមាណ​១.៥០០​នាក់​បាន​វាយប្រហារ​ស្ថានីយ​ប៉ូលីស​នៅ​ទីប្រជុំជន អ៊ី​ឡា​វ៉េ​(Ilave)​។​ស្ថានីយ​ប៉ូលីស​មួយ​នៅ​ក្រុង ហ្សេ​ពីតា (Zepita)​នៃ​​តំបន់​ពូណូក៏​ត្រូវ​បាន​ដុត​បំផ្លាញ​។​

​អាជ្ញាធរ​សុខាភិបាល​នៅ​អ៊ី​ឡា​វ៉េ បាន​រាយការណ៍​ថា មនុស្ស​ប្រាំ​បីនាក់​ត្រូវបាន​នាំ​ចូល​មន្ទីរពេទ្យ​ដោយសារ​របួស ដោយ​ខ្លះ​បាក់ដៃ​បាក់ជើង និង​របួស​ភ្នែក​។​

​គិត​ត្រឹម​រសៀល​ថ្ងៃ​សុក្រ មនុស្ស​៥៨​នាក់​បាន​រងរបួស​នៅក្នុង​បាតុកម្ម​ទូទាំង​ប្រទេស​។

​ចលនា​ច​ល​នេះ​បាន​កើតឡើង​មួយ​ថ្ងៃ​បន្ទាប់ពី​អាគារ​ប្រវត្តិសាស្ត្រ​ល្បីល្បាញ​បំផុត​នៅ​ទីក្រុង​លី​ម៉ា​ត្រូវ​ដុត​ឆេះ​ខ្ទេច និង​ប្រធានាធិបតី ឌី​ណា បូ​លូ​អា​តេ​( Dina Boluarte)​ប្តេជ្ញា​ចាត់វិធានការ​តឹងរឹង​​ឡើង​ប្រឆាំង​ពួក​បំផ្លិចបំផ្លាញ​។​

​អាគារ​ប្រវត្តិសាស្ត្រ​នៅ​ក្រុង​លី​ម៉ា​ត្រូវ​បាន​ដុត​បំផ្លាញ​ក្នុងពេល​មាន​បាតុកម្ម​ប្រឆាំង​រដ្ឋាភិបាល​កាលពី​ថ្ងៃ​១៩​មករា​

​សូមបញ្ជាក់​ថា មនុស្ស​រាប់ពាន់​នាក់​បាន​ចេញ​មក​តាម​ដងផ្លូវ​នៃ​ក្រុង​លី​ម៉ា​នៅ​សប្តាហ៍​នេះ​ដើម្បី​ទាមទារ​ការផ្លាស់ប្តូរ ចំ​ពេល​ពួក​បាតុករ​កាន់តែ​ខឹង​នឹង​ការស្លាប់​មនុស្ស​កាន់តែ​ច្រើន​ក្នុងការ​ប្រឈម​​រវាង​បាតុករ​និង​ប៉ូលីស​។ ជា​ផ្លូវការ មនុស្ស​៤៥​នាក់​ត្រូវបាន​សម្លាប់នៅរយៈពេលមួយខែមកនេះ​។​

​ការប្រឆាំង​តវ៉ា​បាន​ចាប់ផ្តើម​តាំងពី​ពេល​សភា​បណ្តេញ​ប្រធានាធិបតី ប៉េ​ដ្រូ កា​ស្ទីល​ឡូ​(Pedro Castillo)​និង​ដាក់​លោកស្រី ឌី​ណា បូ​លូ​អា​តេ ចូល​ជំនួស​កាលពី​ជាង​មួយខែ​មុន​ជា​ហេតុនាំអោយ​ពួក​​អ្នកគាំទ្រ​មេដឹកនាំ​មុន​នាំគ្នា​ធ្វើ​បាតុកម្ម​ទាមទារ​រំលាយ​រដ្ឋាភិបាល ដោះលែង​លោក​កា​ស្ទីល​ឡូ​និង​រៀបចំ​ធ្វើ​ការបោះឆ្នោត​មួយ​ជា​បន្ទាន់​៕

​ប៉ូលីស​និង​បាតុករ​ចោទ​គ្នា​ទៅវិញ​ទៅមក​ថា​ប្រើ​សព្វាវុធ​ដែល​អាច​នាំអោយ​បាត់បង់​ជីវិត​