ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កីឡាករ​អន្តរជាតិ​ប្រេ​ស៊ីល ដា​នី អាល់​វេស (Dani Alves) ត្រូវបាន​ប៉ូលីស​នៅ​ទីក្រុង​បា​សេ​ឡូ​ណា​ចាប់ខ្លួន ហើយ​បញ្ជូន​ទៅ​តុលាការ​ដើម្បី​សាកសួរ​បន្ទាប់​​ពី​ត្រូវបាន​ចោទប្រកាន់​ពី​បទ​រំលោភ​ផ្លូវភេទ​លើ​នារី​ម្នាក់​នៅក្នុង​ក្លិប​រាត្រី​មួយ​នៅក្នុង​ទីក្រុង​។​

​កីឡាករ​បាល់ទាត់​រូបនេះ​បាន​សារភាពថា​ខ្លួន​បាន​ទៅលេង​នៅ​ក្លិប​រាត្រី​ដ៏​ល្បី Sutton កាលពី​ចុងខែ​មុន នៅពេល​ដែល​បទល្មើស​ផ្លូវភេទ​បាន​កើតឡើង​។​

​ប៉ុន្តែ​រូបគេ​បាន​ការពារ​ភាព​គ្មាន​ទោស​កំហុស​របស់​ខ្លួន​នៅក្នុង​បទ​សម្ភាសន៍​តាម​កញ្ចក់​ទូរទស្សន៍​អេ​ស្ប៉ា​ញ បន្ទាប់​ពី​តុលាការ​បាន​បញ្ជាក់ថា ខ្លួន​បាន​បើក​ការស៊ើបអង្កេត​ជា​ផ្លូវការ ដោយ​លោក​អះអាង​​ថា “​ខ្ញុំ​មិន​ស្គាល់​ស្ត្រី​នេះ​ជា​នរណា​នោះទេ​។ ខ្ញុំ​មិន​ស្គាល់​ឈ្មោះ​នាង ខ្ញុំ​មិន​ស្គាល់​នាង ខ្ញុំ​មិនដែល​ឃើញ​នាង​ទេ​ក្នុង​ជីវិត​របស់​ខ្ញុំ​”​។​

​កាលពី​ថ្ងៃ​សុក្រ​ទី​២០​មករា អតីត​ខ្សែការពារ​ក្រុម Barcelona ដែល​បច្ចុប្បន្ន​លេង​ជាមួយ​ក្រុមម៉ិក​ស៊ិក UNAM Pumas ត្រូវបាន​ចាប់ខ្លួន​នៅ​ទីតាំង​ដែល​មិន​បាន​បញ្ចេញ​ឈ្មោះ​ហើយ​ត្រូវបាន​នាំ​​ទៅកាន់​ប៉ុស្តិ៍ប៉ូលីស​ក្នុង​សង្កាត់​ឡេស​ខ​ត (Les Corts)​។​

​របាយការណ៍​ក្នុងស្រុក​នានា​បាន​និយាយថា កីឡាក​រវ័យ ៣៩ ឆ្នាំ ដែល​បាន​ក្លាយជា​កីឡា​ករប្រេ​ស៊ីល​ចាស់​បំផុត​លេង​ក្នុ​ងវើល​ខាប់​កាលពី​ខែ​មុន បាន​រៀបចំ​ការសម្ភាស​ន៍​ជាមួយ​ប៉ូលីស​តាមរយៈ​មេធាវី​។​

​របាយការណ៍​ក៏​និយាយ​ផងដែរ​ថា រូបគេ​ត្រូវ​ចាប់ខ្លួន​ហើយ​ផ្ដិតមេដៃ​ជា​ផ្នែក​នៃ​នីតិវិធី​តាម​ទម្លាប់ មុនពេល​ត្រូវ​បាន​សួរនាំ​និង​នាំខ្លួន​ទៅ​កាន់​តុលាការ ដែល​កំពុង​ស៊ើបអង្កេត​លើ​ករណី​រំលោភ​ផ្លូវភេទ ដើម្បី​សាកសួរ​បន្ថែម​៕

អាល់​វេ​សត្រូវ​ប៉ូលីស​អេ​ស្ប៉ាញ​ចាប់ខ្លួន​កាលពី​ថ្ងៃ​សុក្រ